Romanos 6 - Chayahuita (Shahui)

Quisocristo imapatëhuaꞌ, co huachi oshahuanacasoꞌ paꞌyatarihuahuëꞌ

¹ Yosë inaora nohuanton nosororinpoa niꞌton, manta tërantaꞌ niahuaꞌ inaora nohuanton, oshanënpoaꞌ inquitiinpoaso marëꞌ ¿tëcarihua ti?

² ¡Co naporinhuëꞌ! Quisocristo imapatëhuaꞌ, chiminëhuaso pochin cancantatëhuaꞌ, co huachi oshahuanacasoꞌ paꞌyatarihuahuëꞌ.

³ “Quisocristo imarahuë huachi,” taꞌtëhuaꞌ, aporihuanëhuaꞌ. Ina noya chinpitacaso marëꞌ aporihuanëhuaꞌ. Aporihuanpatëhuaꞌ, Quisocristorëꞌquënpoaꞌ chiminëhuaso pochin ninëhuaꞌ. Ina chimininso pochachin co noyahuëꞌ yonquirëhuasopita aꞌporëhuaꞌ. Nani ina nitotëramaꞌ.

⁴ Quisocristo chiminpachina, paꞌpitopi. Aporintohuachinënpoara, canpoantaꞌ paꞌpitërinënpoaso pochin co noyahuëꞌ yonquirëhuasopita naniantërëhuaꞌ. Tata Yosë chiníquën nanantaton, Quisocristo ananpitaantarin. Canpoantaꞌ nasha cancan quëtërinpoaꞌ nasha pochin nanpicaso marëꞌ. Ina yonquiatëhuaꞌ, aporihuanëhuaꞌ.

⁵ Quisocristo chiminaponahuëꞌ, nanpiantarin. Inapochachin canpoantaꞌ co noyahuëꞌ yonquirëhuasopita naniantohuatëhuaꞌ, nanpiantarëso pochin noya noya cancantarihuaꞌ.

⁶ Catoꞌ cancan pochin yaꞌhuëtërinpoaꞌ. Aꞌna cancansoꞌ sopai yanatërin. Quisocristo imarëhuaꞌ niꞌton, co noyahuëꞌ cancantërëhuasoꞌ corosëquë patanantërëso pochin nitërëhuaꞌ. Ama huachi sopai natëcaso marëhuëꞌ napotërëhuaꞌ. Co noyahuëꞌ cancantërëhuasoꞌ chimininso pochin nitahuaꞌ.

⁷ Chimipisoꞌ co huachi yonquirinhuëꞌ oshahuanacasoꞌ. Inapochachin canpoantaꞌ Quisocristo imapatëhuaꞌ, co huachi oshanënpoa huaꞌanëntërinpoahuëꞌ.

⁸ Co noyahuëꞌ cancansoꞌ naniantohuatëhuaꞌ, Quisocristo pochachin noyápiachin cancantarihuaꞌ. Ina nohuitatëhuaꞌ, noya noya nanpiarëhuaꞌ.

⁹ Inasoꞌ nanpiantahuachina, co huachi chimianinhuëꞌ. Chimirin nani minsëaton, nanpimiataantarin.

¹⁰ Chiminpachina, oshanënpoa marëꞌ chiminin. Naporoꞌ oshanënpoaꞌ minsërin. Iporasoꞌ Yosëíchin natëcaso marëꞌ nanpimiataantarin.

¹¹ Inapochachin canpitantaꞌ ama huachi oshahuanacamasoꞌ yonquicosohuëꞌ. Quisocristo imaramaꞌ niꞌton, Yosëíchin natëcoꞌ.

¹² Ama oshanëma huaꞌanëntatë pochin nitatënquëmaꞌ camayápainquëmaso nohuantocosohuëꞌ. Yaꞌipi co noyahuëꞌ yonquiramasopita naniantatomaꞌ, noyasáchin yonquicoꞌ.

¹³ Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

¹⁴ Inapohuatamaꞌ, co huachi oshanëma huaꞌanëntatë pochin nitarinquëmahuëꞌ. Co yaꞌipi pënëntërinsoꞌ natëpiramahuëꞌ, inaora nohuanton, Yosë anoyacancantërinquëmaꞌ. Nosoroatënquëmaꞌ, catahuarinquëmaꞌ noya nicacamaso marëꞌ.

Huaꞌanënpoa pochin nininsoꞌ

¹⁵ Tëhuënchachin co huachi iráca pënëntërinsoꞌ natëcasoꞌ yaꞌhuërinhuëꞌ. Yosë nosoroatonpoaꞌ, nichaꞌërinpoaꞌ. Aꞌnaquënso nipirinhuëꞌ ina natanatonaꞌ, co mantaꞌ yanatëpihuëꞌ. “Noya oshahuanacasoꞌ,” toconpi. ¡Co ina pochin yonquicaso yaꞌhuërinhuëꞌ!

¹⁶ Insosona natëhuatëhuaꞌ, inasoꞌ huaꞌanëntarinpoaꞌ. ¡Nani nitotëramaꞌ ipora! Oshanënpoa natëhuatëhuaꞌ, ina huaꞌanëntarinpoaꞌ. Camaihuachinpoara, co noyahuëꞌ ninëhuaꞌ. Oshanënpoaꞌ co aꞌpoasëhuahuëꞌ chiminpatëhuaꞌ, parisitopiquë paꞌsarëhuaꞌ. Nipirinhuëꞌ, Yosë natëhuatëhuaꞌ, noya nicarihuaꞌ.

¹⁷ Iráca oshanëma natëtomaꞌ, co noyahuëꞌ nipiramahuëꞌ. Quisocristo nanamën aꞌchintohuachinënquëmara, noya natanamaꞌ. Yaꞌipi cancanëma quëran noya natëramaꞌ. Ina yonquiatëhuaꞌ, “Yosparinquën” itërëhuaꞌ Yosë.

¹⁸ Iporasoꞌ, co huachi oshanëma camaiarinquëmahuëꞌ. Nasha huaꞌanëmaꞌ yaꞌhuëtërinquëmaꞌ. Quisocristo natëtomaꞌ, noya nisaramaꞌ.

¹⁹ Iso pochin aꞌchintaranquëmaꞌ noya noya nitotacamaso marëꞌ. Canpitaora co nitotëramahuëꞌ. Iracasoꞌ yaꞌipi nonëma quëran huarëꞌ oshahuanacasoáchin paꞌyatëramaꞌ. Inapohuatamara, paꞌpi nishinahuënꞌ cancantëramaꞌ. Iporasoꞌ noyasáchin nicoꞌ. Inapohuatamaꞌ, noyápiachin cancantaramaꞌ.

²⁰ Iráca oshanëma natëhuatamara, co noyahuëꞌ ninamaꞌ. Co yonquiramahuëꞌ noya nicacamasoꞌ.

²¹ Inapohuatamara, ¿maꞌtaꞌ ina marëꞌ canaramaꞌ? Co ina marëꞌ canamiataramahuëꞌ. Topinan quëran yaꞌhuëramaꞌ. Ina pochin cancantohuatamaꞌ, chiminpatamaꞌ, parisitopiquë paꞌsaramaꞌ. Iráca ina pochin nipiramahuëꞌ, iporaso ina marëꞌ tapanamaꞌ.

²² Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

²³ Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.