Romanos 7 - Chayahuita (Shahui)

Saꞌarinso pochin nininsoꞌ

¹ Canpitasoꞌ iyaroꞌsaꞌ, pënëntopisoꞌ nitotëramaꞌ. Nanpipisopitaráchin camaitërinsoꞌ natërapi.

^2-3 Niꞌcoꞌ. Sanapi soꞌyahuachina, soꞌin chinpitacasoꞌ yaꞌhuërin. Soꞌin yaꞌhuëtopirinhuëꞌ, aꞌna quëmapiri sëꞌhuahuachin, monshihuanin. Ina marëꞌ oshahuanarin. Nipirinhuëꞌ, soꞌin chiminpachin, soꞌyaantahuachin, co ina marëꞌ oshahuaninhuëꞌ.

⁴ Inapochachin iyaroꞌsaꞌ, canpoantaꞌ Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi iráca pënëntërinsoꞌ huaꞌanëntiinpoasoꞌ yaꞌhuërinhuëꞌ. Quisocristo chinpitacasoꞌ yaꞌhuërin. Inaso chiminaponahuëꞌ, nani nanpiantarin. Ina imamiatohuatëhuaꞌ, noya nicarihuaꞌ aꞌnapitantaꞌ Yosë noya yonquicaiso marëꞌ.

⁵ Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin.

⁶ Iráca nisha nisha pënëntërinsoꞌ yaꞌhuërin natëcasoꞌ, Moisësëri ninshitërinsoꞌ. “Co yaꞌipiya natëhuatëhuahuëꞌ, co onporontaꞌ chaꞌësarëhuahuëꞌ,” topi. Apinaꞌpi tashinan pëiquë yaꞌhuërinso pochin nipirëhuahuëꞌ. Iporasoꞌ co huachi Moisësë pënëntërinsoꞌ yonquiarëhuahuëꞌ. Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi huaꞌanëntiinpoasoꞌ yaꞌhuërinhuëꞌ. Ispirito Santo catahuarinpoaꞌ cancanënpoa quëran huarëꞌ Yosë natëcasoꞌ. Nasha cancan quëtërinpoaꞌ. Napoaton noya nisarëhuaꞌ.

Co noyahuëꞌ yonquirëhuasopita yaminsërinpoasoꞌ

⁷ Napoahuarëꞌ, “Moisësë pënëntërinsoꞌ aoshahuaninpoaꞌ niꞌton, co noyahuëꞌ,” ¿tëcarihuaꞌ ti? ¡Co naporinhuëꞌ! Napoaponahuëꞌ, pënëntërin quëran oshahuanëhuasoꞌ nitotërëhuaꞌ. Iso pochin yonquiaꞌahuaꞌ. “Ama aꞌna piyapi maꞌshanënaꞌ noyapatocosohuëꞌ,” tënin iráca pënëntaton. Casoꞌ ina natanato, “Tëhuënchachin aꞌnapita maꞌshanën noyapatato, co noyahuëꞌ yonquirahuë. Ina marëꞌ oshahuanahuë,” tënahuë.

⁸ “Ama maꞌsha noyapatocosohuëꞌ,” itërinco. Ina natanato, aquë aquëtëꞌ aꞌnapita maꞌshanënaꞌ noyapatërahuë. Co noyahuëꞌ cancantërahuësoꞌ canarinco. Iráca oshahuanpirahuëꞌ. Coꞌhuara pënëntërinsoꞌ nitochatërasocohuëꞌ, oshahuanahuësoꞌ co nitotërahuëꞌ.

⁹ Coꞌhuara pënëntërinsoꞌ natayantërasocohuëꞌ, “Casoꞌ noya piyapico,” topirahuëꞌ. Pënëntërinsoꞌ natanpatëra, “Tëhuënchachin oshahuanco. Chiminpato, Yosë anaꞌintarinco,” tënahuë.

¹⁰ Noya yaꞌhuëcaꞌhuaso marëꞌ pënënpirincohuëꞌ. Co ina natëtorahuëꞌ, oshahuanahuë. Oshahuanato, parisitopiquë pacaꞌhuasoꞌ yaꞌhuërin.

¹¹ Pënëntërinsoꞌ natëhuato, noya cancantarahuë, topirahuëꞌ. Co ina natërahuëꞌ niꞌton, oshahuanahuë. Chiminpato, anaꞌintincosoꞌ yaꞌhuërin.

¹² Yosë chachin pënëninpoaꞌ. Shaꞌhuitërinpoasoꞌ nóya. Noꞌtëquën nonin.

¹³ Napoahuarëꞌ pënëntërinsoꞌ noya nipirinhuëꞌ, ina marëꞌ anaꞌintarinco, ¿topiramahuëꞌ ti? ¡Co pënëntërinso marëꞌ anaꞌintincosoꞌ yaꞌhuërinhuëꞌ! Oshahuanahuë niꞌton, anaꞌintincosoꞌ yaꞌhuërin. Pënëntërinsoꞌ noya nipirinhuëꞌ natanahuë quëran aquë aquëtëꞌ co noyahuëꞌ yonquiato, co noyahuëꞌ ninahuë. Pënëninpoa quëran oshahuanahuësoꞌ nitotërahuë. Paꞌpi co noyahuëꞌ ninahuë, tënahuë.

¹⁴ Noya yonquicaso marëꞌ pënënpirinpoahuëꞌ. Casoꞌ co noya yonquiatohuëꞌ, oshahuanahuë. Oshahuanahuësoꞌ huaꞌanëntatë pochin nitërinco. Co nanitërahuëꞌ noya nicaꞌhuasoꞌ.

¹⁵ Noya nisarahuë, topirahuëꞌ, aꞌnaroáchin co noyahuëꞌ yaninahuë. Co yaoshahuanpirahuëꞌ, oshahuanahuë. Onpoatosoꞌ napomaraco, co nitotërahuëꞌ.

¹⁶ Co nohuantopirahuëꞌ, co noyahuëꞌ ninahuë. Ina marëꞌ co noya cancantërahuëꞌ. Yonquinëhuë quëran nitotërahuë. Tëhuënchachin pënëntërinsoꞌ noya, tënahuë.

¹⁷ Co nohuantopirahuëꞌ, caora co noyahuëꞌ cancantato, co noyahuëꞌ ninahuë. Co noyahuëꞌ cancantërahuësoꞌ canarinco.

¹⁸ Caora co noyahuëꞌ cancantërahuë. Co nanitërahuëꞌ noya nicaꞌhuasoꞌ. Inachinco. Yosë yanatëpirahuëꞌ, caora co nanitërahuëꞌ natëcaꞌhuasoꞌ.

¹⁹ Noya nicaꞌhuasoꞌ nohuantopirahuëꞌ, co noyahuëꞌ ninahuë. Co yaoshahuanpirahuëꞌ, oshahuanahuë.

²⁰ Co nohuantopirahuëꞌ, co noyahuëꞌ ninahuë. Co noyahuëꞌ cancantërahuësoꞌ canarinco.

²¹ Noya nicaꞌhuasoꞌ nohuantopirahuëꞌ, co noyahuëꞌ cancantato, co noyahuëꞌ nicaꞌhuasoráchin yonquiconahuë.

²² Cancanëhuë quëran Yosë pënëninpoasoꞌ paꞌyatato, yanatëpirahuëꞌ.

²³ Aꞌna cancan nohuantërin. Aꞌna cancanso nipirinhuëꞌ, co nohuantërinhuëꞌ. Co noyahuëꞌ nicacasoáchin yonquirin. Ina canarinco niꞌton, co noyahuëꞌ ninahuë.

²⁴ ¡Maꞌhuantacha casoꞌ ninahuë paya! ¿Incha ipora nichaꞌëinco co noyahuëꞌ yonquirahuësoꞌ naniantaꞌhuaso marëꞌ? tënahuë.

²⁵ ¡Yosëíchin nanitaparin! Sinioro Quisocristo imarahuë niꞌton, ina catahuarinco. Ina marëꞌ: “Yosparinquën Tata Yosë,” itërahuë. Tëhuënchachin cancanëhuë quëran Yosë yanatëpirahuëꞌ, co noyahuëꞌ cancantato, co noyahuëꞌ ninahuë.