Rota naporinso' 3 - Chayahuita (Shahui)

Poosori Rota nosororinsoꞌ

¹ Aꞌna tahuëri Noimiri Rota itapon: —Noya noya yaꞌhuëcamaso marëꞌ soꞌyan yonítaꞌhuanquënso yaꞌhuërin tënahuë.

² Niꞌquëꞌ. Poososoꞌ quëmopinënpoa niꞌton, ina piyapinënpita sanapiꞌsa nipisopitarëꞌquën paꞌnan. Ipora tashi inasoꞌ, sipata toꞌnorarinso tëꞌyarayacaso marëꞌ paꞌsarin.

³ Napoaton quëmasoꞌ amarahuaton pimo huaꞌsaiquë nipashitëquëꞌ. Inaporahuaton noya noya aꞌmoransoꞌ, aꞌmoquëꞌ. Ina quëran toꞌnoratopiquë paquëꞌ. Inaso napoaponahuëꞌ, ama insonta quënanainquënso marëhuëꞌ noyá naꞌpiquëꞌ. Pooso coshataton oꞌoquë huarëꞌ naꞌpiton ninataquëꞌ.

⁴ Insëquësona huëꞌëpachin, noya niꞌquëꞌ. Ina quëran paaparahuaton paꞌshorantëquëꞌ. Inapotahuaton nantën pirayan quëhuënquëꞌ. Inapohuatan inari chachin shaꞌhuitarinquën maꞌsona nicacasoꞌ, itërin.

⁵ Napotohuachina Rotasoꞌ tapon: —Inta nipachin. Napotërancoso chachin nisarahuë, itërin.

⁶ Itahuaton nitaparin. Naporahuaton toꞌnoratopiquë paꞌnin. Inaquë canconahuaton, aꞌshatëni napotërinso chachin ninin.

⁷ Poososoꞌ coshatërin, oꞌorin, naporin. Naporahuaton noya cancantërin. Ina quëran sipata imopisoꞌ pirayan quëhuënin. Yono tashi Rotari, co irinaponahuëꞌ yaꞌcaririn. Nantëquën niimotërinsoꞌ paꞌshirapirin. Inapotahuaton nantën pirayan quëhuënin.

⁸ Huancana tashi nisahuasoꞌ, Poososoꞌ capayatërin. Huënsëintarahuaton, cari cariarin. Inaporahuaton paꞌpi paꞌyantërin: “¿Ma sanapita iso napoarin?” taꞌton:

⁹ —¿Ma sanapinquënta quëmasoꞌ? itërin —Caso Rotaco. Quëma piyapinën pochinco ninahuë. Quëmasoꞌ quëmopinquën. Aꞌmoranso huirotënquë tëranta imopitoco. Paꞌpoyatonco nichaꞌëancoso marëꞌ inapotoco. Ina marëꞌ máco topirahuë, itërin.

¹⁰ —Sinioro chachin catahuainquën imoya, tënahuë. Ipora naporan quëran soꞌyancoráchin cancantëranso anitotëranco. Nani ayananpirinquën nichinapon chachin aꞌna quëmapi cá quëran huiꞌna huiꞌnapi yoniitonhuëꞌ. Maꞌhuanhuë nipon, co maꞌhuanhuëꞌ nininso tërantaꞌ, yoniitonhuëꞌ. Quëmaso napoaponahuëꞌ, co inaporanhuëꞌ.

¹¹ Ama imoya tëꞌhuaquësohuëꞌ. Yaꞌipi yaꞌhuërahuëquë yaꞌhuëpisopita noya sanapi ninansoꞌ nani nitotopi. Napoaton shaꞌhuitërancoso chachin nisarahuë.

¹² Napoaponahuë caso soꞌyanco marëꞌ, áquë quëmopimiachinco. Aꞌnara yaꞌhuëtërinquën yaꞌcari quëmopi.

¹³ Tashiraya ina nontarahuë paꞌpoyatënquën nichaꞌëinquënso marëꞌ. Nohuantohuachin anoyatarinquën. Coꞌsoꞌ nohuantohuachinhuëꞌ, Yoscoarëꞌ carinquën anoyataranquën. Iporasoꞌ isëquëranchin chinotëquëꞌ, itërin Poosori.

¹⁴ Naporo tashi Rotasoꞌ Pooso nantën pirayan huëꞌërin. Tahuëririnquë tashi chachin capayatërin. Poosori: “Ama huëꞌnanso inso tëranta nitochinsohuëꞌ,” itërin niꞌton, naporin.

¹⁵ Naporoꞌ Poosori itaantapon: —Aipi aꞌmoranso ocoirahuaton, noya sëꞌquëquëꞌ, itërin. Inapohuachina, catapini shonca quiro pochin quëꞌninsoꞌ sipata acotërin. Ina quëran apëꞌpëtohuachina, Rotaso ninanoꞌpaꞌ paantarin.

¹⁶ Aꞌshatën pëinënquë canpachina, inari itapon: —¿Onpoca huaꞌhua? itërin. Napotohuachina Poosori napotërinsoꞌ shaꞌhuitërin.

¹⁷ Ina quëran napoantarin: —Co topinamia aꞌshacha payataquë panantamaso yaꞌhuërinhuëꞌ, taꞌton, iso sipata quëtërinco, itërin.

¹⁸ —Napotërinquën niꞌquëhuarëꞌ, iporasoꞌ ninaquëꞌ: ¿Maꞌtama onpoꞌinpaꞌ? Inasoꞌ, yaꞌipi anoyataquë huarëꞌ chinotarin, tënahuë, itërin aꞌshatëni.