Salmos 126 - Chayahuita (Shahui)

Noya noya yaꞌhuëantacaiso marëꞌ Yosë nontopisoꞌ

^1-2 Nisharoꞌsa yaꞌhuëpiquë parisitápirëhuahuëꞌ, Sinioro nohuanton yaꞌhuërëhuaquë chachin yaꞌhuëantarëhua huachi. Inaporëhuasoꞌ, huaꞌnarëso pochin cancantopirëhuahuëꞌ, noꞌtëquën niꞌton, capa cancantatëhua huinarëhuaꞌ. Naporahuatëhuaꞌ, nonca noncáchararëhuaꞌ. Nisha nisha piyapiroꞌsantaꞌ: “¡Ma noyacha Siniorori catahuarin paya!” topi.

³ Tëhuënchachin Siniorosoꞌ panca catahuarinpoaꞌ. Ina yonquiatëhua capa cancantërëhuaꞌ.

⁴ Iporantaꞌ, Sinioro noya catahuaantacoi. Niquipi inotëroquë co manta paporinhuëꞌ. Oꞌnanpachina napoaponahuëꞌ, noya papoantarin. Inapochachin quëmanta nicaton, catahuacoi noya yaꞌhuëantaꞌi.

⁵ Parisitatoi naꞌnërëꞌnachin shaꞌtërai. Napoaponahuëꞌ, shaꞌtëraisoꞌ nanitohuachina, capa cancantatoi masarai.

⁶ Shaꞌtamarëꞌ yaꞌpirin quëpatëhua naꞌnëpirëhuahuëꞌ, capa cancantatëhua cantarëꞌnachin huënantarihuaꞌ. Trico tonporoꞌsa ipo ipotahuatëhuaꞌ, huënantarihuaꞌ.