Romanos 2 - Chayahuita (Shahui)

Yosëri noꞌtëquën anaꞌintërinsoꞌ

¹ Aꞌnaquëmaꞌ iyaroꞌsaꞌ piyapiꞌsaꞌ yonquirapiratomaꞌ: “Pasoꞌ quëmapi co noyahuëꞌ ninin,” tënamaꞌ. Napoapomarahuëꞌ, ina pochachin canpitantaꞌ co noyahuëꞌ ninamaꞌ. Napoatomaꞌ, ninaꞌintaramaꞌ.

² “Co noyahuëꞌ nipatamaꞌ, anaꞌintaranquëmaꞌ,” tënin Yosë. Noꞌtëquën inasoꞌ anaꞌintarin, nitotërëhuaꞌ.

³ “Pasopita oshahuanpi,” tënamaꞌ. Nipirinhuëꞌ, canpitantaꞌ co noyahuëꞌ nipatamaꞌ, Yosë anaꞌintarinquëma co chaꞌësaramahuëꞌ.

⁴ Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

⁵ Canpitaso nipirinhuëꞌ, co natantochináchinhuëꞌ cancantëramaꞌ. Co oshanëmaꞌ yaaꞌporamahuëꞌ. Napoaton ayaroꞌ tahuëri chini chiníquën anaꞌintarinquëmaꞌ. Naporoꞌ yaꞌipi piyapiꞌsaꞌ noꞌtëquën anaꞌintarin.

⁶ Yaꞌipi ninëhuasopita Yosë nitotërin. Ayaroꞌ tahuëri ina yonquiaton, noꞌtëquën shaꞌhuitarinpoaꞌ. Noya nipatëhuaꞌ, noya acoarinpoaꞌ. Coꞌsoꞌ noya nipatëhuahuëꞌ, anaꞌintarinpoaꞌ.

⁷ Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

⁸ Nipirinhuëꞌ, canpoara nohuantërëhuasoráchin nipatëhuaꞌ, noꞌhuiarinpoaꞌ. Noꞌtëquën anitotopirinpoahuëꞌ co natëhuatëhuahuëꞌ, anaꞌintarinpoaꞌ. Co noyahuëꞌ nipatëhuaꞌ, chiníquën anaꞌintarinpoaꞌ.

⁹ Yaꞌipi co noyahuëꞌ nipisopita noꞌtëquën anaꞌintarin. Naporoꞌ chiníquën parisitapi. Cotioroꞌsaꞌ noꞌtëquën chachin anaꞌintarin. Nisha piyapiꞌsantaꞌ co noyahuëꞌ nipachina, inapochachin anaꞌintarin.

¹⁰ Noya nipisopitaso nipirinhuëꞌ, noya niꞌsarin. Noya noya acorarin. Asanocancanarin. Cotioroꞌsaꞌ noꞌtëquën chachin napotarin. Nisha piyapiꞌsantaꞌ inapochachin nitarin. Yaꞌipinpoaꞌ noya nipatëhuaꞌ, nichaꞌësarinpoaꞌ.

¹¹ Yosësoꞌ yaꞌipinpoaꞌ napopianachin niꞌninpoaꞌ.

¹² Iráca Moisësëri cotioroꞌsaꞌ pënënin nani maꞌsha natëcaisoꞌ. Cotioroꞌsaráchin pënënin. Co ina natëhuachinahuëꞌ, oshahuanpi. Ina marëꞌ Yosëri anaꞌintarin. Aꞌnapitaso nipirinhuëꞌ co pënëntërinsoꞌ nitotopihuëꞌ. Co nitotatonahuëꞌ, co ina natëcaisoꞌ yaꞌhuëpirinhuëꞌ. Co noyahuëꞌ nipachinaꞌ, anaꞌintarin chachin inahuantaꞌ.

¹³ Cotioroꞌsasoꞌ Moisësë pënëntërinsoꞌ natanaponaraihuëꞌ, co natëtopihuëꞌ. Napoaton co Yosëri noya niꞌninhuëꞌ. Noꞌtëquën natëpi naporini, Yosëri noya niꞌitonhuëꞌ.

¹⁴ Nisha piyapiꞌsasoꞌ co Moisësë pënëntërinsoꞌ nitotopihuëꞌ. Co nitotaponaraihuëꞌ, aꞌnaquën noya nipi. Inahuara cancanëna quëran nitotopi niꞌton, napopi.

¹⁵ Cancanëna quëran Yosëri anitotërin noya nicacaisoꞌ. Co noyahuëꞌ nipachinara, inahuara nitotopi. “Co inapocaso nipirinhuëꞌ, inaporëhuaꞌ,” topi yonquiatonaꞌ. Inapochachin noya nipachinara, inantaꞌ cancanëna quëran nitotopi.

¹⁶ Ayaroꞌ tahuëri yaꞌipi co noyahuëꞌ yonquirëhuasopita aipitarinpoaꞌ. Poꞌoana quëran maꞌsona tërantaꞌ onporëhuasopita aꞌninquëchin anitotarinpoaꞌ. Naporoꞌ tahuëri Tata Yosë nohuanton, Quisocristo noꞌtëquën shaꞌhuitarinpoaꞌ. Co noyahuëꞌ nipatëhuaꞌ, anaꞌintarinpoaꞌ. Ina nanan yaꞌipi parti shaꞌhuirarahuë.

Co cotioroꞌsaꞌ tëranta Yosë pënëntërinsoꞌ natëpisohuëꞌ

¹⁷ Aꞌnaquëmaꞌ cotioroꞌsanquëmaꞌ niꞌton, aꞌnapita nocanamaꞌ: “Moisësë pënëntërinsoꞌ natëhuatoi, chaꞌësarai,” tënamaꞌ. “Yosë naꞌcon naꞌcon nosororincoi,” tomantatomaꞌ, aꞌnapita nocanamaꞌ.

¹⁸ Yosë nohuantërinsoꞌ nani nitotëramaꞌ. Yosë quiricanën aꞌchintërinënquëmaꞌ niꞌton, nitotëramaꞌ noya nicacamasoꞌ.

¹⁹ Nisha piyapiꞌsantaꞌ yaaꞌchintëramaꞌ. Inapitasoꞌ co Yosë nohuitatonaraihuëꞌ, somaraya pochin niconpi. Tashi pochin cancantopi.

²⁰ Co Yosë nanamën nitotopihuëꞌ niꞌton, yaaꞌchintëramaꞌ. “Yosë noꞌtëquën pënënincoi niꞌton, noya noya nitotërai. Aꞌnapitasoꞌ co quiya pochin nitochátërapihuëꞌ,” tënamaꞌ.

²¹ Aꞌnapita aꞌchintopiramahuëꞌ, ¿onpoatomataꞌ canpita chachinsoꞌ co yonquiramahuë? “Ama ihuatocosohuëꞌ,” tapomarahuëꞌ, ¿onpoatomataꞌ ihuatëramaꞌ?

²² “Ama aꞌna quëmapi saꞌin monshitocosohuëꞌ,” tapomarahuëꞌ, ¿onpoatomataꞌ canpitantaꞌ monshihuanamaꞌ? Piyapiꞌsaꞌ mamanshi moshahuachinara, noꞌhuiramaꞌ. “Yosëíchin chinotacaso nipirinhuëꞌ,” tënamaꞌ. Napoapomarahuëꞌ, ¿onpoatomataꞌ co cancanëma quëran huarëꞌ chinotëramahuëꞌ? Co mamanshi moshapiramahuëꞌ, moshatopiso pëiquë ihuatëramaꞌ.

²³ “Quiyasáchin Moisësë pënëntërinsoꞌ nitotërai,” tënamaꞌ. Napoapomarahuëꞌ, co natëramahuëꞌ. Ina marëꞌ aꞌnapitari Yosë pinopi.

²⁴ Co noyahuëꞌ cancantëramaꞌ niꞌton, nisha piyapiꞌsantaꞌ co Yosë noya niꞌsapihuëꞌ. Quiricanënquë chachin naporin:

²⁵ “Quiyasoꞌ Yosë piyapinënpitacoi,” taꞌtomaꞌ, marca niacotëramaꞌ. Moisësë pënëntërinsoꞌ noya natëhuatamaꞌ, noꞌtëquën niacotëramaꞌ. Nipirinhuëꞌ, co natëhuatamahuëꞌ, topinan quëran marca niacotëramaꞌ.

²⁶ Nisha piyapiꞌsantaꞌ niponaraihuëꞌ, Yosë natëhuachinaꞌ, piyapinënpita pochin niꞌsarin.

²⁷ Co marca niacotaponaraihuëꞌ, Yosë natëhuachinaꞌ, shaꞌhuirapiaponënquëmaꞌ. Canpitasoꞌ pënëntërinsoꞌ nitotapomarahuëꞌ, co natëhuatamahuëꞌ, Yosë anaꞌintarinquëmaꞌ.

²⁸ Cotioroꞌsanquëmaꞌ nipiramahuëꞌ, co ina marëꞌ piyapinënpita pochin niꞌninquëmahuëꞌ. Inapochachin Yosë marcanëntaꞌ co topinan nonënpoaquë niacotacasoꞌ yaꞌhuërinhuëꞌ.

²⁹ Yaꞌipi cancanënpoa quëran Yosë imapatëhuaꞌ, tëhuënchachin piyapinënpita pochin niꞌsarinpoaꞌ. Marcanën cancanënpoaquë acotërinpoaꞌ. Co nonënpoaquë acotërinpoahuëꞌ. Ispirito Santo anoyacancantërinpoaꞌ. Ina quëran noya niꞌninpoaꞌ. Co piyapiꞌsaꞌ paꞌyatopirinënpoahuëꞌ, Yosësoꞌ noya niꞌsarinpoaꞌ.