Salmos 121 - Chayahuita (Shahui)

Sinioro paꞌpoyarinpoasoꞌ

¹ Motopiroꞌsa nëꞌpërahuato naporahuë: “¿Incha iporasoꞌ catahuaincoso marëꞌ huëꞌnëpoya?” tënahuë.

² Sinioro chachin catahuaincoso marëꞌ huëꞌsarin. Inasoꞌ piꞌiroꞌtë acorahuaton, isoroꞌpanta acorin.

³ Ina aꞌpaiarinpoa niꞌton, co toꞌcoitarihuahuëꞌ. Paꞌpoyainpoaso marëꞌ co piꞌpian tëranta huëꞌëponhuëꞌ.

⁴ Inasoꞌ, co nito huëꞌërinhuëꞌ. Israiroꞌsanpoa paꞌpoyainpoaso marëꞌ co onporonta huëꞌëponhuëꞌ.

⁵ Sinioro canpoasoꞌ aꞌpaiarinpoaꞌ. Ina chachin paꞌpoyararinpoaꞌ. Catahuainpoaso marëꞌ canpoa pirayan nisarin.

⁶ Tahuërintaꞌ, co piꞌi acoarinpoahuëꞌ. Yoquintaꞌ, co manta onpotarinpoahuëꞌ.

⁷ Nani maꞌsha huëhuëpiro quëran Sinioro paꞌpoyararinpoaꞌ. Inapotarinpoa niꞌton, noya nanpiarihuaꞌ.

⁸ Intohuasona paꞌnëhuaquë, Sinioro paꞌpoyararinpoaꞌ. Co onporonta naniantarinpoahuëꞌ.