Salmos 107 - Chayahuita (Shahui)

Sinioro piyapi nosoroaton yacatahuarinsoꞌ

¹ Siniorosoꞌ nóya. Naporahuaton nosoromiatërinpoaꞌ. Napoaton, “Yosparinquën,” itahuaꞌ.

² Inimicoroꞌsa quëran Sinioro nichaꞌërinpoasopita, napoaꞌahuaꞌ.

³ Nisha nisha noꞌparoꞌsa quëran ayontoantarinpoaꞌ. Norti quëran, sor quëran, piꞌi pipirin parti quëran, yaꞌconinso parti quëran, yaꞌipi inaquëranpita ayontoninpoaꞌ.

⁴ Aꞌnaquënsoꞌ, inotëro parti chihuëatonaꞌ, paꞌsápirinahuëꞌ, co aꞌna ninano tëranta yaꞌhuëcaiso marëꞌ quënanpihuëꞌ.

⁵ Tanatona co huachi chinipihuëꞌ. Yamorotonaꞌ, yachiminpi huachi.

⁶ Napohuachinara, co napion cancantatonaꞌ, Yosë nontopi. Naporoꞌ inari nichaꞌërin.

⁷ Ina nohuanton noya ira quënanpi. Ninanoquë pipitona noya yaꞌhuëpi huachi.

⁸ Sinioroso nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

⁹ Paꞌpi yamorotohuatëhuara, ina chachin inquitërinpoaꞌ. Paꞌpi tanahuatëhuarantaꞌ, napotërinpoaꞌ.

^10-11 Aꞌnaquëonta co noyahuëꞌ nicatonaꞌ, tashinanquë tëꞌyatopiso pochin chiníquën parisitopi. Inapoatonaꞌ, chiminchináchin nipi. Sinioro camaitërinso co natëtonaraihuëꞌ, napopi. Ina nohuantërinsoꞌ nitotaponaraihuëꞌ nocanpi. Ina marëꞌ catinaquëtopinan parisitopi. Inapoatonaꞌ, paꞌpi sëtopi.

¹² Sinioro nohuanton chiníquën sacato tëꞌyanantopi. Iꞌpatona anotohuachinarantaꞌ, co macari catahuarinhuëꞌ.

¹³ Napohuachinara, co napion cancantatonaꞌ, Yosë nontopi. Naporoꞌ inari nichaꞌërin.

¹⁴ Tashinanquë tëꞌyatatë pochin nitopirinahuëꞌ, ina quëran ocoirin. Catinaroꞌsantaꞌ, oshitëraꞌpiaton nichaꞌërin.

¹⁵ Siniorosoꞌ nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

¹⁶ Yaꞌcoanaroꞌsa shaꞌpi huaꞌna quëran nipirinhuëꞌ, paꞌquiraꞌpiarin. Huaꞌnananoꞌsanta huaꞌnamia quëran nipirinhuëꞌ, inapotëraꞌpiarin.

¹⁷ Aꞌnaquën nipaꞌyatacaisoráchin cancantatonaꞌ, aꞌnaratipita nipi. Co noyahuëꞌ nisápatonaꞌ, caniopi huachi.

¹⁸ Coꞌchachin nicatona aꞌpocosharotopi. Napoatona tapinanpitërapi.

¹⁹ Napohuachinara, co napion cancantatonaꞌ, Yosë nontopi. Naporoꞌ inari nichaꞌërin.

²⁰ Ina nohuanton noyatopi. Poꞌoroquë pacacaiso nipirinhuëꞌ, chaꞌëpi.

²¹ Siniorosoꞌ nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

²² “Ma noyacha Siniorosoꞌ nosororinpoa paya,” taꞌtëhua ina chinotahuaꞌ. Noya ancantatëhuaꞌ, nani maꞌsha naporinso shaꞌhuiahuaꞌ.

²³ Aꞌnaquëntaꞌ, nanchaquë marë paꞌtopi. Maꞌsha quëpatona paꞌanacaiso marëꞌ napopi.

²⁴ Inaquë Sinioro huëhuëpiro nininsopita aꞌnorinso niꞌpi.

²⁵ Inari camaihuachina, panca ihuan paꞌsarin. Inapohuachina panca coꞌsacaitërin.

²⁶ Inari piꞌiroꞌtë parti nancha anëꞌpëtërin. Inapotahuaton aꞌpamaantarin. Napohuachina, co huachi nanpichináchinhuëꞌ cancantopi.

²⁷ Napoatonaꞌ, noꞌpirahuëroꞌsa pochin pisancaroconpi. Nitotonoꞌsa nipirinahuëꞌ, co huachi manta nanitopihuëꞌ.

²⁸ Napohuachinara, co napion cancantatona Yosë nontopi. Naporoꞌ inari nichaꞌërin.

²⁹ Ina nohuanton ihuan copi tënin. Coꞌsacainta asanoirin.

³⁰ Naporinso marëꞌ noya cancantopi. Inapotaton, chinopiso nonshinanquë chachin canconacaisoꞌ, catahuarin.

³¹ Siniorosoꞌ nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

³² Yaꞌipi imarëhuasopita niyontonëhuaquë ina chinotahuaꞌ. Ansianoroꞌsantaꞌ, niyontonpiquë ina paꞌyachinaꞌ.

³³ Inari chachin iroꞌsanta ayaniton, inotëro atarantërin. Iꞌshanaroꞌsa yaꞌhuërinquëntaꞌ, yaniro atarantërin.

³⁴ Noyaroꞌpanta nipirinhuëꞌ, ina nohuanton nitapirin. Yaꞌhuëhuanoꞌsa co noyahuëꞌ nipiso marëꞌ, anaꞌintaton inapotërin.

³⁵ Inotëronta napoaponahuëꞌ, noyaroꞌpaꞌ atarantërin. Naꞌa iꞌsharoꞌsaꞌ, sonoroꞌsaꞌ, inapitari tahuitërin.

³⁶ Tanarotopisopita inaquë acorin. Inapitaso yaꞌhuëatonaꞌ, ninanoroꞌsa ocoipi.

³⁷ Inaquë shaꞌtatonaꞌ, notohuaroꞌ nitërinsonpita mapi. Oparoroꞌsanta yaꞌhuëtopi.

³⁸ Yosëri catahuarin niꞌton, naꞌamiatopi. Pëꞌtahuanënapitantaꞌ, sacóshin anaꞌatopi.

³⁹ Huaꞌqui quëran co noyahuëꞌ nipisopitari atapanin. Chiníquën aparisitatonaꞌ, shitiquipi.

⁴⁰ Yosëriso napoaponahuëꞌ, inapita anaꞌintaton, inotëroroꞌsaquë achihuërin.

⁴¹ Popriyatopisopitasoꞌ nichaꞌërin. Noya nipi niꞌton, noya noya acorin. Huiꞌninapitantaꞌ, notohuaroꞌ yaꞌhuëtopi. Ohuicaroꞌsa pochin naꞌapi.

⁴² Noya nipisopitasoꞌ ina nicatonaꞌ, capa cancantopi. Co noyahuëꞌ nipisopitaso nipirinhuëꞌ, taꞌtopi.

⁴³ Yonquínahuan nipatamasoꞌ, shaꞌhuitaranquëmasopita yonquicoꞌ. Yosë nóya nosororinpoasoꞌ, yonquirácoꞌ.