Rota naporinso' 4 - Chayahuita (Shahui)

Pooso saꞌarinsoꞌ

¹ Ina quëran Poososo paꞌsahuaton, ninano yaꞌcoanaquë huënsëconin. Inaquë piyapiꞌsa yániyontonpi niꞌton, huënsëconin. Naporo chachin Poosori Rota shaꞌhuitaton: “Inaso soꞌyanco marëꞌ yaꞌcariꞌ quëmopi,” itërinsoꞌ quëmapi naꞌhuëarin. Quënanahuaton përarin: —Iyasha. Huëquë huënsëriaquëꞌ, itërin. Napotohuachina, inaso huënsëconin.

^2-3 Shonca ansianoroꞌsanta përarin. Inapitasoꞌ ninano huaꞌanoꞌsaꞌ. Huëꞌpachinara inahuanta ahuënsërin. Inapotahuaton quëmopinën itapon: —Noimi Moapo noꞌpa quëran huënantarin. Huëntarahuaton soꞌinco noꞌpanën yapaꞌanin.

⁴ Quëmanta nitota marëꞌ ina shaꞌhuitaranquën. Yapaꞌanpatan quëmari paꞌantëquëꞌ. Yaꞌipi isopita niꞌtërantapaisoꞌ natantonënaquë shaꞌhuitaranquën. Ninano ansianoꞌsanta natantonënaquë napotaranquën. Quëmasoꞌ Irimiricoco marëꞌ quëmopimia ninan. Napoaton nanitëran noꞌpanën paꞌanamasoꞌ. Co yapaꞌantohuatanhuëꞌ, shaꞌhuitoco nitochi. Cantaꞌ, nanan yaꞌhuëtërinco paꞌantaꞌhuasoꞌ, itërin. Napotohuachina quëmopinënisoꞌ: —Cari paꞌantapo, itërin.

⁵ Naporoꞌ Poosori itaantapon: —Noimi noꞌpanën paꞌantohuatansoꞌ, onpopionta Rota quëyoron macamaso yaꞌhuërin. Inasoꞌ moaporon. Ama soꞌinco noꞌpaꞌ maninsoꞌ quëran nininën ayacaso marëhuëꞌ inapotaran, itërin.

⁶ Napotohuachina quëmopinënsoꞌ taantapon: —Inapocaso niꞌquëhuarëꞌ, co caso nanitapohuëꞌ nimara. Chiminpato, ina noꞌpaꞌ huiꞌnahuëpitari macacaso nipirinhuëꞌ, co huachi inapoapihuëꞌ. Nohuantohuatan yaꞌhuërënamëhuë quëmari paꞌantëquëꞌ, itërin.

^7-8 Naporo tahuëriꞌsa Israiro nacionquë iso pochin inachintopiso yaꞌhuërin: Quëmopinëna capini maꞌsona yaꞌhuërënamën nicacasoꞌ niquëtopi. Napohuachinara, nanan yoꞌnaꞌpiso sapatën ocoirahuaton, quëmopinën quëtërin. Maꞌsona nipaꞌantatona anoyatohuachinarantaꞌ, inapopi. Inachintopi niꞌton, quëmopinënsoꞌ aꞌnara sapatën ocoirin. Ocoirahuaton Pooso quëtërin. Ina quëtahuaton itapon: —Quëmari paꞌantëquëꞌ, itërin.

⁹ Naporoꞌ Poososoꞌ, yaꞌipi inaquë nisapisopita itapon: —Irimirico, Quirionco, Maronco, inapita noꞌpanën Noimiri huaꞌanëntërin. Ina huachi carisoꞌ, canpita niꞌtonëmaquë paꞌantarahuë.

¹⁰ Canpita niꞌtonëmaquë chachin, Rota quëyoronta masarahuë. Inasoꞌ, Moapo sanapi Maaroncori ayananpirinsoꞌ. Inapohuato noꞌpanën nininënsoꞌ, Maaronco nininënquë chachin yaꞌhuëápon. Co incari tëranta naniantaponhuëꞌ, itërin.

^11-12 Napohuachina, yaꞌipi inaquë nisapisopitari itaponaꞌ: —Quiya mini niꞌtonëhuëiquë napoaran. Sinioro nohuanton sanapi manansoꞌ, Naquira, Nia, inapita pochin niin. Inapita quëran yaꞌipi israiroꞌsanpoa pipirëhuaꞌ. Quëmanta yaꞌipi Pirin ninanoquë yaꞌhuëpisopita noya niꞌinën. Napotërinënsoꞌ, yaꞌipi iso ninanoquë nahuiꞌin. Sinioro nohuanton ina sanapi masaranquë naꞌa huiꞌnahuanquëꞌ. Inapita quëraonta panca huënton quëmopiroꞌsa pipiinaꞌ. Parisi itërëhuaso yaꞌhuëtërinso nápoꞌ, pipiinaꞌ. Inasoꞌ, Cota huiꞌnin Tamaraquëya huiꞌnahuaninsoꞌ, itopi.

¹³ Ina pochin Poososoꞌ, Rota manin. Nani mapachina ichihuëꞌërin. Napohuachinara Sinioro nohuanton cayorahuaton quëmapiaꞌhua huairin.

¹⁴ Naporoꞌ sanapiꞌsari Noimi itaponaꞌ: —¡Ma noyacha Sinioroso paya! itahuaꞌ. Ina nohuanton nëhuëtiinquënso marëꞌ amiaꞌhua yaꞌhuëtërinquën huachi. Maꞌcha inaso iso noꞌpanënpoaquë, noya nicaton nahuininhuë paya.

¹⁵ Noyá paiya nipatan, ina achinicancanarinquën, nocomarinquën. Inasoꞌ, huaꞌhuatoparin huaꞌhuin niꞌton, napotarinquën. Aꞌshionta nosoromiatërinquën niꞌton, canchisë huaꞌhuanpoa quëran naꞌcon naꞌcon paꞌtërin, itopi.

¹⁶ Napotohuachinara, Noimiso amin manin. Masahuaton inari chachin asoꞌsorin.

¹⁷ Ina nicatonaꞌ, niyacapapisoꞌ capini sanapiꞌsarisoꞌ itaponaꞌ: —¡Noimi huaꞌhuin miáchin huaꞌhuatatë pochin ninin! topi. Inahuari chachin aninihuanatonaꞌ, Opito itopi. Inasoꞌ Quisi paꞌpin niꞌton, Tapi shimashonën.

Tapi shimashonënpita nininsoꞌ

^18-22 Isopita Parisi quëran pipipisopita yaꞌhuëpi: Parisi huiꞌnahuanpachina Isromo, itopi. Isromonta huiꞌnahuanpachina Aramo, itopi. Aramonta huiꞌnahuanpachina Aminatapo, itopi. Inanta huiꞌnahuanpachina Nasono, itopi. Nasononta huiꞌnahuanpachina Sarëmon itopi. Inanta huiꞌnahuanpachina Pooso, itopi. Poosonta huiꞌnahuanpachina Opito, itopi. Opitonta huiꞌnahuanpachina Quisi, itopi. Quisinta huiꞌnahuanpachina Tapi, itopi.