Salmos 137 - Chayahuita (Shahui)

Papironia iroꞌsa yonsanquë sëtopisoꞌ

¹ Papironia iroꞌsa yonsanquë huënsëatoi naꞌnërai. Quirosarin naꞌhuanatoi naporai.

² Ninanoquë aramo nararoꞌsa yaꞌhuërin. Ina sëꞌparoꞌsaquë arparoꞌsa pëꞌtënai.

³ Canatonacoi quëparinacoisopitasoꞌ: “Quirosarinquë cantayantëramasoꞌ, acoco nataꞌinquëmaꞌ,” itërinacoi. Yaꞌipi maꞌshanëhuëi osërëtaponaracoihuëꞌ: “Capa cancantatoma Yosë cantanën acocoꞌ,” itërinacoi.

⁴ Napotopirinacoihuëꞌ nisharoꞌsa yaꞌhuëpiquësoꞌ, ¡co onporontaꞌ Sinioro cantanën cantaꞌhuaiso yaꞌhuërinhuëꞌ!

⁵ Quirosarinsoꞌ, co onporonta naniantarahuëꞌ. Naniantohuatosoꞌ, inchinan imirahuë chachin tachichin.

⁶ Nënërahuënta piracotëquë chinpiaton tachichin. Quirosarináchin yonquiato tëhuënchinsoꞌ, noya cancanchi.

⁷ Quirosarin ninano canahuachinara, itomoroꞌsa capa cancantopi: “¡Ohuatocoꞌ! ¡Pairanën paquëëmarinquë huarëꞌ inapotocoꞌ!” topi. Napopisoꞌ yonquiaton Sinioro inapitanta anaꞌintëquëꞌ.

⁸ Canpitanta papironiaroꞌsaꞌ, ataꞌhuantaponëmaꞌ. Napotëramacoiso marëꞌ insosona nanirinso chachin anaꞌintohuachinquëmaꞌ, tëhuënchachin capa cancanchin.

⁹ Quëmapiaꞌhuanëmapita natëtëquë huihuiraꞌpiaponaꞌ. Insosona inaponaꞌpi, tëhuënchachin capa cancanchin.