Salmos 116 - Chayahuita (Shahui)

“Yosparinquën Sinioro,” taꞌton chinotërinsoꞌ

¹ Co napion ancantato nontërahuësoꞌ, Sinioro natanatonco catahuarinco. Napoaton carintaꞌ, ina nosoroato paꞌyatërahuë.

² Nosoroatonco aꞌpanirinco niꞌton, chiminaquë huarëꞌ ina chinotápo.

³ Iꞌhua iquitato, “chiminapo,” topirahuë. Naporoꞌ paꞌpi tëꞌhuato, co napion ancantërahuë.

⁴ Naporoꞌ Sinioro nontërahuë: “Nichaꞌëco Sinioro, ama chimiinsohuëꞌ,” itërahuë.

⁵ Siniorosoꞌ nosorotochináchin cancantërin. Noya coisë pochin paꞌpoyatërin. Noyápiachin cancantërin.

⁶ Siniorosoꞌ saꞌahuaroꞌsa aꞌpairin. Coꞌchachin nicasoco nichaꞌërinco.

⁷ Sinioro nosoroatonco catahuarinco niꞌton, sano cancantaantarahuë.

⁸ Toꞌcoitërëso pochin nicato naꞌnërápirahuëꞌ, nichaꞌërinco. Chimirin quëran nichaꞌërinco niꞌton,

⁹ Sinioroíchin isoroꞌpaquë natëarahuë huachi.

¹⁰ Parisitaporahuëꞌ: “Sinioro nichaꞌësarinco niꞌton, shaꞌhuiarahuë,” tënahuë.

¹¹ Napoaporahuëꞌ, parisitápato naporahuë: “Yaꞌipi piyapinpoa nonpinëhuaꞌ,” tënahuë.

¹² Iporaso naporahuë: “¿Onporahuatocha yaꞌipi Sinioro catahuarincoso marëꞌ iꞌhuërëchi nicaya?” tënahuë yonquiato.

¹³ Nichaꞌërancosoꞌ yonquiato, “Yosparinquën Sinioro” itaranquën. Quëmasáchin imatënquën nani tahuëri nontáponquën.

¹⁴ Maꞌpitaso quëtaꞌhuanquënso shaꞌhuitëranquënsopita ananiarahuë. Yaꞌipi piyapinënpita niꞌtonënquë napoarahuë.

¹⁵ Sinioro nosororëhuasopita yachiminpatëhuaꞌ, inaso co noyahuëꞌ cancantërin.

¹⁶ Caso Sinioro, piyapinënco. Mamahuëntaꞌ, piyapinën chachin. Nisha nisha maꞌsha onpoato chiminchináchin nipirahuëꞌ, nichaꞌëranco.

¹⁷ Ina marëꞌ “Yosparinquën,” itatënquën maꞌsha tëparahuato chinotaranquën. Naporahuaton nani tahuëri chinotaranquën.

¹⁸ Maꞌpitaso quëtaꞌhuanquënso shaꞌhuitëranquënsopita ananiarahuë. Yaꞌipi piyapinënpita niꞌtonënquë ananiarahuë.

¹⁹ Sinioro chinotacaso pëi iꞌiratëquë napoarahuë. Quirosarin ninanoquë chachin napoarahuë. ¡Ma noyacha Sinioroso paya! itarahuë.