Salmos 122 - Chayahuita (Shahui)

Quirosarin yonquiatona cantapisoꞌ

¹ “Sinioro chinotacaso pëiquë paꞌahuaꞌ,” itohuachinacora, inapitaroꞌco capa cancantërahuë.

² ¡Ma noyacha Quirosarinso paya! Yaꞌcoananënpitataquëchin yaꞌconatëhuaꞌ, capa cancantërëhuaꞌ.

³ Iso ninanosoꞌ, Yosë chinotacaso marëꞌ ocoipi. Napoaton isëquësoꞌ, noya ninicatëhua yaꞌhuëaꞌahuaꞌ.

⁴ Isëquë chachin Sinioro huëntonënpita huëꞌpi. “Yosparinquën Sinioro,” itacaiso marëꞌ huëꞌpi. Israiroꞌsanpoa ina pochin camairinpoa niꞌton, naporëhuaꞌ.

⁵ Isëquë coisëroꞌsa sacatopi. Tapi quëran pipipisopita copirnoroꞌsantaꞌ, isëquë huaꞌanëntopi.

⁶ Quirosarinquë sano yaꞌhuëcaiso marëꞌ Yosë nontocoꞌ. Quirosarin paꞌyatërëhuasopitasoꞌ, noya yaꞌhuëaꞌahuaꞌ.

⁷ Iso ninano pairapipisoanaquë, sano niꞌtonaꞌ, yaꞌhuëꞌinaꞌ. Huaꞌanoꞌsa sacatopiquë sano niꞌtonaꞌ, sacachinaꞌ.

⁸ Quëmopinëhuëpita inaquë yaꞌhuëpi. Amiconëhuëpitantaꞌ, inaquë yaꞌhuëpi. Inapita yonquiato: “Inaquë sano niꞌtona yaꞌhuëꞌinaꞌ,” tënahuë.

⁹ Sinioro chinotërëhuaso pëiꞌ, inaquë yaꞌhuërin. Napoaton inaquë noya yaꞌhuëcaisoꞌ, naꞌcon nohuantarahuë.