Salmos 104 - Chayahuita (Shahui)

Nani maꞌsha acorinsopita Yosëri noya aꞌpairinsoꞌ

¹ Yaꞌipi cancanëhuë quëran Sinioro chinotarahuë. Tëhuënchachin quëmasoꞌ Sinioro chiníquën nanantëran. Noyápiachin aꞌmoton, huënaráchin huënaráchin yaꞌnoran.

² Quëmasoꞌ noyasáchin nicaton, tahuëri pochin cancantëran. Nëꞌmëtëquë paꞌshintërëso pochin piꞌiroꞌtënta acoran.

³ Marë aipi inápa pëꞌsatëꞌ pëi pochin yaꞌhuëcamaso marëꞌ acoran. Chitorontaꞌ, toronanën pochin quëparinquën. Ihuaontaꞌ, anpiantëhuan pochin nicaton, quëparinquën.

⁴ Ihuanoꞌsanta comisionoꞌsa pochin acoran. Oꞌcoriroꞌsanta piyapinënpita pochin natërinën.

⁵ Simintonënꞌton acorahuaton, isoroꞌpaꞌ noyá acorin. Co onporonta nichiꞌhuincaponhuëꞌ.

⁶ Aꞌmorëhuasoꞌ, nonënpoa imotërinso pochachin marëri naporo yaꞌipiroꞌpaꞌ imotërin. Motopiroꞌsa quëran huarëꞌ imotërin.

⁷ Quëmari shaꞌhuitohuatana, huinquintatë pochin nicaton paꞌmairin. Huira pochin nonansoꞌ natanahuaton, taꞌarin.

⁸ Naporoꞌ motopiroꞌsantaꞌ, moncorointapi. Motopianaroꞌsantaꞌ, paꞌmapi. Insëquësona quëmari shaꞌhuitëranquë nanipi.

⁹ Marënta yaꞌhuëcasoꞌ, acotëran. Co inaquëran pipiton isoroꞌpaꞌ imotaponhuëꞌ.

¹⁰ Quëma nohuanton noꞌpaꞌ quëran iꞌsha pipiton pancaitërin. Paꞌihuachina, motopianaroꞌsataquëchin paꞌipi.

¹¹ Inaquë tanan maꞌsharoꞌsa oꞌopi. Tanan moraroꞌsanta ina oꞌotonaꞌ, yamoro inquipi.

¹² I yonsanquë inairaroꞌsa huaꞌhuatopi. Nararoꞌsaquë huënsëatonaꞌ, përarantapi.

¹³ Yaꞌhuëran quëran huarëꞌ oꞌnan aꞌpaimaton motopiroꞌsa shipirotëran. Isoroꞌpaꞌ yamororëso pochin nisapirinhuëꞌ, ina aꞌpaimahuatana yamororinso inquirinso pochin ninin.

¹⁴ Quëma nohuanton pastoroꞌsa maꞌsharoꞌsa marëꞌ aꞌshinpi. Piyapiꞌsanta shaꞌtopisoꞌ noyatohuachinara, cosharo yaꞌhuëtopi huachi.

¹⁵ Oꞌotona noya ancantacaiso marëꞌ huinonta yaꞌhuëtopi. Yaꞌpirina tapacaiso marëꞌ tomanta yaꞌhuëtopi. Capatona chinicaiso marëꞌ paonta yaꞌhuëtopi.

¹⁶ Oꞌnanpachina nararoꞌsantaꞌ, yamoro inquirinso pochin nipi. Nipano motopiquë nonararoꞌsa Siniorori shaꞌninso napopi.

¹⁷ Inaquë inairaroꞌsa huaꞌhuatopi. Pino nararoꞌsaquëntaꞌ, yoꞌhuin tamëroꞌsa huënsëpi.

¹⁸ Inápa motopiroꞌsaquësoꞌ, chiporoꞌsa yaꞌhuërin. Natëtëanaroꞌsaquëntaꞌ, shihuaniroꞌsa yaꞌhuërin.

¹⁹ Tahuëri tantiacaiso marëꞌ yoqui acoran. Piꞌinta nitóton pochin ora nanihuachina, naꞌpipon paꞌsarin.

²⁰ Tashihuachinantaꞌ, yaráton aꞌmopiquë isoroꞌpaꞌ imotërëso pochin nitëran. Naporo tashi paꞌtëroꞌsasoꞌ, pipirapi.

²¹ Paꞌpiniroꞌsa tanatonaꞌ, përarantapi. Inapoatona cosharonënaꞌ, Yosë natanapi.

²² Piꞌi pipihuachina napoaponahuëꞌ, huëꞌëshinantënënaquë quëhuëantapi.

²³ Naporoꞌ piyapiꞌsa yaꞌhuërëꞌ, sacatapona paꞌpi. Sacatochinaichin niiꞌhuapi.

²⁴ ¡Maꞌpitacha Sinioro quëmasoꞌ ninan paya! Noya yonquiaton nani maꞌsha acoran. Nani maꞌsha ninansopita isoroꞌpaꞌ mëntatërin.

²⁵ Quëmari chachin marë acoran. Inasoꞌ pancaiꞌ niꞌton, co piꞌpisha tëranta aquëtëran quënantërëhuëꞌ. Inaquë paꞌpi notohuaroꞌ maꞌsha yaꞌhuërin. Aꞌnaquën panca, aꞌnaquën huaꞌhuishin.

²⁶ Inasoꞌ, panca nancharoꞌsari paꞌtërin. Inaquë nipiatan yaꞌhuërin. Inasoꞌ, panca maꞌsha. Quëmari ina maꞌsha, marëquë yaꞌnipiitacaso marëꞌ acoran.

²⁷ Yaꞌipi inapita quëmari cosharo quëtacasoꞌ ninarinën.

²⁸ Quëmari quëtohuatana coshatopi huachi. Imiranën ihuëtatë pochin nitohuatana, noya noya nininsoꞌ capatona natëpi.

²⁹ Apiratohuatana, paꞌpi paꞌyanpi. Niinëna matohuatana, chiminapi. Inapoatonaꞌ, amocan taraantapi.

³⁰ Ispiritonën aꞌpaimahuatana, nani maꞌsha acoantaran. Isoroꞌpaꞌ anashatatë pochin nitaantaran.

³¹ Sinioro noya noya nininsosoꞌ, yaꞌhuëmiatarin. Nani maꞌsha acorinsopita nicaton, inasoꞌ noya cancantërin.

³² Siniorori nocohuachina, isoroꞌpaꞌ nacontërin. Motopiroꞌsanta carihuachina, conai tomontërin.

³³ Nanpito nëꞌcatasoco, Sinioro chinotarahuë. Nisha nisha cantanën cantato ina chinotarahuë.

³⁴ Inasáchin yonquirahuëso nitotaton, noya cancanchin. Inaíchin yonquiato caso noya cancantërahuë.

³⁵ Oshahuanoꞌsa isoroꞌpaquë yaꞌhuëpisopitasoꞌ, taꞌhuanchinaꞌ. Yaꞌipi inpioroꞌsantaꞌ, copichinaꞌ. Yaꞌipi cancanëhuë quëran Sinioro chinotarahuë. Yaꞌipinquëmaꞌ: “¡Ma noyanquëncha quëmaso Sinioro paya!” itocoꞌ.