Rota naporinso' 2 - Chayahuita (Shahui)

Pooso iminënquë Rota naporinsoꞌ

¹ Noimisoꞌ, soꞌinco quëran aꞌnara imoroën maꞌhuan yaꞌhuëtërin. Inasoꞌ, Pooso itopi. Naní quëran noya niꞌpi.

² Aꞌna tahuëri Rotari Noimi itapon: —Iminoꞌsaquë paꞌi topirahuë. Tapona inso sipata yaquinaꞌpi tërantaꞌ, patërinsopita macaꞌhuasoꞌ nohuantërin, itërin. —Paquë nipachin huaꞌhua, itërin aꞌshatëni.

³ Napotohuachina iminquë paꞌnin. Yaquinaꞌpiroꞌsa otayapisoꞌ, masárin. Co nitotopirinhuëꞌ, ina iminso Poosonquën.

⁴ Inapoaton maꞌpatasoꞌ, imin huaꞌanën Pirin quëran canquirin. Canquirahuaton yaquinaꞌpiroꞌsa noya nontërin: “Sinioro chachin catahuainquëmaꞌ,” itërin. Napotohuachina piyapinënpitantaꞌ, “Quëmanta Sinioro catahuainquën,” itopi.

^5-6 Ina quëran Poososoꞌ sacatoroꞌsa huaꞌan natanin: —¿Inta huiꞌnin pasoꞌ sanapi? itërin. —Inasoꞌ, Moapo sanapi. Inatohua quëran Noimi imaquirinsoꞌ.

⁷ Yaquinaꞌpiroꞌsa imaton, otayapiso macacaso marëꞌ nani nataninco. Tashiramiachin quëran huarëꞌ sacatápirinhuëꞌ, apira huëꞌsahuaton piꞌpian chinotarin, itërin.

⁸ Napohuachina paaparahuaton itapon: —Natanquë imoya piꞌpian shaꞌhuichinquën. Ama aꞌna iminoꞌsaquë otayapisoꞌ macapon paquësohuëꞌ. Piyapinëhuëpita sanapiꞌsa nipisopitarëꞌquën, isëquëranchin maquëꞌ.

⁹ Yaquinaꞌpiroꞌsa insëquësona yaquiantahuachinaꞌ, inatohua inahuanta paꞌsapi. Naporoꞌ quëmanta inapita imaquëꞌ. Ama insonta apiinquënso marëhuëꞌ, nani piyapinëhuëpita shaꞌhuitërahuë. Yamorohuatan, yonsharoꞌsaquë iꞌsha yaꞌhuëarin. Insosona sëꞌhuapisoꞌ oꞌocontaquëꞌ, itërin.

¹⁰ Napotohuachina, inaso Pooso noya nicaton isonin quëran noꞌpaquë huarëꞌ monshomarin. Ina quëran itapon: —¿Onpoatonta ina pochin niꞌnanco? Caso nisha sanapico nipirahuëꞌ, noyasha nontëranco, itërin.

¹¹ —Soꞌyan chiminin quëran huarëꞌ, aꞌshacha nosororansoꞌ, nani nitotërahuë. Tataparin, mamaparin, noꞌpanën, inapita huëshiran. Co nohuitopirancoihuëꞌ, yacapaancoiso marëꞌ huëꞌnansontaꞌ, nitotërahuë.

¹² Inapohuatana, quëmaso Yosë chachin yoniton naporan. Inaso Sinioro, israiroꞌsacoi chinotërai. Ina paꞌpoyainquënso marëꞌ inaporan. Inasoꞌ, atari huaꞌhuinpita toꞌcohuëtërinso pochin paꞌpoyarinpoaꞌ. ¡Napoaton inari chachin naporanso marëꞌ acanainquën taꞌto, ina nontërahuë! itërin.

¹³ Napotohuachina, Rotariso itapon: —Quëmaso noyasha nontëranco. Ina pochin nontatonco achinicancananco. Caso co piyapinënpita sanapiꞌsa pochin tëranta nipirahuëꞌ, noyasha nontëranco, itërin.

¹⁴ Capacaiso marëꞌ ora nanihuachina, Poosorisoꞌ, Rota përaton itapon: —Huëquë imoya pan macaton, nocaroya tërantaꞌ, iꞌshiiquëꞌ. Iso nocarosoꞌ, huino áin ninin quëran nipi, itërin. Napotohuachina, paꞌsahuaton yaquinaꞌpiroꞌsarëꞌ, huënsëconin. Naporahuaton sipatanta iyanapisoꞌ, Poosori quëtohuachina caꞌnin. Natëaquë huarëꞌ coshatahuaton pëꞌsotopitërarin.

¹⁵ Ina piquëran paantarahuaton otapisopita maantararin. Naporoꞌ Poosori, piyapinënpita iso pochin camairin: —Sipata tonporamasoꞌ quëraontaꞌ, aꞌnaya aꞌnaya main. Ama apiracosohuëꞌ.

¹⁶ Tonpoasëmantaꞌ, aꞌnaya aꞌnaya atatocoꞌ. Inari macacaso marëꞌ inapotocoꞌ. Naporahuaton ama insoquëma tëranta apicosohuëꞌ, itërin.

¹⁷ Ina pochin Rotasoꞌ, Pooso iminënquë sipata otapisoꞌ manin. Tashiaquë huarëꞌ manin. Naporo tahuëri yontoninso toꞌnorarahuaton, pëꞌtënpachina, cato shonca quiro naꞌcon icanin.

¹⁸ Ina quëran maꞌpatërinso pëꞌpërahuaton, ninanoquë paꞌmantarin. Aꞌshatën cantonahuaton, maꞌpatërinso aꞌnotërin. Cosharo pëꞌsotërinsontaꞌ, quëtërin.

¹⁹ Aꞌshatëni itapon: —¿Inta iminënquë ipora tahuëri maꞌpatëran? ¿Insëquëta inanapo manan? insosona ina pochin catahuarinquënsoꞌ, Siniorori catahuain, itërin. Napotohuachina shaꞌhuitërin: —Pooso itopisoꞌ iminënquë ipora tahuëri maꞌpatërahuë, itërin Rotari.

²⁰ —Siniorori ina catahuain tënahuë. Iráca chimipicoroꞌsa nosororinso pochachin, canpoanta ipora nosororinpoaꞌ. Inasoꞌ quëmopinpoaꞌ. Napoaton inantaꞌ, nanitërin nichaꞌëinpoasoꞌ, tënin Noimi.

²¹ Ina quëran Rota taantapon: —Napotomantarinco aꞌshacha: “Piyapinëhuëpita sanapi nipisopitarëꞌquën paaton otayapisoꞌ maquëꞌ. Yaꞌipi shaꞌtërahuësoꞌ nanquiai huarëꞌ inapitarëꞌquën paquëꞌ,” itërinco, itërin.

²² —Tëhuënchachin noꞌtëquën napotërinquën: Piyapinënpita sanapi nipisopitarëꞌquën paquëꞌ. Ama aꞌna iminquë paquësohuëꞌ, apichinën, itërin aꞌshatënintaꞌ.

²³ Napotopiso chachin Rotasoꞌ Pooso piyapinënpita sanapi nipisopitarëꞌ paꞌnin. Otayapisopita maꞌpatárin. Sipata nanquirahuatonaꞌ, trico yaꞌhuërëꞌ nanquiyai huarëꞌ inapitarëꞌ paꞌnin. Ina pochin Rotasoꞌ, aꞌshatën yacaparin.