Romanos 3 - Chayahuita (Shahui)

¹ Cotioroꞌsaꞌ niꞌtonaꞌ, marca niacotopi. ¿Maꞌtaꞌ ina marëꞌ canapi?

² Naꞌcon canapi tënahuë. Yosëri naꞌcon catahuarin. Inahuaꞌton iráca nontërin. Nanamën chachin aninshitërin yaꞌhuëmiatacaso marëꞌ.

³ Aꞌnaquënsoꞌ co huachi ina natëpihuëꞌ. Ina niponahuëꞌ, co nanitërëhuëꞌ: “Yosësoꞌ co noꞌtëquën shaꞌhuitërinhuëꞌ,” taꞌcasoꞌ.

⁴ Yosërisoꞌ co onporonta nonpintarinhuëꞌ. Yaꞌipi piyapiꞌsaꞌ nonpinpirinahuëꞌ, Yosësoꞌ noꞌtëquënáchin nonin. Quiricanën quëran naporin: “Noꞌtëquënáchin nontërancoi niꞌton, aꞌnaquën nonpinapipirinënquënhuëꞌ, co onporontaꞌ minsëarinënquënhuëꞌ,” tënin.

⁵ Aꞌnaquën poꞌpin yonquipi: “Canpoa co noyahuë ninëhua niꞌton, Yosë noyasáchin nininsoꞌ aꞌninquëchin anitotërinpoaꞌ. Napoaton anaꞌintohuachinpoaꞌ, co noꞌtëquën anaꞌintërinpoahuëꞌ,” toconpi.

⁶ ¡Co ina pochin yonquicaso yaꞌhuërinhuëꞌ! Yosësoꞌ noya niꞌton, noꞌtëquën anaꞌintiinpoasoꞌ yaꞌhuërin. Co anaꞌintiinpoasoꞌ yaꞌhuërinhuëꞌ naporini, co ayaroꞌ tahuëri noꞌtëquën shaꞌhuichitonpoahuëꞌ.

⁷ Aꞌnaquëontaꞌ taponaꞌ: “Casoꞌ nonpinpirahuëꞌ, Yosësoꞌ noꞌtëquënáchin nonin. Nonpinahuë niꞌton, Yosë noꞌtëquënáchin noninso aꞌninquëchin anitotërinpoaꞌ. Napoaton co oshahuan pochin Yosë anaꞌintincosoꞌ yaꞌhuërinhuëꞌ,” toconpi. Co noꞌtëquën yonquipihuëꞌ.

⁸ Aꞌnaquënta napopi: “Huëcoꞌ manta tërantaꞌ niahuaꞌ Yosë naꞌcon naꞌcon catahuainpoaso marëꞌ. Paono chachiontaꞌ ina pochin aꞌchintërinpoaꞌ,” topi pinotonaco. Co noꞌtëquën yonquipihuëꞌ niꞌton, napopisopita noꞌtëquën anaꞌintacasoꞌ yaꞌhuërin.

Yaꞌipinpoaꞌ oshahuanëhuasoꞌ

⁹ ¿Onpopintaꞌ iporasoꞌ yonquiarihuaꞌ? Cotioroꞌsanpoa noya noya ninëhuaꞌ, ¿tëcarihua ti? ¡Co naporinhuëꞌ! Nani shaꞌhuitëranquëmaꞌ. Cotioroꞌsanpoaꞌ, nisha piyapiꞌsaꞌ, yaꞌipinpoaꞌ oshahuanëhuaꞌ.

¹⁰ Yosë quiricanënquë tapon: “Yaꞌipi piyapiꞌsaꞌ co noyahuëꞌ nipi. Co aꞌnaya tërantaꞌ noya nininhuëꞌ.

¹¹ Co noꞌtëquën yonquipihuëꞌ. Co inahuara nohuantopihuë Yosë chinotacaisoꞌ.

¹² Co Yosë iranën paꞌtopihuëꞌ, pëshonpi. Co aꞌnaya tërantaꞌ noya nininhuëꞌ.

¹³ Chimipi paꞌpitopisoꞌ iꞌsoatopinan pochin napoonin nonpi. Nonpintatonaꞌ, yaꞌhuan tomain yanquëëtërinso pochin naꞌa piyapiꞌsaꞌ aparisitopi.

¹⁴ Noꞌhuitatonaꞌ, piyapiꞌsaꞌ pinosápi.

¹⁵ Aꞌnaroáchin yaahuëtopi, yatëpatopi.

¹⁶ Insëquësona paꞌpachinara, piyapiꞌsaꞌ aparisitopi, asëtopi.

¹⁷ Piyapiꞌsaꞌ anoꞌhuitopi niꞌton, co noya niniꞌtonaꞌ yaꞌhuëpihuëꞌ. Co sano cancantopihuëꞌ.

¹⁸ Yosë tëꞌhuatacasoꞌ yaꞌhuëpirinhuëꞌ, co ina yonquipihuëꞌ,” tënin iráca Yosë quiricanënquë ninshitatonaꞌ.

¹⁹ Tëhuënchachin co noyahuëꞌ nicatëhuaꞌ, yaꞌipinpoaꞌ oshahuanëhuaꞌ. Yosë pënëntërinsoꞌ nitotopirëhuahuëꞌ, co natërëhuahuëꞌ niꞌton, anaꞌintinpoasoꞌ yaꞌhuërin.

²⁰ “Pënëntërinsoꞌ natëhuatëhuaꞌ, Yosë noya niꞌsarinpoaꞌ,” topirinahuëꞌ aꞌnaquën. Co ina marëꞌ noya niꞌninpoahuëꞌ. Pënëntërin quëran oshahuanëhuasoꞌ anitotërinpoaꞌ. Ina natanpatëhuara, “Tëhuënchachin oshahuanëhuaꞌ. Co noyahuëꞌ ninëhuaꞌ,” tënëhuaꞌ.

Quisocristo imapatëhuaꞌ, anoyacancantërinpoasoꞌ

²¹ Iporaso nipirinhuëꞌ Yosë anitotërinpoaꞌ onporahuatësona chaꞌëcasoꞌ. Co iráca pënëntërinsoꞌ natërëhua quëran noya cancantarihuahuëꞌ. Moisësë, pënëntonaꞌpiroꞌsaꞌ, inapita inachachin shaꞌhuitërinënpoaꞌ.

²² Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

²³ Yaꞌipinpoaꞌ oshahuanëhuaꞌ. Co aꞌnayanpoa tërantaꞌ Yosë pochin cancantërëhuahuëꞌ.

²⁴ Nipirinhuëꞌ, inaora nohuanton, Yosë nosororinpoaꞌ. Nosoroatonpoaꞌ, Quisocristo aꞌpaimarin nichaꞌëinpoaso marëꞌ. Ina imapatëhuaꞌ, Yosë noya niꞌsarinpoaꞌ.

²⁵ Yosë nohuanton, Quisocristo chiminin. Oshanënpoaꞌ inquitinpoaso marëꞌ chiminin. “Ca marëꞌ chiminin,” topatëhuaꞌ, oshanënpoaꞌ inquitarinpoaꞌ. Huënainën quëran anoyacancantarinpoaꞌ. Iráca piyapiꞌsaꞌ oshahuanpirinahuëꞌ, Yosëri co aꞌnaroáchin anaꞌintërinhuëꞌ. “Aꞌna tahuëri Quisocristo chiminpachin, oshanënaꞌ inquitarahuë,” taꞌton, co anaꞌintërinhuëꞌ.

²⁶ Iporaso huachi Quisocristo chachin aꞌpaimarin yaꞌhuërënamënpoaꞌ chiminacaso marëꞌ. “Quisocristo oshanënpoa marëꞌ chiminin,” topatëhuaꞌ, oshanënpoaꞌ inquitarinpoaꞌ. Noyápiachin cancan quëtarinpoaꞌ. Ina imapatëhuaꞌ, Yosë noya niꞌsarinpoaꞌ. Co canpoantaꞌ anaꞌintarinpoahuëꞌ.

²⁷ Napoaton co inso tëranta nocanacasoꞌ yaꞌhuërinhuëꞌ, tënahuë. Co pënëntërinsoꞌ natërëhuaso marëꞌ Yosë noya niꞌninpoahuëꞌ. Quisocristo naporinsoꞌ natërëhuaso marëꞌ nichaꞌërinpoaꞌ niꞌton, co aꞌnapita nocanacasoꞌ yaꞌhuërinhuëꞌ.

²⁸ Nani shaꞌhuitëranquëmaꞌ. Quisocristo imarëhuaso marëꞌ anoyacancantërinpoaꞌ. Co yaꞌipi pënëntërinsoꞌ natëpirëhuahuëꞌ, noya niꞌninpoaꞌ.

²⁹ Yosë yaꞌipi piyapinpoaꞌ nohuantërinpoaꞌ. Co cotioroꞌsaráchin nosororinhuëꞌ. Nisha piyapiꞌsantaꞌ nosororin. Yaꞌipinpoaꞌ nosororinpoaꞌ.

³⁰ Aꞌnaíchin Yosë yaꞌhuërin. Yaꞌipinpoaꞌ napopianachin nosororinpoaꞌ. Cotioroꞌsantaꞌ, nisha piyapiꞌsantaꞌ, Quisocristo imapachinaꞌ, anoyacancantarin.

³¹ Quisocristoíchin anoyacantërinpoaꞌ niꞌton, iráca pënëntërinsoꞌ ¿co huachi paꞌtërinhuë pochin nitërëhua ti? ¡Co naporinhuëꞌ! Ina quëran oshahuanëhuasoꞌ nitotarihuaꞌ. Quisocristo imapatëhuaꞌ, catahuarinpoaꞌ noya natëcasoꞌ.