Salmos 130 - Chayahuita (Shahui)

Yosë naꞌcon naꞌcon nohuantërinsoꞌ

^1-2 Paꞌpi napion cancantato nontaranquën Sinioro. Natanatonco catahuaco. Nosorochináchin nontarainquën niꞌton, catahuaco.

³ Quiyasoꞌ piyapicoi oshahuanpiraihuëꞌ, nontarainquën. Co noyahuëꞌ ninaisoꞌ yonquiráran naporini, co onporonta noya niꞌitoncoihuëꞌ.

⁴ Nipirinhuëꞌ oshanëhuëi inquitërancoi niꞌton, noya nicatëinquën chinotarainquën.

⁵ Yaꞌipi cancanëhuë quëran catahuaancoso ninaranquën. Nani shaꞌhuitëranco niꞌton, “co nonpintarancohuëꞌ,” tënahuë.

⁶ Aꞌpaitoroꞌsasoꞌ, tahuëricaso paꞌpi ninapi. Inapita quëran naꞌcon naꞌcon cariquënsoꞌ, ninaranquën.

⁷ Yaꞌipi israiroꞌsanpoa Sinioro ninahuaꞌ. Inasoꞌ nosororinpoa niꞌton, noyá nichaꞌësarinpoaꞌ.

⁸ Canpoasoꞌ ina piyapinënpoa niꞌton, yaꞌipi co noyahuëꞌ ninëhuasopita, inquitarinpoaꞌ.