Salmos 139 - Chayahuita (Shahui)

Yosëso yaꞌipi nitotahuaton, yaꞌipi parti yaꞌhuërinsoꞌ

Isonta canta, Tapiri ocoirin

¹ Sinioro, quëmasoꞌ nohuitatonco yonquirahuësonta nitotëran.

² Yaꞌipi ninahuësopita quëmasoꞌ nitotëran. Aquëranta nipirinhuëꞌ, maꞌsona yonquirahuëso nitotëran.

³ Paꞌpatora, nitotëran. Chinotohuatorantaꞌ, nitotëran. Yaꞌipi ninahuësopita, nitotëran.

⁴ Co nonshátërapirahuë tërantaꞌ, maꞌsona taꞌcahuasoꞌ nani nitotëran.

⁵ Yaꞌipi parti quëran tahuirapitatë pochin yaꞌcopiranco. Imiran quëran picopitatë pochin nitëranco.

⁶ Yaꞌipi inaporanso yonquihuatora, paꞌyanahuë. Onpoatonso napomaranquën. Yonquirahuësoꞌ, co inaquë huarëꞌ icaninhuëꞌ.

⁷ Ispiritonën pataꞌhuasoꞌ, ¡co onporonta nanichitohuëꞌ! Taꞌananpipiranquënhuë tërantaꞌ, ¡co onporo pachitënquënhuëꞌ!

⁸ Piꞌiroꞌtëquë paꞌpirahuëntaꞌ, inaquë quëmaso nisaran. Noꞌpaꞌ acoporoquë paꞌmapirahuë tërantaꞌ, inaquënta quëmaso yaꞌhuëaran.

^9-10 Inaira pochin yanponato, piꞌi pipirinso parti paꞌpirahuë tërantaꞌ, inaquë quëmaso yaꞌhuëaran. Marë Pancaiꞌ naniconinquë paꞌnaonta naporini, inaquënta inchinan imira quëran sëꞌquëatë quëparëso pochin co aꞌpoitoncohuëꞌ.

¹¹ “Tashinanquë naꞌpichi nipachin,” tënahuënta naporini, co ina tëranta catahuaitoncohuëꞌ.

¹² Tashinanquë tëranta co naꞌpichitënquënhuëꞌ. Quëma marësoꞌ tashintaꞌ, tahuëri pochin aꞌpiánahuanin.

¹³ Yaꞌipi nonëhuëquë yaꞌhuërinsopita quëmari acoran. Quëma nohuanton mamahuë yoꞌnamënquë piyapi taranahuë.

¹⁴ Nani maꞌsha ninansopita paꞌyapiro niꞌton, chinotaranquën. “¡Maꞌpitacha Siniorosoꞌ acorin paya,” tënahuë!

¹⁵ Yoꞌnanquë nonëhuë aꞌshininsoꞌ, yaꞌipi niꞌnan. Noꞌpaꞌ acoporoquë aꞌshinatë pochin nipirahuëꞌ, quëmaso niꞌnanco.

¹⁶ Yoꞌnanquë nonëhuë aꞌshinasoꞌ, yaꞌipi niꞌnan. Onpo tahuërisona nanpicaꞌhuasontaꞌ, quëma acotëranco. Coꞌhuara nasichátërapohuëꞌ, quiricanënquë inapita ninshitëran.

¹⁷ ¡Manápocha quëmasoꞌ Sinioro yonquiran paya! Inapita pichirahuë naporini, co onporonta yaꞌipi pichiitohuëꞌ.

¹⁸ Inapita pichicasoꞌ nohuantërahuë naporini, inotëroꞌmo quëran naꞌcon naꞌcon naꞌaitonhuëꞌ. Pichirápirahuë tërantaꞌ, huëꞌënanpiitohuëꞌ. Capayataantahuatontaꞌ, quëmarëꞌco chachin niantaꞌitohuëꞌ.

¹⁹ ¡Sinioro, inpioroꞌsa ataꞌhuantëquë huachi! Tëpatoroꞌsanta acopitëquëꞌ, co yaniꞌnahuëꞌ.

²⁰ Pinorinënquënsopita, topinan quëran chinitërënënquënsopita, inapitanta acopitëquëꞌ.

²¹ Co quëꞌyarinënquënsopitahuësoꞌ, ¡carinta co quëꞌyarahuëꞌ! Noꞌhuirinënquënsopitantaꞌ, co noyahuëꞌ niꞌnahuë.

²² Yaꞌipi cancanëhuë quëran noꞌhuirahuë. Inimicoroꞌsa pochin niꞌnahuë.

²³ Cancanëhuë Sinioro nicaton tantiaquëꞌ. Tënitonco yonquirahuësonta nitotëquëꞌ.

²⁴ Co noyahuëꞌ nisarahuë nipachinsoꞌ, nanpirin iraquë chachin ahuaniantaco.