Romanos 15 - Chayahuita (Shahui)

Nicatahuacasoꞌ yaꞌhuërinsoꞌ

¹ Canpoasoꞌ yaꞌipi cancanënpoa quëran imarëhuaꞌ. “Quisocristoíchin nichaꞌërinpoaꞌ,” taꞌtëhuaꞌ, co nisha nisha yonquirëhuahuëꞌ. Aꞌnaquënso nipirinhuëꞌ co yaꞌipi cancanëna quëran natëyátërapihuëꞌ. Inapitantaꞌ oshaquëran pënënatëhuaꞌ, catahuahuaꞌ noya imainaꞌ. Ama canpoara nohuantërëhuasoráchin yonquiaꞌhuasohuëꞌ.

² Aꞌnapita yonquiatëhuaꞌ, catahuahuaꞌ noya cancanchinaꞌ. Catahuahuatëhuaꞌ, noya noya imasapi.

³ Quisocristosoꞌ co inaora nohuantërinsoꞌ yonquirinhuëꞌ. Yosëíchin natërin. Ina nontaton, itërin: “Quëma inimiconënpita Tata, noꞌhuirinënquën. Natëranquën niꞌton, noꞌhuirinaco cantaꞌ,” itërin. Quiricanënquë naporinso chachin ninin.

⁴ Iráca Yosë quiricanënquë naꞌcon ninshitopi. Canpoantaꞌ yonquicaso marëꞌ napopi. “Iráca imapisopitantaꞌ maꞌsha onpoaponaraihuëꞌ, Yosë yonquiatonaꞌ, ahuantopi. Yosëri noya catahuahuachina, imamiatopi. Inapochachin Yosë noya catahuarinpoaꞌ canpoantaꞌ,” taꞌcaso marëꞌ ninshitopi.

⁵ Yosësoꞌ catahuarinpoaꞌ yaꞌipiya ahuantacasoꞌ. Ina achinicancaninpoaꞌ, ina pochin cancantacaso marëꞌ. Ina catahuainquëmaꞌ noya ninicatomaꞌ yaꞌhuëcamaso marëꞌ. Quisocristo naporinso pochachin nicoꞌ.

⁶ Ina quëran co nisha nisha yonquiaramahuëꞌ. Napopináchin cancantatomaꞌ, nóya Yosë chinotaramaꞌ. Huiꞌnin chachin huaꞌanëntërinpoaꞌ, Quisocristo imarëhuasoꞌ. “Ma noyacha Yosësoꞌ catahuarinpoa paya,” tosaramaꞌ.

Nisha piyapiꞌsantaꞌ Yosë imacaiso yaꞌhuërinsoꞌ

⁷ Quisocristo co nocaninpoahuëꞌ. Ina pochin canpitantaꞌ ninosoroatomaꞌ, ama ninocancosohuëꞌ. Nisha nisha piyapinpoaꞌ niꞌtëhuaꞌ, piꞌpisha nisha inachintërëhuaꞌ. Nisha nisha nirihuarahuëꞌ, noya ninontahuaꞌ. Ina quëran “Ma noyacha Yosëri catahuarin niꞌton, ninosoropi paya,” tosapi.

⁸ Iráca cotioroꞌsaꞌ shimashonënaꞌ nontaton, Yosëri itërin: “Aꞌna tahuëri Cristo aꞌpaimarahuë,” itërin. Napoaton Quisocristo aꞌpaimarin cotioroꞌsaꞌ catahuacaso marëꞌ. Shaꞌhuitërin niꞌton, aꞌpaimarin. Co onporontaꞌ nonpininhuëꞌ.

⁹ Nisha piyapiꞌsarintaꞌ imacaiso marëꞌ oꞌmarin. Aꞌchintohuachinara, inahuantaꞌ Yosë chinotapi. “Ma noyacha nosororinpoa paya,” tosapi. Quiricanënquë ninshitopi. “Nisha nisha piyapiꞌsaꞌ yaꞌhuërinquë, Sinioro, chinotaranquën. Yonquiatënquën, cantararahuë,” tënin.

¹⁰ Ina quëran taantarin: “Cotioroꞌsaꞌ Yosë chinotatonaꞌ, noya cancantopi. Canpitantaꞌ nisha piyapiꞌsanquëmaꞌ nipomarahuëꞌ, ¡ina chinotatomaꞌ, noya cancantocoꞌ!” tënin.

¹¹ Naquëranchin taantarin: “Tata Yosë chinotatomaꞌ: ‘Ma noyanquëncha quëmaso paya,’ itocoꞌ. Nisha nisha piyapiꞌsaquëmantaꞌ ina chinotocoꞌ,” tënin.

¹² Isaiasëntaꞌ Quisocristo ninoton, ninshitërin. “Aꞌna tahuëri Quisi shiin nasitimapon. Cotio piyapi niponahuëꞌ, mashotohuachin, yaꞌipi piyapiꞌsaꞌ huaꞌanëntarin. Nisha nisha piyapiꞌsarintaꞌ ina natëtonaꞌ, ninarapi,” tënin.

¹³ Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

¹⁴ Canpitasoꞌ iyaroꞌsaꞌ, nóya piyapinquëmaꞌ. Yosë nanamën noya nitotëramaꞌ. Napoaton nipënënamasoꞌ nanitaramaꞌ, tënahuë.

¹⁵ Napoaponahuëꞌ, chiníquën miachin pënënatënquëmaꞌ, ninshitaranquëmaꞌ naꞌcon naꞌcon ayonquicaꞌhuanquëmaso marëꞌ. Yosë nosoroatonco, acorinco nanamën aꞌchinaꞌhuaso marëꞌ.

¹⁶ Quisocristo chachin aꞌparinco nisha nisha piyapiꞌsaꞌ aꞌchintaꞌhuaso marëꞌ. Nanamën aꞌchintarahuë inapitantaꞌ imacaiso marëꞌ. Aꞌchinato, Yosë marëꞌ sacatarahuë. Nisha piyapiꞌsantaꞌ imapachinaꞌ, Ispirito Santori yaꞌcoancantarin. Noyápiachin cancan quëtarin. Ina marëꞌ Yosëri noya niꞌsarin.

¹⁷ Quisocristo catahuarinco niꞌton, nóya aꞌchinahuë. Napoaton noya cancantërahuë.

¹⁸ Quisocristo noya catahuahuachincora, nisha nisha piyapiꞌsaꞌ aꞌchintërahuë. Ina nohuanton, noya ninahuë niꞌton, natëpi. Co catahuarincohuëꞌ naporini, co imaitonahuëꞌ. Napoaton inasáchin shaꞌhuitaranquëmaꞌ.

¹⁹ Tëhuënchachin Ispirito Santo ananitërinco niꞌton, naꞌa caniaꞌpiroꞌsaꞌ aꞌnaroáchin anoyatërahuë Yosë natëcaiso marëꞌ. Ina niꞌsahuatonaꞌ, natëpi. Ispirito Santori yaꞌcoancantërin niꞌton, imapi. Quirosarinquë aꞌchintërahuë. Ina quëran paꞌsápato, Iriricoquë huarëꞌ Quisocristo nanamën aꞌchintëraꞌpiarahuë. Yaꞌipi parti pënëntërahuë.

²⁰ Insëquësona aꞌna piyapiri aꞌchintohuachina, co inaquësoꞌ aꞌchinahuëꞌ. Co Quisocristo nohuitopiquëhuëꞌ paꞌnahuë. Ina marëꞌ acorinco niꞌton, inaporinquëráchin aꞌchinaꞌhuasoꞌ nohuantërahuë.

²¹ Yosë quiricanënquë ninorin: “Nisha nisha parti co Yosë nanamën natanaponaraihuëꞌ, natanapi. Co nitotopirinahuëꞌ, aꞌna tahuëri nitotapi,” tënin. Ipora huarëꞌ nisha nisha parti aꞌchintërahuë.

Nomaquë yapaꞌninsoꞌ

²² Napoaton huaꞌquiꞌ nicapënquëmaꞌ yapaꞌpirahuëꞌ, paꞌsápato, co nanitërahuëꞌ.

²³ Isëquë nani yaꞌipi aꞌchintërahuë. Naporahuaton, yaꞌnipishahuëꞌ yaniꞌnanquëma niꞌton, iporasoꞌ nicapënquëmaꞌ paꞌsarahuë.

²⁴ Nani yonquirahuë Ispaniaꞌpaꞌ aꞌchinaꞌhuaso marëꞌ. Inatohuaꞌ paꞌpato, nirapënquëmaꞌ. Naporo huarëꞌ ninohuitarihuaꞌ. Huaꞌquimiáchin yacapatënquëmaꞌ, piꞌpian tërantaꞌ aꞌchintaranquëmaꞌ. Ina quëran yapaꞌpato, catahuaco noya paꞌi, topirahuëꞌ.

^25-26 Iporaso nipirinhuëꞌ Quirosarinquëꞌton paꞌsarahuë. Inatohuaꞌ naꞌa imapisopita yaꞌhuëpirinahuëꞌ. Maꞌsha pahuantopi niꞌton, parisitapi. Ina natantahuatonaꞌ, Masitoniaquë imapisopitari inahuara nohuanton yacatahuapi. Acayaquë imapisopitarintaꞌ yacatahuapi. Pahuantërinsopita nosoroatonaꞌ, coriqui yontonpisoꞌ quëtërinaco. Ina quëtontaꞌhuaso marëꞌ paꞌsarahuë.

²⁷ Inahuantaꞌ Quisocristo imapi niꞌton, catahuatacaisoꞌ paꞌyatopi. “Cotioroꞌsaꞌ imapisopita Yosë nanamën nitotatonaꞌ, aꞌchintërinënpoaꞌ niꞌquëhuarëꞌ, canpoarintaꞌ maꞌsha quëtacasoꞌ yaꞌhuërin. Nisha piyapinpoaꞌ nipirëhuahuëꞌ, Yosë nohuitacaso marëꞌ catahuarinënpoaꞌ niꞌton, canpoarintaꞌ catahuahuaꞌ ama maꞌsha pahuanchinasohuëꞌ,” nitopi.

²⁸ Napoaton cari coriqui quëtapo paꞌsarahuë. Huënantahuato, nicapënquëmaꞌ paꞌsarahuë. Ina quëran Ispaniaquë paꞌsarahuë.

²⁹ Canpitataquë paꞌpato, Quisocristo noya catahuarinco nanamën aꞌchintaꞌhuanquëmaso marëꞌ, tënahuë.

³⁰ Canpitantaꞌ iyaroꞌsaꞌ Quisocristo imaramaꞌ. Ispirito Santo catahuarinpoaꞌ niꞌton, ninosoroarëhuaꞌ. Napoaton chiníquën Yosë nontocoꞌ catahuainco.

³¹ Cotia parti naꞌa piyapiꞌsaꞌ co Yosë natëpihuëꞌ. Inatohuaꞌ paꞌpato, Yosë nontocoꞌ ama macainacoso marëhuëꞌ. Naporahuaton, coriqui quëtontahuato, Yosë nontocoꞌ cotioroꞌsaꞌ imapisopita Quirosarinquë yaꞌhuëpisoꞌ noya nicainacoiso marëꞌ.

³² Ina quëran Yosë nohuanton, canpitataquë paꞌsarahuë. Noya cancantato, nontaranquëmaꞌ. Noya ninontohuatëhuaꞌ, chiníquën cancantarahuë.

³³ Yosëíchin asanocancaninpoaꞌ. Canpitantaꞌ noya catahuainquëmaꞌ, tënahuë. Amen.