Salmos 1 - Chayahuita (Shahui)

Tëhuënchachin noya cancantërëhuasopita

¹ Cancanënpoa quëran huarëꞌ Yosë imapatëhuaꞌ, noya niꞌsarinpoaꞌ. Ina marëꞌ tëhuënchachin noya cancantarihuaꞌ. Co noyahuëꞌ nipisopitasoꞌ, yaanishacancantërinënpoaꞌ. Yainapotohuachinënpoaꞌ, ¡ama natëahuasohuëꞌ! Oshahuanoꞌsa napopisoꞌ, ¡ama nonanapatahuasohuëꞌ! Aꞌnaquënsoꞌ, Yosë yatëhuapi. ¡Co inapita payacaso yaꞌhuërinhuëꞌ!

² Sinioro pënëntërinsoꞌ paꞌyatatëhuaꞌ, tahuërinta tashinta co naniantarihuahuëꞌ.

³ Inapohuatëhuaꞌ, iꞌshana yonsanquë sharoꞌsa shaꞌpinan pochin nicarihuaꞌ. Inasoꞌ, monoquën quëran huarëꞌ noya noyataton, tahuërinën nanihuachin nitërin huachi. Ina pochin nipatëhuasoꞌ, yaꞌipi ninëhuasopita noya pipitarinpoaꞌ.

⁴ Co noyahuëꞌ nipisopitasoꞌ, co onporo napoapihuëꞌ. Arosë shaꞌhuëtë ihuani quiquiconin. Ina pochin nicatonaꞌ, co manta chiniapihuëꞌ.

⁵ Anaꞌintacaso tahuëri nanihuachin, co onporo chaꞌëponahuëꞌ. Noya nipisopita huáncana, co onporo huaniapihuëꞌ.

⁶ Noyasáchin nipatëhuaꞌ, Sinioro aꞌpaiarinpoaꞌ. Co noyahuëꞌ nipisopitaso nipirinhuëꞌ, oshanënari naꞌintarin. Inari naꞌintarin niꞌton, taꞌhuantapona huachi.