Romanos 8 - Chayahuita (Shahui)

Ispirito Santo catahuarinpoasoꞌ

¹ Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

² Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

³ Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

⁴ Co noyahuëꞌ yonquirëhuasopita naniantatëhuaꞌ, Ispirito Santo natëhuatëhuaꞌ, catahuarinpoaꞌ noya nicacasoꞌ. Ina pochin cancantohuatëhuaꞌ, Yosë noya niꞌsarinpoaꞌ. Ina marëꞌ huiꞌnin aꞌpaimarin.

⁵ Co noyahuëꞌ yonquihuatëhuara, co noyahuëꞌ nicacasoáchin paꞌyatërëhuaꞌ. Nipirinhuëꞌ, Ispirito Santo natëhuatëhuaꞌ, Yosë nohuantërinsoáchin paꞌyatarëhuaꞌ.

⁶ Co noyahuëꞌ nicacasoráchin paꞌyatohuatëhuara, chimipi pochin niconëhuaꞌ. Co Yosë nohuitërëhuahuëꞌ. Nipirinhuëꞌ, Ispirito Santo paꞌyatatëhuaꞌ natëhuatëhuaꞌ, Yosë nohuitatëhuaꞌ, nanpimiatarihuaꞌ. Noya yonquiatëhuaꞌ, sano cancantarihuaꞌ.

⁷ Co noyahuëꞌ nicacasoráchin paꞌyatohuatëhuaꞌ, Yosë inimicotarëhuaꞌ. Co Yosë pënëntërinsoꞌ natëcasoꞌ nohuantarëhuahuëꞌ. Co nanitarëhuahuëꞌ ina natëcasoꞌ.

⁸ Ina pochin cancantohuatëhuaꞌ, co Yosë noya niꞌsarinpoahuëꞌ.

⁹ Canpitaso nipirinhuëꞌ co noyahuëꞌ yonquiramasopita naniantëramaꞌ. Ispirito Santo yaꞌcoancantohuachinquëmaꞌ, ina nohuantërinsoꞌ nisaramaꞌ. Co Ispirito Santo yaꞌcoancantohuachinquëmahuëꞌ, co tëhuënchachin Quisocristo imaramahuëꞌ.

¹⁰ Oshahuanamaꞌ niꞌton, nonëmaso chiminacasoꞌ yaꞌhuërin. Napoaponahuë Quisocristo yaꞌcoancantatënquëmaꞌ, anoyacancantërinquëmaꞌ. Napoaton Yosë noya nicatënquëma ispiritonëma ananpitarin niꞌton, nanpimiataramaꞌ.

¹¹ Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

¹² Napoaton iyaroꞌsaꞌ, Ispirito Santo natëcasoꞌ yaꞌhuërin. Co noyahuëꞌ yonquirëhuasopitasoꞌ naniantahuaꞌ.

¹³ Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

¹⁴ Ispirito Santo nohuantërinsoꞌ natëhuatëhuaꞌ, Yosë huiꞌninpoa chachin nisarëhuaꞌ.

¹⁵ Iráca Yosë tëꞌhuatëramaꞌ. Iporaso nipirinhuëꞌ Ispirito Santo yaꞌcoancantërinpoaꞌ niꞌton, co huachi mantaꞌ tëꞌhuatacasoꞌ yaꞌhuërinhuëꞌ. Huiꞌninpita pochachin Yosë niꞌninpoaꞌ. Ina nontohuatëhuara, “Tata,” itërëhuaꞌ.

¹⁶ Ispirito Santo chachin cancanënpoa quëran anitotërinpoaꞌ. “Huiꞌninpita pochachin Yosë niꞌninquëmaꞌ,” itërinpoaꞌ.

¹⁷ Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

Aꞌna tahuëri yaꞌipiya anoyatarinsoꞌ

¹⁸ Isoroꞌpaquë piꞌpian parisitarihuarahuëꞌ, ama ina yonquiaꞌahuasohuëꞌ. Ama ina marëꞌ sëtahuasohuëꞌ. Aꞌna tahuëri Yosëꞌpaꞌ noya noya yaꞌhuëcontarihuaꞌ. Ina yonquiatëhuaꞌ, nóya cancantahuaꞌ tënahuë.

¹⁹ Naporoꞌ Quisocristo imarëhuasopita noya noya yaꞌnoarihuaꞌ. Yaꞌipi maꞌsha isoroꞌpaquë yaꞌhuërinsopitantaꞌ ina tahuëri ninarapi.

²⁰ Iporaso nipirinhuëꞌ sharoꞌsaꞌ co noyatopihuëꞌ. Maꞌsharoꞌsantaꞌ chiminpi. Nipirinhuëꞌ, co inahuara nohuanton, napopihuëꞌ. Yosë nohuanton, napopi. Aꞌna tahuëri yaꞌipiya anoyatarin.

²¹ Naporoꞌ co huachi maꞌsha chanatarinhuëꞌ. Yosë huiꞌninpitanpoa ninëhuasopita noya noya acohuachinpoaꞌ, maꞌsharoꞌsantaꞌ noya noya niantapi. Co huachi chiminaponahuëꞌ.

²² Iráca quëran huarëꞌ maꞌsharoꞌsaꞌ parisitopi. Sharoꞌsantaꞌ papotopirinhuëꞌ, co noyatërinhuëꞌ, chiminin. Ipora huantaꞌ sanapi huaꞌhua iquitohuachina, iquitërinso pochin chiníquën parisitapi.

²³ Canpoantaꞌ Ispirito Santo nani yaꞌcoancantopirinpoahuëꞌ, parisitërëhuaꞌ. Parisitatëhuaꞌ, manorëhuaꞌ nasha nonënpoaꞌ yaꞌhuëtinpoaso marëꞌ. Ina ninarëhuaꞌ. Nasha nonënpoaꞌ quëtohuachinpoaꞌ, co huachi caniorihuahuëꞌ. Co huachi chiminarihuahuëꞌ. Naporoꞌ Yosë huiꞌninpita chachin nisarëhuaꞌ.

²⁴ Tata Yosë noya nichaꞌërinpoaꞌ. Napoaponahuëꞌ, co yaꞌipi naniyatërarinhuëꞌ: “Aꞌna tahuëri noya noya acoarinpoaꞌ,” taꞌtëhuaꞌ, ina ninarëhuaꞌ. Pahuanarin yaꞌipi nanicasoꞌ. Napoaton ninarëhuaꞌ. Nani nanirin naporini, co ninacasoꞌ yaꞌhuëꞌitonhuëꞌ.

²⁵ “Tëhuënchachin noyá nichaꞌësarinpoaꞌ,” taꞌtëhuaꞌ, co sëtërëhuahuëꞌ. Noya cancantatëhuaꞌ, ninarihuaꞌ.

²⁶ Iporasoꞌ co chiníquën cancantopirëhuahuëꞌ, Ispirito Santo catahuarinpoaꞌ. Yosë nontohuatëhuara, co nitotërëhuahuëꞌ maꞌsona itacaso nipirinhuëꞌ, catahuarinpoaꞌ. Cancanënpoa quëran inari Yosë nontërin. Tarëtarinso pochin ninin. Canpoasoꞌ co natanpirëhuahuëꞌ, Yosërisoꞌ natanin.

²⁷ Yaꞌipi yonquirëhuasopita Yosë nitotërin. Ispirito Santori nontohuachina, natanin. Yosë nohuantërinso chachin nitotaton, canpoa marëꞌ noya nontërin.

Yosë nosororinpoasoꞌ

²⁸ Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

²⁹ Iráca quëran huarëꞌ Yosë nohuitërinpoaꞌ. Nohuitatonpoaꞌ, huayoninpoaꞌ Quisocristo pochachin cancantacaso marëꞌ. Quisocristosoꞌ noya noya ninin. Ina quëran naꞌaquënpoaꞌ imapatëhuaꞌ, ina pochin cancantarihuaꞌ. Yosë huiꞌninpita pochin niꞌsarinpoaꞌ canpoantaꞌ.

³⁰ Nohuantërinpoaꞌ niꞌton, huëntonënquë chachin ayaꞌconinpoaꞌ. Oshanënpoaꞌ inquitatonpoaꞌ, noya niꞌninpoaꞌ. Ina nohuanton, aꞌna tahuëri inápaquë noya noya acoarinpoaꞌ.

³¹ Ina pochin Yosë yonquirinpoaꞌ niꞌquëhuarëꞌ, co insonta nanitërinhuë minsëinpoasoꞌ.

³² Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

³³ Yosë huayoninpoaꞌ niꞌquëhuarëꞌ, co insonta nanitërinhuë shaꞌhuirapinpoasoꞌ. Yosë chachin noya niꞌninpoaꞌ.

³⁴ Yosë noya niꞌninpoa niꞌton, co insonta nanitërinhuë anaꞌintinpoasoꞌ. Quisocristo oshanënpoaꞌ inquitinpoaso marëꞌ chiminin. Ina quëran nanpiantarin. Yosë inchinanën quëran yaꞌhuaton, canpoa marëꞌ Yosë nontárin.

³⁵ Tëhuënchachin Quisocristo nosororinpoaꞌ. Co insontaꞌ nanitërinhuë ina quëran osërëinpoasoꞌ. Aꞌna tahuëri parisitërëhuaꞌ. Parisitatëhuaꞌ, co napion cancantërëhuaꞌ. Piyapiꞌsaꞌ aparisitërinënpoaꞌ. Cosharoꞌ, maꞌsha inapita pahuantërinpoaꞌ. Maꞌsha onpochináchin nisarëhuaꞌ. Yatëparinënpoaꞌ. Inapopirëhuahuëꞌ, ¡co inapita nanitapihuëꞌ Quisocristo quëran osërëinpoasoꞌ!

³⁶ Yosë quiricanënquë naporin: “Imarainquënso marëꞌ Sinioro, yaꞌipi tahuëri yatëparinacoi. Co mantaꞌ onpopiraihuëꞌ, ohuicaroꞌsaꞌ yatëpapiso pochin yatëparinacoi,” tënin.

³⁷ Ina nipirinhuëꞌ, Quisocristo nosororinpoaꞌ. Parisitapirëhuahuëꞌ, nani tahuëri catahuarinpoaꞌ sopai minsëcaso marëꞌ. Nóya cancantarëhuaꞌ.

³⁸ Yosë nosoromiatërinpoaꞌ. Nanpihuatëhuara, nosororinpoaꞌ. Chiminpatëhuantaꞌ, co patarinpoahuëꞌ. Anquëniroꞌsaꞌ, sopairoꞌsaꞌ, tanan huaꞌyanoꞌsaꞌ, inapita co nanitopihuëꞌ Yosë quëran osërëinpoasoꞌ. Ipora tahuëriꞌsaꞌ maꞌsha onpotopirinënpoahuëꞌ, co patarinpoahuëꞌ. Aꞌna tahuërintaꞌ maꞌsha onpotohuachinënpoaꞌ, co Yosë naniantarinpoahuëꞌ.

³⁹ Maꞌsha inápaquë yaꞌhuërinsopita, acoporoquë yaꞌhuërinsopita inapita co nanitopihuëꞌ Yosë quëran osërëinpoasoꞌ. ¡Co insontaꞌ nanitërinhuëꞌ Yosë ananiantinpoasoꞌ! Quisocristo huaꞌanëntërinpoaꞌ. Ina imarëhuaꞌ niꞌton, Yosë nosoromiatërinpoaꞌ.