Salmos 110 - Chayahuita (Shahui)

Siniorori copirno chiníquën nanan quëtërinsoꞌ

Isonta canta, Tapiri ocoirin

¹ Yosëri Sinioronëhuë shaꞌhuitërin: “Inchinanëhuë quëran huënsëquëꞌ. Inimiconënpita carinquën minsëchinquën,” itërin.

² Ina napotërinquën niꞌton, catahuainquën. Inimiconënpita minsëraꞌpiaquëꞌ. Nani Quirosarinquë huaꞌanëntacaso marëꞌ acorinquën.

³ Copirno yaꞌconanso tahuëri chachin, piyapinënpita noyá nitaparahuatonaꞌ, paꞌyataponën. Natëmiatinënquënso marëntaꞌ, shaꞌhuitaponën. Poroncayo nani tashi shipihuaninso pochin huiꞌnapitëransonta ina chachin nisápon.

⁴ Yosë chachin nani shaꞌhuitërinquën: “Caso Yosëco niꞌto, noꞌtëquën shaꞌhuitaranquën: Quëmasoꞌ noya noya corto huaꞌan acoaranquën. Miriquiso pochin nisaran. Co onporonta pipiaranhuëꞌ,” itërinquën.

⁵ Yosëso inchinanën quëran yaꞌhuëarin. Anaꞌintacaso tahuëri nanihuachin, copirnoroꞌsa ataꞌhuantapon.

⁶ Nacionoꞌsa ayontonahuaton coisë pochin nisarin. Notohuaroꞌ piyapiꞌsa tiquiarin. Itohua itohua inimicoroꞌsa paꞌpamotoraꞌpiapon.

⁷ Huëcapon pochin iꞌshanaquë iꞌsha oꞌosarin. Ina oꞌoton chiníquën cancantiintapon.