Salmos 103 - Chayahuita (Shahui)

Yosë nosororinpoasoꞌ

Isonta canta, Tapiri ocoirin

^1-2 Paꞌpi paꞌyatato yaꞌipi cancanëhuë quëran Sinioro chinotarahuë. Inasoꞌ nóya niꞌton, yaꞌipi cancanëhuë quëran napoarahuë. Noya catahuarinco niꞌton, “Yosparinquën,” itarahuë. Yaꞌipi catahuarincosopita yonquirápo.

³ Yaꞌipi co noyahuëꞌ ninahuësoꞌ inquitërinco. Yaꞌipi caniorahuësontaꞌ, anoyatërinco.

⁴ Anaꞌintincoso yaꞌhuëpirinhuëꞌ, chimirin quëran nichaꞌërinco. Paꞌpi nosoroatonco nóya niꞌninco.

⁵ Noya cosharoráchin aꞌcarinco. Inapotatonco, panca onian anporonën quëran nitapaantarinso pochin acorinco.

^6-7 Aꞌnaquënsoꞌ, aꞌnapitari maꞌsha onpotatonaꞌ, aparisitopi. Inapotohuachinara, Siniorori noya coisë pochin nicaton catahuarin. Yonquirinso chachin iráca Moisësë anitotërin. Nani maꞌsha nininsopitanta israiroꞌsanpoa anitotërinpoaꞌ.

⁸ Siniorosoꞌ noyápiachin cancantërin. Aꞌnaroáchin yanosorotërin. Co aꞌnaroáchin noꞌhuitërinhuëꞌ. Piyapinënpoapita nosoromiatërinpoaꞌ.

⁹ Co apira apira pënëninpoahuëꞌ. Noꞌhuihuachinpoantaꞌ, co noꞌhuimiatërinpoahuëꞌ.

¹⁰ Paꞌpi co noyahuëꞌ nicatëhuaꞌ, oshahuanpirëhuahuëꞌ, co nanirinso chachin anaꞌintërinpoahuëꞌ.

¹¹ Noya nicatëhua natëhuatëhuaꞌ, nosoromiatarinpoaꞌ. Isoroꞌpaꞌ quëran piꞌiroꞌtësoꞌ co nincantarihuahuëꞌ. Inapochachin Yosë nosororinpoasontaꞌ, co yaꞌipi nitotarihuahuëꞌ.

¹² Piꞌi pipirin quëran, yaꞌconinquë huarëꞌ áquë tënëhuaꞌ. Ina quëran áquë áquë pochin Yosëso oshanënpoa inquitatonpoaꞌ, naniantërin.

¹³ Ina noya nicatëhua natëhuatëhuaꞌ, nosoroarinpoaꞌ. Quëmapi huiꞌnin nosororinso pochin nitarinpoaꞌ.

¹⁴ Canpoasoꞌ, amocan quëran nininpoa niꞌton, co chinirëhuasohuëꞌ, nitotërin. Napoaton nosororinpoaꞌ.

¹⁵ Isoroꞌpaquë canpoasoꞌ panpatoro pochin niconëhuaꞌ. Yanco huësoatërinso pochin ninëhuaꞌ.

¹⁶ Inasoꞌ ihuani pihuitë pochin nipachina, aꞌnaroáchin capa ninin huachi. Inapochachin canpoanta chiminpatëhuaꞌ, aꞌnaroáchin naniantërinënpoaꞌ.

¹⁷ Napoaponahuëꞌ, Sinioro noya nicatëhua natëhuatëhuasoꞌ, nosoromiatarinpoaꞌ. Noꞌtëquënáchin yonquiaton, shinpoapitanta catahuarápon.

¹⁸ Canpoarë anoyatërinso natëtëhuaꞌ, camaitërinsopitanta natëhuatëhuaꞌ, inapotarinpoaꞌ.

¹⁹ Yosëso inápaquë yaꞌhuëaton, yaꞌipi huaꞌanëntërin.

²⁰ Anquëniroꞌsanquëmanta chiníquën nanantapomarahuëꞌ, Sinioro chinotocoꞌ. Canpitaso ina camaihuachinquëma aꞌnaroáchin natëramaꞌ.

²¹ Inápaquë huaꞌhuayátërahuë yaꞌhuëramasopitantaꞌ, ina chinotocoꞌ. Canpitaso ina natëtomaꞌ, nohuantërinsoꞌ ninamaꞌ.

²² Yaꞌipi isoroꞌpaquë yaꞌhuëramasopitantaꞌ, Sinioro chinotocoꞌ. Yaꞌipi huaꞌanëntërinquë yaꞌhuëramasopita ina chinotocoꞌ. Yaꞌipi cancanëhuë quëran Sinioro chinotarahuë.