Salmos 115 - Chayahuita (Shahui)

Yosëíchin chinotacaso yaꞌhuërinsoꞌ

¹ Quëmasáchin noya noyanquën niꞌton, paꞌyachinën. Nosoromiatatoncoi catahuarancoi. Napoaton co quiyasoꞌ paꞌyatiinacoiso yaꞌhuërinhuëꞌ.

² Inpioroꞌsasoꞌ, tëhuatona nataninacoi: “¿Insëquëta ipora Yosënëmasoꞌ?” itërinacoi.

³ Yosënëhuëisoꞌ, inápaquë yaꞌhuëarin. Inaora nohuanton maꞌsona nohuantërinsoꞌ ninin.

⁴ Inpioroꞌsasoꞌ, oro quëran mamanshiroꞌsa nipi. Prata quëraonta nipi. Inaora imirina quëran nicatonaꞌ, moshapi.

⁵ Inapitasoꞌ nanamëna yaꞌhuëtaponaraihuëꞌ, co nanitopihuëꞌ nonacaisoꞌ. Yaꞌpirahuanponaraihuëꞌ, co nanitopihuëꞌ quënantacaisoꞌ.

⁶ Huëratëhuanaponaraihuëꞌ, co natantopihuëꞌ. Nitëhuanaponaraihuëꞌ, co nanitopihuëꞌ imëtacaisoꞌ.

⁷ Imirahuanaponaraihuëꞌ, co nanitopihuëꞌ sëꞌquëtacaisoꞌ. Nantëhuanaponaraihuëꞌ, co nanitopihuëꞌ iratacaisoꞌ. Co conopiranëna tëranta irininhuëꞌ.

⁸ Ina ninaꞌpiroꞌsantaꞌ, mamanshiroꞌsa pochin niconpi. Ina moshapisopitantaꞌ, inapita pochachin niconpi.

⁹ Israiroꞌsanpoasoꞌ, Sinioroíchin chinotahuaꞌ. Inasoꞌ, catahuatonpoa paꞌpoyarinpoaꞌ.

¹⁰ Corto huaꞌanoꞌsanquëmaꞌ, Sinioroíchin chinotocoꞌ. Inasoꞌ, catahuatonpoa paꞌpoyarinpoaꞌ.

¹¹ Sinioro noya nicatoma natëramasopitantaꞌ, inaíchin chinotocoꞌ. Inasoꞌ, catahuatonpoa paꞌpoyarinpoaꞌ.

¹² Sinioroso yonquiantarinpoa niꞌton, catahuamiatarinpoaꞌ. Yaꞌipi israiroꞌsa catahuararin. Corto huaꞌanoꞌsanta napotarin.

¹³ Ina noya nicatona natëpisopitantaꞌ, catahuararin. Huaꞌanoꞌsaꞌ, topinan piyapiꞌsaꞌ, inapitanta imapachinaꞌ, catahuararin.

¹⁴ Sinioro chachin catahuainquëma naꞌcon naꞌcon huiꞌnahuancoꞌ. Huiꞌnamapitanta inapochin.

¹⁵ Siniorosoꞌ piꞌiroꞌtë, isoroꞌpaꞌ, inapita acorin. Ina chachin canpitanta catahuainquëmaꞌ.

¹⁶ Siniorosoꞌ, piꞌiroꞌtë huaꞌanëntërin. Isoroꞌpaso nipirinhuëꞌ, piyapinpoa ahuaꞌanëntërinpoaꞌ.

¹⁷ Chiminpisopitasoꞌ, tanahuantápiquë paꞌpi. Inaquë paꞌsahuatonaꞌ, co huachi nanitopihuëꞌ Yosë paꞌyatacaisoꞌ.

¹⁸ Canpoaso nipirinhuëꞌ ipora quëran huarëꞌ “Yosparinquën Sinioro,” tosáparihuaꞌ. Naporahuaton: “¡Ma noyacha Yosëso paya!” itahuaꞌ.