Salmos 119 - Chayahuita (Shahui)

^1-96 (-)

¡Ma noyacha Yosë nanamënso paya!

⁹⁷ ¡Quëma aꞌchinanso Sinioro, paꞌpi nosororahuë! ¡Yaꞌipi tahuëri ina yonquirárahuë!

⁹⁸ Camaitëransopita huaꞌanëntomiatërahuë. Inapita catahuarinco niꞌton, inimiconëhuëpita quëran yonqui yonquínahuan ninahuë.

⁹⁹ Aꞌchintërinacosopita quëran naꞌcon naꞌcon nitotërahuë ninatanahuë. Camaitëransopita naꞌcon yonquirápato naporahuë.

¹⁰⁰ Yonquínahuan mashoroꞌsa quëran naꞌcon naꞌcon nitotërahuë ninatanahuë. Nanamën natëto naporahuë.

¹⁰¹ Nanamën natëcaꞌhuaso marëꞌ co noyahuëꞌ ninahuësopita aꞌporahuë.

¹⁰² Quëmachachin aꞌchintaranco niꞌton, shaꞌhuiransopita co naniantarahuëꞌ.

¹⁰³ Ninoiꞌ cashi cashin irorëꞌ. Quëma nanamënso nipirinhuëꞌ, ina quëran cashi cashin pochin natanahuë.

¹⁰⁴ Quëma nanamën cancantato, yonquínahuan quëparitërahuë. Napoaton nonpintëroꞌsa co quëꞌyarahuëꞌ.

¹⁰⁵ Tashi noya pacacaso marëꞌ nanparin aꞌpininquë noya paꞌnëꞌ. Inapochachin quëma nanamënsoꞌ, noꞌtëquën yonquicaꞌhuaso anitotërinco.

¹⁰⁶ Noya nicaꞌhuaiso marëꞌ shaꞌhuiransopita natëarahuë. “Yoscoarëꞌ natëarahuë,” tënahuë niꞌton, napoarahuë.

¹⁰⁷ Paꞌpi napion cancantarahuë Sinioro. Nani shaꞌhuitëranco catahuancoso niꞌton, ananpitatë pochin nitoco.

¹⁰⁸ “Yosparinquën Sinioro,” taꞌto chinotaranquën. Ina natanaton, noya cancantëquëꞌ. Naporahuaton shaꞌhuiransopita aꞌchintoco.

¹⁰⁹ Tëpachináchin nitárinaco. Napoaporahuëꞌ, co quëma aꞌchinansopita naniantërahuëꞌ.

¹¹⁰ Co noyahuëꞌ nipisopita pëcotanquë maꞌsha manëso pochin yanitërinaco. Napoaporahuëꞌ, co quëma nanamën naniantërahuëꞌ.

¹¹¹ Camaitëransopita quëtëranco niꞌton, huaꞌanëntomiatarahuë. Inapita acapacancaninco niꞌton, napoarahuë.

¹¹² Yaꞌipi cancanëhuë quëran huarëꞌ quëma pënëntëransoꞌ natëcaꞌhuasoꞌ nohuantërahuë. Chiminaquë huarëꞌ ina natëarahuë.

^113-128 (-)

¹²⁹ Camaitëransopitasoꞌ, paꞌpi paꞌyapiroꞌ. Napoaton caso inapita natërahuë.

¹³⁰ Quëma nanamën natanpatora, aꞌpintërëso pochin catahuarinco. Apinapichin yonquipisopitantaꞌ, ina natanpachina, yonquínanhuan quëparitapi.

¹³¹ Camaitëransopita paꞌpi nohuantërahuë. Ina marëꞌ co napion ancantato nontëranquën.

¹³² Nosororinënquënsopitasoꞌ, noya nicaton nosororan. Ina pochin cantaꞌ, noya nicatonco nosoroco.

¹³³ Nani shaꞌhuitëranco catahuaancosoꞌ. Ama co noyahuëꞌ cancantërahuëso canaincosohuëꞌ.

¹³⁴ Piyapiꞌsa maꞌsha yaonpotërinaco. Nichaꞌëco ama maꞌsha onpochinacosohuëꞌ. Quëma nanamën noꞌtëquën yanatërahuë.

¹³⁵ Caso piyapinënco. Noya nicatonco pënëntëransopita aꞌchintoco.

¹³⁶ Quëma aꞌchinansopita co piyapiꞌsa natëpihuëꞌ. Ina marëꞌ sëtato naꞌnërárahuë.

¹³⁷ Quëmasoꞌ, noya coisë pochinquën. Shaꞌhuiransopitanta noꞌtëquënáchin shaꞌhuiran.

¹³⁸ Yaꞌipi camaitëransopitantaꞌ, noyasáchin camaitëran. Noꞌtëquënáchin shaꞌhuitërancoi.

¹³⁹ Quëma nanamën Sinioro aꞌpitato co napion ancantërahuë. Inimiconëhuëpitasoꞌ, ina naniantopi niꞌton, ina pochin cancantërahuë.

¹⁴⁰ Quëma shaꞌhuitërancoisopitaso sacai nanicaso nipirinhuëꞌ, quëma nohuanton nanirin. Napoaton quëma nanamënsoꞌ, paꞌpi nosororahuë.

¹⁴¹ Caso, co máquëncohuë niꞌton, nocaninaco. Napoaporahuëꞌ, quëma nanamënso co naniantarahuëꞌ.

¹⁴² Quëmasoꞌ noya coisë pochinquën, noꞌtëquënáchin shaꞌhuiran. Aꞌchinansopitantaꞌ, noꞌtëquënáchin aꞌchinan.

¹⁴³ Naꞌaro maꞌsha onpoato co napion ancantërahuë. Napoaporahuë quëma camaitëransopita yonquiato noya cancantërahuë.

¹⁴⁴ Camaitëransopitasoꞌ, noꞌtëquënáchin camaitëran. Catahuaco yonquínahuan nicato yaꞌhuëꞌi.

^145-176 (-)