Romanos 14 - Chayahuita (Shahui)

Co ninocanacasoꞌ yaꞌhuërinsohuëꞌ

¹ Aꞌnaquënsoꞌ Quisocristo imasapirinahuëꞌ, co yaꞌipi cancanëna quëran natëyátërapihuëꞌ. “Pënëntërinsontaꞌ natëcasoꞌ yaꞌhuërin,” topi. Inapitantaꞌ huëꞌpachinaꞌ, noya nontocoꞌ. “Huëcoꞌ iyaroꞌsaꞌ Yosë chinotahuaꞌ,” itatomaꞌ, cortoquë ichiyaꞌconcoꞌ. Ama ninocanacamaso marëꞌ ninontocosohuëꞌ.

² Aꞌnaquënsoꞌ “Quisocristoíchin nichaꞌërinpoaꞌ niꞌton, yaꞌipi cosharoꞌ noya capacasoꞌ,” taꞌtonaꞌ yaꞌipi caꞌpi. Aꞌnapitaso nipirinhuëꞌ, “Nosha caꞌpatëhuaꞌ, oshahuanëhuaꞌ,” taꞌtonaꞌ yaꞌipi nosha aꞌpopi.

³ Nosha caꞌpatamaꞌ, ama nosha aꞌporoꞌsaꞌ nocancosohuëꞌ. Nosha aꞌpohuatamantaꞌ “Nosha caꞌnamaꞌ niꞌton, co noyahuëꞌ ninamaꞌ,” ama itocosohuëꞌ. Cato chachinquëmaꞌ Yosë noya niꞌninquëmaꞌ niꞌton, ama ninapotocosohuëꞌ.

⁴ Co aꞌnapita piyapinën nocanacaso yaꞌhuërinhuëꞌ. Piyapinën noya nipachina, co noyahuëꞌ nipachinantaꞌ huaꞌanëni nitotarinsoꞌ. Yosëíchin yaꞌipinpoaꞌ huaꞌanëntërinpoaꞌ niꞌton, noꞌtëquën shaꞌhuitarinpoaꞌ. Inasáchin nanitërin achinicancainpoasoꞌ. Co canpoa capinisoꞌ ninocanacasoꞌ yaꞌhuërinhuëꞌ.

⁵ Inapochachin aꞌnaquën: “Cotio chinoto tahuëri noya noya,” topi. Naporoꞌ tahuëri chinotatonaꞌ, Yosë chinotopi. Aꞌnapitaso nipirinhuëꞌ “Nani tahuëri noya Yosë chinotacasoꞌ,” topi. Co tahuëri imarëhuahuëꞌ. Quisocristo imarëhuasoꞌ. Napoaton ama nisha nisha yonquicosohuëꞌ. Aꞌnaya aꞌnayanquëmaꞌ cancanëma quëran naꞌcon yonquicoꞌ noya nicacamaso marëꞌ.

⁶ Ma tahuërisona chinotohuatamaꞌ, Yosë yonquiatomaꞌ, ina chinotaramaꞌ. Inapochachin nosha caꞌpatamaꞌ, Yosë yonquiatomaꞌ, coshatëramaꞌ. “Yosparinquën, Sinioro,” itëramaꞌ. Co nosha caꞌnaꞌpinquëmahuëntaꞌ Yosë yonquiatomaꞌ, coshatëramaꞌ. “Yosparinquën, Sinioro,” itëramaꞌ canpitantaꞌ.

⁷ Co canpoara nipaꞌyatacaso marëꞌ yaꞌhuërëhuahuëꞌ. Chiminpatëhuantaꞌ co canpoara marëꞌ chiminarihuahuëꞌ.

⁸ Sinioro piyapinënpoaꞌ ninëhuaꞌ. Ina natëcaso marëꞌ nanpitëhuaꞌ, yaꞌhuërëhuaꞌ. Ina yonquiinpita chiminarihuaꞌ. Nanpihuatëhuantaꞌ, inasáchin huaꞌanëntarinpoaꞌ. Ina quëran chiminacasoꞌ nipachin, ina yonquiatëhuaꞌ, chiminarihuaꞌ. Inasáchin imarëhuaꞌ.

⁹ Yaꞌipinpoaꞌ huaꞌanëntinpoaso marëꞌ Quisocristo chiminin. Nani chimirin minsërahuaton, chini chiníquën nanantaton, nanpiantarin. Napoaton nanpirëhuasopita, chiminpisopitantaꞌ, yaꞌipinpoaꞌ huaꞌanëntarinpoaꞌ.

¹⁰ Ayaroꞌ tahuëri yaꞌipinpoaꞌ natanarinpoaꞌ co noyahuëꞌ nipisopita anaꞌintacaso marëꞌ. ¿Onpoatontaꞌ nipachin iyaparin nocanan? Co ina pochin nicacasoꞌ yaꞌhuërinhuëꞌ. Yosëíchin noꞌtëquën anitotarinpoaꞌ.

¹¹ Iráca quiricanënquë naporin: “Casoꞌ Yosëco niꞌto, co nonpinahuëꞌ. Aꞌna tahuëri yaꞌipi piyapiꞌsaꞌ isonahuatonaꞌ, chinotarinaco. ‘Quëmasáchin Yosënquën,’ itarinaco,” tënin Yosë.

¹² Ayaroꞌ tahuëri nanihuachin, yaꞌipinpoaꞌ Yosë natanarinpoaꞌ. Maꞌmarësona maꞌsha ninëhuasoꞌ natanarinpoaꞌ. Aꞌnaya aꞌnayanpoaꞌ noꞌtëquën shaꞌhuitacasoꞌ yaꞌhuapon.

Noya noya imacaso marëꞌ nicatahuahuaꞌ

¹³ Napoaton ama huachi ninocancosohuëꞌ. Aꞌnapita imapisopita catahuacoꞌ noya cancanchinaꞌ. Niꞌcona anishacancantotamaꞌ.

¹⁴ Yaꞌipi cosharoꞌ noya capacasoꞌ. Co mantaꞌ aꞌpocasoꞌ yaꞌhuërinhuëꞌ. Sinioro Quisoso imato, naporahuë. Napoaton nitotërahuë. Aꞌnaquënso nipirinhuëꞌ: “Co Yosë nohuantërinhuëꞌ nosha capacasoꞌ,” taponaraihuëꞌ, caꞌpachinaꞌ, tëhuënchachin oshahuanpi.

¹⁵ Isontaꞌ yonquicoꞌ. Aꞌnaquëmaꞌ yaꞌipi cosharoꞌ noya caꞌnamaꞌ. Aꞌnaquënso nipirinhuëꞌ co nosha caꞌpihuëꞌ. “Huëcoꞌ ina caꞌahuaꞌ,” itohuatamaꞌ, co noyahuëꞌ cancantaponaꞌ nimara. “Co noyahuëꞌ capacasoꞌ,” taponaraihuëꞌ, caꞌpachinaꞌ, co huachi noyahuëꞌ cancantapi. Napoaton inapita nosoroatomaꞌ, ama napotocosohuëꞌ. Ama cosharoachin yonquiatomaꞌ, aꞌnapita anishacancantocosohuëꞌ. Inapita marëntaꞌ Quisocristo chiminin.

¹⁶ Maꞌsona tërantaꞌ noya nicacasoꞌ yaꞌhuëpirinhuëꞌ, aꞌnapita co noyahuëꞌ niꞌpachinënquëmaꞌ, ama napocosohuëꞌ. Niꞌcona co noyahuëꞌ nicatënënquëmaꞌ nonapichinënquëmaꞌ.

¹⁷ Yosë noya huaꞌanëntërinpoaꞌ. Ina imapatëhuaꞌ, noya nisarëhuaꞌ. Asanocancanarinpoaꞌ niꞌton, co ninoꞌhuicasoꞌ yaꞌhuërinhuëꞌ. Yosësoꞌ, caꞌnëhuasoꞌ, oꞌorëhuasoꞌ, inapita co onpopinchin yonquirinhuëꞌ. Ispirito Santo catahuarinpoaꞌ noya cancantahuasoꞌ. Catahuahuachinpoaꞌ, capa cancantarihuaꞌ.

¹⁸ Ina pochin Quisocristo imapatëhuaꞌ, Yosë noya niꞌsarinpoaꞌ. Piyapiꞌsantaꞌ noya niꞌsarinpoaꞌ.

¹⁹ Napoaton noya ninicatëhuaꞌ, yaꞌhuaꞌahuaꞌ. Nicatahuahuaꞌ noya noya imacaso marëꞌ.

²⁰ Ama caꞌnamaso marëꞌ aꞌnapita anishacancantocosohuëꞌ. Yaꞌipi cosharoꞌ noya capacasoꞌ. Co mantaꞌ aꞌpocaso yaꞌhuërinhuëꞌ. Nipirinhuëꞌ, aꞌnaquën co ina natëtonahuëꞌ, caꞌpachinaꞌ, co noyahuëꞌ cancantapi. Napoaton co yacaꞌpachinahuëꞌ, naporoꞌ canpitantaꞌ tananpitocoꞌ nisha cancantohuachinaꞌ.

²¹ Ama mantaꞌ aꞌnapita anishacancantacamasoꞌ yonquicosohuëꞌ. Caꞌnamaso marëꞌ, oꞌoramaso marëꞌ, ama inapita marëꞌ aꞌnapita anishacancantocosohuëꞌ. Iyaparin pochin nosoroatomaꞌ, catahuacoꞌ noya noya imacaiso marëꞌ.

²² Maꞌsona tërantaꞌ nipatamaꞌ, “Yosë nohuantërinsoꞌ nisarahuë,” taꞌtomaꞌ, noya nicoꞌ. Cancanënpoa quëran huarëꞌ: “Noya nisarahuë,” topatëhuaꞌ, noya cancantarihuaꞌ.

²³ Napoaponahuëꞌ: “Co Yosë nohuantërinhuëꞌ iso cosharo capacahuasoꞌ,” tarihuarahuëꞌ, caꞌpatëhuaꞌ, oshahuanarihuaꞌ. Ina pochin yonquiarihuarahuëꞌ maꞌsona tëranta nipatëhuaꞌ, oshahuanarihuaꞌ. Nipirinhuëꞌ, “iso cosharo noya capacasoꞌ,” tëcaton caꞌpatan, co oshahuanaranhuëꞌ.