Salmos 105 - Chayahuita (Shahui)

Israiroꞌsa catahuaton Sinioro nani maꞌsha nininsoꞌ

^1-2 Nisha nisha piyapiꞌsa Sinioro naporinso shaꞌhuitahuaꞌ. “¡Yosparinquën Sinioro,” itatëhuaꞌ, nisha nisha cantanën cantahuaꞌ! Naꞌcon catahuarinpoasoꞌ, shaꞌhuiahuaꞌ.

³ Inasoꞌ, noyasáchin ninin. Ina imarëhua niꞌton, nipaꞌyatahuaꞌ. Yaꞌipi Sinioro chinotërëhuasopita, capa cancantahuaꞌ.

⁴ Siniorosoꞌ chini chiníquën nanantërin niꞌton, inasáchin chinotahuaꞌ. Noya nicainpoaso marëꞌ chiníquën yonquiaꞌahuaꞌ.

⁵ Nani maꞌsha huëhuëpiro nininsopita aꞌnorinsoꞌ, ama naniantahuasohuëꞌ. Aꞌchintatonpoa shaꞌhuitërinpoasontaꞌ, ama naniantahuasohuëꞌ.

⁶ Canpoasoꞌ Apraan, Cacopo, inapita shinpitanpoaꞌ. Sinioro nani huayoninpoa niꞌton, noya natancoꞌ.

⁷ Sinioroso Yosënënpoa niꞌton, ina huaꞌanëntërinpoaꞌ. Inasoꞌ, yaꞌipiroꞌpaꞌ huaꞌanëntërin.

^8-9 Apraan, Isaco, inapitarë nani anoyatërin: “Caso Yosëco niꞌto, catahuaranquëmaꞌ,” itërin. Nani shaꞌhuitaton, co naniantarinhuëꞌ. Huaranca shinpita huënton yaꞌhuëpiriontaꞌ, co naniantarinhuëꞌ.

¹⁰ Cacoposoꞌ, Israiro itopi antaꞌ. Inarë anoyatërinsoꞌ, co onporonta nishataponhuëꞌ.

¹¹ Ina shaꞌhuitaton: “Quëmari iso Canaan noꞌpaꞌ huaꞌanëntaran. Carinquën quëtaranquën niꞌton, napoaran,” itërin.

¹² Yaꞌnan yaꞌhuëaponaꞌ, caraíchin yaꞌhuëpi. Topinan nisharoꞌsa pochin yaꞌhuëpi.

¹³ Aꞌna nacion quëran aꞌna nacionquë paꞌpi. Nisha nisha copirnoroꞌsari huaꞌanëntërinquë paꞌpi.

¹⁴ Insëquë tëranta paꞌpachinara, co Yosë nohuantërinhuëꞌ aꞌnapitari maꞌsha onpotacaisoꞌ. Copirnoroꞌsantaꞌ anaꞌintaton, pënënin:

¹⁵ “Ama huayonahuësopita noꞌhuicosohuëꞌ. Pënëntonaꞌpiroꞌsa acorahuësoꞌ, ama maꞌsha onpotocosohuëꞌ,” itërin.

¹⁶ Yosë nohuanton iráca tanarotopi. Capa, co manta capacaiso yaꞌhuërinhuëꞌ.

¹⁷ Napoaponahuëꞌ, ina nohuanton Cosi quëchitërin. Inasoꞌ, aꞌna huaꞌani camaicaso marëꞌ paꞌanin.

¹⁸ Paꞌhuëquën catinaquëtatonaꞌ, oquërë oquërëtopi. Ina quëran tashinan pëiquënta poꞌmopi.

¹⁹ Sinioro nanamën shaꞌhuirinso marëꞌ piyapiꞌsasoꞌ: “Tëhuënchachin taꞌma naporëꞌpoꞌ,” topirinahuëꞌ, tanarotacaiso naniquë huarëꞌ, natëpi huachi.

²⁰ Copirnori camaihuachina, ocoipi huachi. Inasoꞌ copirno notohuaroꞌ piyapiroꞌsa camairin.

²¹ Ocoirahuaton chiníquën nanan quëtërin. Yaꞌipi huaꞌanëntërinquë camaitacaso marëꞌ acorin.

²² Ansianoroꞌsaꞌ, huaꞌanoꞌsaꞌ, inapita aꞌchintacaso marëꞌ acorin. Aꞌchintohuachina, naꞌcon naꞌcon nitotopi huachi.

²³ Ina quëran Israironta inátohua paꞌmarin. Ina chachin Cacopo itopi antaꞌ. Paꞌmarahuaton nisharoꞌsa pochin Iquipitoquë yacapatërin. Iráca Noi huiꞌnin Camo itopisoꞌ noꞌpaꞌ maninquë yacapatërin.

²⁴ Yosë nohuanton inaquë israiroꞌsanpoa naꞌamiatërëhuaꞌ. Yaꞌhuëhuanoꞌsa quëran, chini chiníquënoꞌsa nicoantarëhuaꞌ.

²⁵ Napoaponahuëꞌ, ina nohuanton chachin iquipitoroꞌsari shimashonënpoapita inimicotopi. Nonpintatonaꞌ, sacatopiso marëꞌ co pahuërëpihuëꞌ. Yosë piyapinënpita nipirinahuëꞌ, inapotopi.

²⁶ Napohuachina piyapinën Moisësë itopisoꞌ aꞌpatërin. Aaronta huayonin niꞌton, inarë paꞌnin.

²⁷ Iquipitoroꞌsa niꞌtonënaquë nisha nisha huëhuëpiro nininsopita aꞌnopi. Camo itopisoꞌ noꞌpaꞌ maninquë inapopi.

²⁸ Yosë nohuanton iquipitoroꞌsa tashiri imotërin. Inapoaponaraihuëꞌ, co yanatëtopihuëꞌ.

²⁹ Iquipitoquë iroꞌsa yaꞌhuërinsoꞌ, huënaiꞌ atarantërin, samiroꞌsa tiquirin, napotërin.

³⁰ Yaꞌhuëpiso noꞌpaꞌ nani chachin huarira anaꞌatërin. Copirno huëꞌërinso patoanaquë huarëꞌ yaꞌconpi.

³¹ Sinioro nonpachina tonca, ico, inapita naꞌamiatopi. Inapitari iquipitoroꞌsa aparisitopi.

³² Oꞌnan pochin ocai aꞌpaimarin. Pënë chachin anotërin.

³³ Oparoroꞌsaꞌ, iquiraroroꞌsaꞌ, inapita paquitërin. Yaꞌipi nararoꞌsa Iquipitoquë yaꞌhuërinsoꞌ, paquitërin.

³⁴ Yosë noantahuachina, sëquërënta canquirin. Paꞌpi notohuaroꞌ niꞌton, co pichinahuanhuëꞌ.

³⁵ Sharoꞌsaꞌ, pacatororoꞌsaꞌ, yaꞌipi inapita pëꞌyarin.

³⁶ Inaquë chachin paninanoꞌsanta tiquirin. Yaꞌipi yaꞌnan huaꞌhuatopisopita napotërin.

³⁷ Inapotaton piyapinënpita Iquipito quëran ocoirin. Inapitasoꞌ orohuanatonaꞌ, pratahuanatonaꞌ, maꞌhuanoꞌsa pipipi. Papona pochin co manta onpopihuëꞌ.

³⁸ Paꞌpisoꞌ nicatona iquipitoroꞌsasoꞌ, nóya cancantopi huachi. Nani maꞌsha onpoatonaꞌ, paꞌpi paꞌyanpirinahuëꞌ.

³⁹ Panca chitoroquë yaꞌcopiatë pochin Yosëri piyapinënpita nitërin. Tashinta aꞌpintacaso marëꞌ ina chitoro chachin pën pochin acorin. Nosha nohuantohuachinara, ocoron pochin nininsoꞌ, huaꞌhuayátërahuë aꞌpatiirin.

⁴⁰ Cosharo inápa quëran oꞌmarinsoꞌ aꞌcaton noyá anatërin.

⁴¹ Natëtënta nipoatahuaton, notohuaroꞌ iꞌsha ocoirin. Inasoꞌ, tëquëin pochin inotëro parti paꞌtërin.

⁴² Piyapinën Apraan itopisoꞌ shaꞌhuitërinso yonquiaton, naporin.

⁴³ Inapochin Yosëri piyapinënpita ocoihuachina, capa cancantatonaꞌ, “nonca, nonca,” charapi.

⁴⁴ Nisha nisha nacionoꞌsari noꞌpaꞌ huaꞌanëntopiso osërëtahuaton, inapita quëtërin. Sacatatona acopisopitantaꞌ, inapotërin.

⁴⁵ Pënëntërinsopita, aꞌchininsopita, inapita noya nicatona natëcaiso marëꞌ napotërin. “¡Ma noyacha Sinioroso paya!” tocoꞌ.