Salmos 14 - Chayahuita (Shahui)

Piyapiꞌsa nitapicancanpisoꞌ

Isonta canta Tapiri ocoirin

¹ Piyapiꞌsa naponin yonquiatonaꞌ, co Yosë yaꞌhuërinhuë pochin cancantopi. Inapoatona chihuëpiso pochin nipi. Co nishinahuën nicatonaꞌ, oshahuanpi. ¡Co aꞌnaya tëranta noya nininhuëꞌ!

² Inápa quëran Siniorosoꞌ nocorinpoaꞌ. “¿Aꞌnaya tëranta taꞌma yonquínahuan niꞌton, chinotaponco to?” taꞌton ninapirinhuëꞌ.

³ ¡Coꞌchi paya! Yaꞌipiya pëshonpi. Chihuërëso pochin nicatona nitapicancanpi. ¡Co aꞌnaya tëranta noya ninaꞌpi yaꞌhuërinhuëꞌ!

⁴ Co noyahuëꞌ nipisopitasoꞌ, co manta yonquirëhuë pochin nipi. Cosharo caꞌnëso pochin Yosë piyapinënpitanpoa nitarinënpoaꞌ. Naporahuatonaꞌ, co manta Sinioro chinotopihuëꞌ.

⁵ Inahuasoꞌ, paꞌyanatona ropataponaꞌ. Canpoaso nipirinhuëꞌ, ina imarëhua niꞌton, catahuararinpoaꞌ.

⁶ Sano piyapiroꞌsa yonquipisoꞌ, yatëhuapi. Napopirinahuëꞌ, Siniorori inapitaso noya nicaton paꞌpoyararin.

⁷ ¡Maꞌcha Quirosarin quëran Sinioro huëꞌsahuaton, israiroꞌsanpoa nichaꞌërinpoahuë paya! Piyapinënpitanpoa nipirëhuahuëꞌ, aꞌna parti quëninënpoaꞌ. Sinioro nohuanton yaꞌhuërëhuaquë panantahuatëhuaꞌ, Cacopo shinpitanpoa noya ancantarihuaꞌ. Yaꞌipi israiroꞌsanpoa napoarihuaꞌ.