Romanos 5 - Chayahuita (Shahui)

Yosë anoyacancantërinpoasoꞌ

¹ “Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

² Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

³ Iporasoꞌ parisitarihuarahuëꞌ, noya cancantarihuaꞌ. “Parisitohuatëhuaꞌ, Yosë catahuarinpoaꞌ imamiatacaso marëꞌ,” taꞌtëhuaꞌ, co sëtarihuahuëꞌ. Chiníquën cancantatëhuaꞌ, noya ahuantarihuaꞌ.

⁴ Noya ahuantohuatëhuaꞌ, chini chiníquën cancantarihuaꞌ niꞌton, Yosë noya niꞌninpoaꞌ. “Co naniantarinpoahuëꞌ,” taꞌtëhuaꞌ, inasáchin ninarihuaꞌ.

⁵ Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

⁶ Canpoara co nanitërëhuahuëꞌ chaꞌëcasoꞌ. Nipirinhuëꞌ, iráca oꞌmacasoꞌ nanihuachina, Quisocristo isoroꞌpaquë oꞌmarin. Oꞌmarahuaton, oshahuanoꞌsa marëꞌ chiminin.

⁷ Niꞌcoꞌ. Piyapi noya niponahuëꞌ, co insontaꞌ yaꞌhuërënamën chiminacasoꞌ nohuantërinhuëꞌ. Noya noya nipachin, nichaꞌëcaso marëꞌ aꞌnaraꞌ yaꞌhuërëtapon nimara.

⁸ Quisocristoso nipirinhuëꞌ oshahuanoꞌsa marëꞌ chiminin. Oshahuanpirëhuahuëꞌ, yaꞌhuërëtërinpoaꞌ. Yosë nohuanton, canpoa marëꞌ chiminin. Napoaton: “Ma noyacha Yosë nosororinpoa paya,” tënëhuaꞌ.

⁹ “Corosëquë huënainën paꞌnin. Oshanënpoa marëꞌ chiminin,” topatëhuaꞌ, Yosë noya niꞌsarinpoaꞌ. Napoaton ayaroꞌ tahuërintaꞌ catahuarinpoaꞌ. Naporoꞌ tahuëri co noyahuëꞌ nipisopita chiníquën anaꞌintarin. Imarëhuasopitaso nipirinhuëꞌ, co anaꞌintarinpoahuëꞌ. Quisocristo chachin nichaꞌësarinpoaꞌ.

¹⁰ Iráca oshahuanatëhuaꞌ, Yosë inimicotopirëhuahuëꞌ, huiꞌnin chiminin niꞌton, nanan anoyatërinpoaꞌ. Iporasoꞌ noya nipayarëhuaso pochin ninëhuaꞌ niꞌton, noya noya catahuarinpoaꞌ. Nanpiantarin niꞌton, catahuarinpoaꞌ noya chaꞌëcahuaso marëꞌ.

¹¹ Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

Atan, Cristo inapita napopisoꞌ

¹² Atanꞌton co noyahuëꞌ nicaton, oshahuanin. Ina marëꞌ chiminacasoꞌ yaꞌhuërin. Ina quëran yaꞌipinpoaꞌ co noyahuëꞌ nicatëhuaꞌ, chiminëhuaꞌ.

¹³ Coꞌhuara Moisësë pënënchatërasohuëꞌ, piyapiꞌsaꞌ oshahuanpi. Oshahuanpirinahuëꞌ, co pënëntërinsoꞌ yaꞌhuëyátërarinhuëꞌ niꞌton, co ina marëꞌ anaꞌintacasoꞌ yaꞌhuëꞌitonhuëꞌ.

¹⁴ Nipirinhuëꞌ, Atan quëran huarëꞌ yaꞌipi piyapiꞌsaꞌ chiminpi. Moisësë yaꞌhuëaquë huarëntaꞌ chiminaꞌpiapi. Yaꞌnan isoroꞌpaꞌ nipon, Yosëri pënënpirinhuëꞌ, Atan co natëtonhuëꞌ, oshahuanin. Ina quëran yaꞌipi piyapiꞌsantaꞌ co noyahuëꞌ nicatonaꞌ, oshahuanpi. Co Yosëri chachin pënënpirinhuëꞌ, inahuantaꞌ oshahuanpi. Atan pochin cancantatonaꞌ yaꞌipi piyapiꞌsaꞌ oshahuanpi. Quisocristoso nipirinhuëꞌ nanan anoyatinpoaso marëꞌ oꞌmarin.

¹⁵ Inasoꞌ yaꞌipinpoaꞌ nosororinpoaꞌ. Atanso nipirinhuëꞌ co ina pochin nininhuëꞌ. Co natërinso marëhuëꞌ oshanën yaꞌhuëtërin. Inapochachin yaꞌipi piyapiꞌsaꞌ oshahuanatonaꞌ, chiminpi. Ina quëran anaꞌintacasoꞌ yaꞌhuërin. Yosëso nipirinhuëꞌ inaora nohuanton, naꞌcon nosororinpoaꞌ. Nosoroatonpoaꞌ, huiꞌnin aꞌpaimarin naꞌaquënpoaꞌ anoyacancantinpoaso marëꞌ.

¹⁶ Atan co natërinhuëꞌ niꞌton, osha yaꞌhuërin. Aꞌnaíchin pënëninsoꞌ co natërinhuëꞌ niꞌton, anaꞌintacasoꞌ yaꞌhuërin. Nipirinhuëꞌ, Yosë nosororinpoasoꞌ co ina pochin nininhuëꞌ. Naꞌcon oshahuanpirëhuahuëꞌ, Quisocristo chiminin niꞌton, oshanënpoaꞌ inquitatonpoaꞌ, noya niꞌninpoaꞌ.

¹⁷ Aꞌna yaꞌpiíchin tëhuërin niꞌton, yaꞌipi piyapinpoaꞌ chiminacasoꞌ yaꞌhuërin. Aquëtë huarëꞌ Yosësoꞌ, inaora nohuanton nosoroatonpoa Quisocristo quëran nichaꞌërinpoaꞌ niꞌton, inarëꞌquënpoaꞌ nanpimiatatëhuaꞌ huaꞌanëntarihuaꞌ.

¹⁸ Atan co noyahuëꞌ ninin niꞌton, yaꞌipinpoaꞌ anaꞌintinpoasoꞌ yaꞌhuëpirinhuëꞌ. Quisocristo chiminin niꞌton, yaꞌipinpoaꞌ nanitërëhuaꞌ nanpimiatacasoꞌ. Imapatëhuaꞌ, co anaꞌintarinpoahuëꞌ.

¹⁹ Aꞌnaíchin co Yosë natërinhuëꞌ niꞌton, yaꞌipinpoaꞌ oshahuanëhuaꞌ. Aꞌnaso nipirinhuëꞌ Yosë natëton, chiminin. Ina marëꞌ naꞌaquënpoaꞌ anoyacancantërinpoaꞌ.

²⁰ Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

²¹ Oshahuanëhuaꞌ niꞌton, chiminpatëhuaꞌ, parisitomiatacasoꞌ yaꞌhuëpirinhuëꞌ. Yosësoꞌ inaora nohuanton, nosoroatonpoaꞌ, catahuarinpoaꞌ. Sinioro Quisocristo anoyacancantohuachinpoaꞌ, nanpimiatarihuaꞌ.