Romanos 16 - Chayahuita (Shahui)

Nipayarinsopita yonquirinsoꞌ

¹ Imoya Huipi noya sanapi, tënahuë. Inantaꞌ noya imarin. Sincriaquë yaꞌhuaton, tiacona yaꞌconin. Inaquë imapisopita naꞌcon catahuarin niꞌton, noya niꞌcoꞌ.

² Canpitataquë canconpachin, Quisocristo imaramaꞌ niꞌton, noya nontocoꞌ. Maꞌsha pahuantohuachin, quëtocoꞌ. Ina sanapi naꞌa piyapiꞌsaꞌ catahuarin. Cantaꞌ catahuarinco.

³ Pirisira, Aquiro, inapita yonquiato, saludos aꞌpatarahuë. Naꞌcon catahuarinaco Quisocristo nanamën aꞌchinacaꞌhuaso marëꞌ.

⁴ Iráca aꞌnapita yatëpapirinacohuëꞌ, inapita co chimirin tëꞌhuatatonaraihuëꞌ, catahuarinaco. Ina marëꞌ piꞌpíshachin shichiminaponaraihuëꞌ, catahuarinaco niꞌton, chaꞌërahuë. Ina marëꞌ “Yosparinquën,” itërahuë. Nisha piyapiꞌsaꞌ imapisopitarintaꞌ “Yosparinquën,” itopi inahuarintaꞌ.

⁵ Aquiro pëinënquë chachin aꞌnaquën niyontonpi Yosë chinotacaiso marëꞌ. Inapitantaꞌ yonquiato, saludos aꞌpatarahuë. Ipinitontaꞌ saludos aꞌpatarahuë. Asia parti paꞌpatëra, inaꞌton Quisocristo imarin. Inaroꞌco noya nipayarai.

⁶ Mariantaꞌ saludos aꞌpatarahuë. Naꞌcon catahuarinquëmaꞌ.

⁷ Antronico, Coniasë inapitantaꞌ saludos aꞌpatarahuë. Inapitasoꞌ ca pochin cotio piyapi nipi. Quisocristo imapi antaꞌ. Imaraiso marëꞌ napopináchin tashinan pëiquë poꞌmorinacoi. Yosë nohuanton, iráca inahuantaꞌ acopi aꞌchinacaiso marëꞌ. Noya aꞌchinpi. Coꞌhuara ca imayatërasocohuëꞌ, imapi.

⁸ Anpriasëntaꞌ saludos aꞌpatarahuë. Inantaꞌ Quisocristo imarin. Inaroꞌco noya nipayarai.

⁹ Orpanontaꞌ saludos aꞌpatarahuë. Inantaꞌ noya catahuarincoi Quisocristo nanamën aꞌchinaꞌhuaiso marëꞌ. Istaquisëntaꞌ noya nipayarai niꞌton, saludos aꞌpatarahuë.

¹⁰ Apirisëntaꞌ saludos aꞌpatarahuë. Yaꞌipi cancanën quëran Quisocristo natërin. Aꞌnapitari aparisitopirinahuëꞌ, co aꞌporinhuëꞌ. Aristoporo pëinënquë yaꞌhuëpisopitantaꞌ saludos aꞌpatarahuë.

¹¹ Irotionontaꞌ saludos aꞌpatarahuë. Inantaꞌ cotio piyapi. Narsiso pëinënquë yaꞌhuëpisopitantaꞌ Quisocristo imapisopita saludos aꞌpatarahuë.

¹² Imoya Tripina, Imoya Triposa, inapitantaꞌ saludos aꞌpatarahuë. Nani tahuëri piyapiꞌsaꞌ catahuapi Yosë imacaiso marëꞌ. Imoya Pirisitantaꞌ noya niꞌnahuë. Inantaꞌ naꞌcon piyapiꞌsaꞌ catahuarin niꞌton, saludos aꞌpatarahuë.

¹³ Nopontaꞌ saludos aꞌpatarahuë. Nóya Quisocristo marëꞌ sacatërin. Aꞌshiontaꞌ yonquirahuë. Mamahuë pochin niꞌnahuë carintaꞌ.

¹⁴ Asincrito, Priconti, Irimasë, Patropasë, Irimisë, yaꞌipi imapisopita inaquë yaꞌhuëpisoꞌ, inapitantaꞌ saludos aꞌpatarahuë.

¹⁵ Pirorocontaꞌ Coniarë chachin saludos aꞌpatarahuë. Niriontaꞌ oshinë chachin yonquiato, saludos aꞌpatarahuë. Orinpasëntaꞌ yonquiarahuë. Yaꞌipi imapisopita inapitarëꞌ niyontonpisoꞌ saludos aꞌpatarahuë.

¹⁶ Imaramasopita capini noya ninosoroatomaꞌ, nisëꞌquëcoꞌ. Aꞌnapita Quisocristo imarinsopitantaꞌ nisha nisha parti yaꞌhuëpisopita saludos aꞌpatarinënquëmaꞌ.

¹⁷ Quisocristo nanamën nóya aꞌchintërinënquëmaꞌ. Aꞌnaquënso nipirinhuëꞌ co noꞌtëquën aꞌchinpihuëꞌ. Yaanishacancantopi. Niꞌcona, iyaroꞌsaꞌ, nonpintochinënquëmaꞌ. Insëquësona aꞌchintohuachinara, nisha nisha yonquiapi. Ama inapita natancosohuëꞌ. Tananpitocoꞌ paꞌinaꞌ.

¹⁸ Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

¹⁹ Canpitaso nipirinhuëꞌ noya natëramaꞌ niꞌton, yaꞌipi piyapiꞌsaꞌ natantopi. Ina marëꞌ noya cancantërahuë. Naꞌcon yonquicoꞌ noya nicacamaso marëꞌ. Ama oshahuanamaso marëꞌ yonquicosohuëꞌ.

²⁰ Yosëíchin catahuarinpoaꞌ sano cancantacasoꞌ. Sopai yanonpintopirinquëmahuëꞌ, Yosë catahuarinquëmaꞌ niꞌton, aꞌnaroáchin sopai minsëaramaꞌ. Canpita marëꞌ Yosë nontarahuë. Inaora nohuanton, Sinioro Quisocristo noya catahuainquëmaꞌ, tënahuë.

²¹ Timotiontaꞌ saludos aꞌpatarinquëmaꞌ. Inasoꞌ catahuarinco aꞌchinaꞌhuasoꞌ. Nosio, Cason, Sosipatro, inapitantaꞌ saludos aꞌpatarinënquëmaꞌ. Inapitasoꞌ cotio piyapiꞌsaꞌ.

²² Ca Tirsioco iso quirica ninshitaranquëmaꞌ. Paono shaꞌhuitërincosoꞌ ninshitaranquëmaꞌ. Canpitantaꞌ Yosë imaramaꞌ niꞌton, saludos aꞌpataranquëmaꞌ.

²³ Acayontaꞌ yonquiatënquëmaꞌ, saludos aꞌpatarinquëmaꞌ. Ina pëinënquë yacapatërahuë. Inaquë chachin imaraisopita niyontonai Yosë chinotaꞌhuaiso marëꞌ. Irasitontaꞌ saludos aꞌpatarinquëmaꞌ. Iso ninanoquë coriqui tapanaꞌpi inasoꞌ. Iya Coartontaꞌ saludos aꞌpatarinquëmaꞌ. [

²⁴ Inaora nohuanton, Sinioro Quisocristo naꞌcon catahuainquëmaꞌ. Amen, tënahuë.]

Ma noyacha Yosëso paya, itahuaꞌ

²⁵ Nani tahuëriya Yosë chinotahuaꞌ. Yaꞌipi nanitaparin. Ina achinicancaninquëmaꞌ imamiatacamaso marëꞌ. Nanamën tëninso pochachin catahuarinquëmaꞌ. Ina nanan chachin aꞌchintëranquëmaꞌ. Quisocristo nanamën inasoꞌ. Iráca quëran huarëꞌ co nanamën nitotopirinahuëꞌ, iporasoꞌ Yosë anitotërinpoaꞌ.

²⁶ Quiricanën quëran anitotërinpoaꞌ. Iráca aꞌnaya aꞌnaya ninotonaꞌ, Yosë nohuanton, ninshitopi. Iráca quëran huarëꞌ Yosë yaꞌhuërin. Co onporontaꞌ chiminaponhuëꞌ. Nanpimiatarin. Ina nohuanton, nanamën yaꞌipi parti shaꞌhuiarëhuaꞌ. Nisha nisha piyapiꞌsaꞌ anitotarëhuaꞌ natëcaiso marëꞌ.

²⁷ Yosëíchin chinotacasoꞌ yaꞌhuërin. Inaíchin yaꞌipi nitotërin. Quisocristo catahuarinpoaꞌ noya noya ina chinotacaso marëꞌ. Ipora quëran huarëꞌ inasáchin chinotahuaꞌ. Ama onporontaꞌ naniantahuasohuëꞌ. Amen. Nani ninshitëranquëma huachi. Paono