Salmos 118 - Chayahuita (Shahui)

Yosë chini chiníquën nanantaton paꞌyapiro acorinsoꞌ

¹ Siniorosoꞌ nosoromiatërinpoaꞌ. Inasoꞌ nóya niꞌton, “Yosparinquën,” itahuaꞌ.

² Yaꞌipi israiroꞌsanpoaꞌ: “Siniorosoꞌ nosoromiatërinpoaꞌ,” itahuaꞌ.

³ Corto huaꞌanoꞌsantaꞌ: “Siniorosoꞌ nosoromiatërinpoaꞌ,” chinaꞌ.

⁴ Noya nicatona natëpisopitarintaꞌ: “Siniorosoꞌ nosoromiatërinpoaꞌ,” chinaꞌ.

⁵ Co napion ancantato Sinioro nontërahuë. Ina quëran natanahuatonco nichaꞌërinco.

⁶ ¡Sinioro catahuararinco niꞌton, co tëꞌhuatarahuëꞌ! Co piyapiꞌsa maꞌsha onpotiincoso yaꞌhuërinhuëꞌ.

⁷ ¡Sinioro catahuararinco niꞌton, noꞌhuirinacosopita minsëarahuë!

⁸ Piyapiꞌsa catahuainpoasoꞌ, co aquëtë ninacaso yaꞌhuërinhuëꞌ. Sinioro catahuainpoaso ninahuatëhuaꞌ, noya noya nisarëhuaꞌ.

⁹ Huaꞌanoꞌsanta nanitërin catahuainpoasoꞌ. Sinioro catahuainpoaso ninahuatëhuaꞌ, noya noya nisarëhuaꞌ.

¹⁰ Yaꞌipi nacionoꞌsaquë yaꞌhuëpisopita tancapitërinaco. Napopirinahuëꞌ, Sinioro nanan quëtërinco niꞌton, inapita minsëarahuë.

¹¹ Yaꞌipi parti quëran tancapitërinaco. Napoaponahuëꞌ, Sinioro nanan quëtërinco niꞌton, minsëarahuë.

¹² Cancan pochin yamotopirinacohuëꞌ, nahuan huëyarapirinhuëꞌ tacopirinso pochin noꞌhuitopisoꞌ sano sanoapi. Sinioro chachin nanan quëtërinco niꞌton, inapita minsërahuë.

¹³ Atatinacoso marëꞌ chiníquën pitarëso pochin nitërinaco. Napotopirinacohuëꞌ, Sinioro oꞌmarahuaton catahuarinco.

¹⁴ Ina achinirinco niꞌton, cantanën cantato chinotarahuë. Insáchin nichaꞌërinco.

¹⁵ Sinioro imamiatopisopita pëinënaquësoꞌ, capa cancantatonaꞌ, cantarapi. Sinioro nohuanton Inimicoroꞌsa canapi niꞌton, napopi.

¹⁶ ¡Sinioro chiníquën nanantërinsosoꞌ, paꞌyapiro! ¡Inasoꞌ chiníquën nanantaton, inimicoroꞌsa minsërin!

¹⁷ ¡Co chiminarahuëꞌ! Yosë catahuararinco. Sinioro naporinso shaꞌhuicaꞌhuaso marëꞌ nanpiarahuë.

¹⁸ Sinioro chiníquën anaꞌintopirincohuëꞌ, co chimirinquë aꞌparincohuëꞌ.

¹⁹ Sinioro chinotacaso pëiꞌ iꞌsoatocoꞌ. Yaꞌconato, “Yosparinquën Sinioro,” ichi.

²⁰ Ina mini Sinioro yaꞌcoananën. Imamiatopisopita inaëchin yaꞌconaponaꞌ.

²¹ Nontëranquënsoꞌ aꞌpaniranco niꞌton, “Yosparinquën Sinioro,” itaranquën. Nichaꞌërancoso marëntaꞌ, “Yosparinquën,” itaranquën.

²² Pëinaꞌpiroꞌsa naꞌpi nocanatona tëꞌyatopi. Tëꞌyatopirinahuëꞌ, huaꞌanëni maantarahuaton, noya noya naꞌpi pochin acoantarin.

²³ Sinioro chachin ina pochin ninin. Ina yonquiatëhuaꞌ: “¡Maꞌpitacha nitotërin paya!” tënëhuaꞌ.

²⁴ Iso mini tahuëri Siniorori acorinsoꞌ. Ina tahuëri nanirin niꞌton, capa cancantahuaꞌ.

²⁵ ¡Onpopionta Sinioro nichaꞌëcoi! ¡Onpopionta catahuacoi noya noya yaꞌhuëantaꞌi!

²⁶ Sinioro chachin aꞌnara aꞌpaimarin huaꞌanëntiinpoaso marëꞌ. ¡Ma noyacha inasoꞌ oꞌmaton huaꞌanëntarinpoa paya! Yosë chinotacaso pëi quëran noya yaꞌhuëcamaso marëꞌ shaꞌhuitarinquëmaꞌ.

²⁷ Siniorosoꞌ Yosë niꞌton, aꞌpintatë pochin nitarinpoaꞌ. Artaro pomonënpitaquë ina marëꞌ tëpacaiso maꞌsharoꞌsa aꞌsoncoꞌ.

²⁸ Quëmasoꞌ Sinioro chini chiníquën nanantëran. “¡Ma noyanquëncha ninan paya!” taꞌto chinotaranquën.

²⁹ Tëhuënchachin Siniorosoꞌ nóya niꞌton, nosoromiatërinpoaꞌ. Ina marëꞌ canpitantaꞌ: “Yosparinquën,” itoco Yosë.