Salmos 124 - Chayahuita (Shahui)

Inimicoroꞌsa quëran nichaꞌërin niꞌton, “Yosparinquën,” taꞌtonaꞌ, cantapisoꞌ

Isonta canta Tapiri ocoirin

^1-2 Yosë tëhuënchachin catahuarinpoaꞌ. Co catahuarinpoahuë naporini, inimiconënpoapita nani minsëitonpoahuëꞌ. Inachachin yaꞌipi israiroꞌsanpoa shaꞌhuiahuaꞌ. Inimicoroꞌsa ahuëinënpoaso marëꞌ huëꞌpirinahuëꞌ, Sinioro catahuarinpoaꞌ.

³ Coꞌsoꞌ ina catahuarinpoahuë naporini, yaꞌipi miꞌtërëso pochin nani nichitënënpoahuëꞌ. Chiníquën noꞌhuitënënpoaꞌ, napochitënënpoahuëꞌ.

⁴ Pamari maꞌsha quiquirinso pochin nani ataꞌhuanchitënënpoahuëꞌ.

⁵ Pacon paquiirinso pochin nichitënënpoahuëꞌ.

⁶ Tanan niꞌniri maꞌsha nasharirinso pochin co oshataꞌitënënpoahuëꞌ.

⁷ Huënson acohuatëra, anpiantëhuanoꞌsa manëꞌ. Ohuëtëhuachinaso nipirinhuëꞌ, chaꞌërin. Inapochachin inimicoroꞌsa maꞌsha yaonpotopirinënpoahuëꞌ, chaꞌërëhuaꞌ.

⁸ Sinioroáchin tëhuëchinsoꞌ catahuarinpoaꞌ. Inasoꞌ, piꞌiroꞌtë acorahuaton, isoroꞌpanta acorin.