Romanos 13 - Chayahuita (Shahui)

¹ Copirno acorinsopita natëcoꞌ. Yosë nohuanton, copirno, chirinchi, coisë, huaꞌan, inapita yaꞌhuërin. Co Yosë nohuantërinhuëꞌ naporini, co inapita yaꞌcointonahuëꞌ. Napoaton natëcoꞌ.

² Co copirno acorinsopita natëhuatamahuëꞌ, Yosëntaꞌ co natëaramahuëꞌ. Ina marëꞌ anaꞌintarinquëmaꞌ.

³ Noya nipatamaꞌ, co huaꞌanoꞌsaꞌ noꞌhuiarinënquëmahuëꞌ. Co natëhuatamahuëꞌ, noꞌhuiarinënquëmaꞌ niꞌton, tëꞌhuatacasoꞌ yaꞌhuërin. ¿Nohuantëramaꞌ huaꞌanoꞌsaꞌ noya nicainënquëmasoꞌ? Noya nicoꞌ nipachin noya niꞌinënquëmaꞌ.

⁴ Yosëri acorin aꞌpainënpoaso marëꞌ. Nipirinhuëꞌ, co noyahuëꞌ nipatamaꞌ, tëꞌhuatocoꞌ. Co topinan quëran chiníquën nanan quëtërinhuëꞌ. Yosëri acorin co noyahuëꞌ nipisopita anaꞌintacaso marëꞌ.

⁵ Napoaton huaꞌanoꞌsaꞌ natëcoꞌ anaꞌintochinënquëmaꞌ. Isontaꞌ yonquicasoꞌ yaꞌhuërin: “Yosëri acorin natëcaso marëꞌ,” taꞌtomaꞌ, natëcoꞌ.

⁶ Ina nohuanton, huaꞌanoꞌsaꞌ yaꞌhuërin noya nicacaiso marëꞌ. Ina marëꞌ nani tahuëri sacatapi. Napoaton pahuërëtacasoꞌ camaitërinsoꞌ pahuërëtaramaꞌ.

⁷ Yaꞌipiya noꞌtëquën pahuërëtocoꞌ. Huaꞌanoꞌsaꞌ catahuacaso marëꞌ pahuërëtacasoꞌ yaꞌhuëhuachinaꞌ, quëtocoꞌ. Chiníquën nanantopi niꞌton, noya nicatomaꞌ, natëcoꞌ.

⁸ Nihuitohuatamaꞌ, aꞌnaroáchin pahuërëtocoꞌ. Yaꞌipi piyapi nosorocoꞌ. Inasoꞌ naꞌcon naꞌcon Yosë nohuantërin. Nosorohuatamaꞌ, iráca pënëntërinsoꞌ noya natëaramaꞌ.

⁹ Iráca pënëntohuachina, itërin: “Saꞌahuanpatamaꞌ, ama aꞌna sanapi sëꞌhuacosohuëꞌ. Ama tëpatocosohuëꞌ. Ama mantaꞌ ihuatocosohuëꞌ. Ama nonpinapicosohuëꞌ. Ama aꞌna piyapi maꞌshanënpita nohuantapatocosohuëꞌ,” tënin. Ninosorohuatëhuaꞌ, yaꞌipi Yosë pënëninpoasoꞌ natëarëhuaꞌ. “Quëmaora ninosororanso pochachin aꞌnapitantaꞌ nosoroquëꞌ,” tënin Yosë.

¹⁰ Aꞌnapita nosorohuatamaꞌ, co noꞌhuiaramahuëꞌ. Co pinosaramahuëꞌ. Nóya catahuaramaꞌ. Napoaton nosorohuatamaꞌ, Yosë nóya natëarama huachi.

¹¹ Yaꞌnan imarihuaꞌ: “Pahuanarin Quisocristo oꞌmantacasoꞌ,” tënëhuaꞌ. Iporaso nipirinhuëꞌ nani oꞌmantacasoꞌ tahuëri yaꞌcaritëriarin. Naporoꞌ nichaꞌësarinpoaꞌ. Napoaton ama huëꞌërëso pochin yonquicosohuëꞌ. Yosë noꞌtëquën natëcoꞌ.

¹² Huaꞌquiꞌ piyapiꞌsaꞌ co noyahuëꞌ nicatonaꞌ, tashi pochin cancantopirinahuëꞌ. Iporasoꞌ Sinioro tahuërinën yaꞌcaritëriarin. Napoaton ama tashi pochin cancantahuasohuëꞌ. Sontaroꞌsaꞌ huaꞌna quëran aꞌmopiso pochin tahuëri pochin cancantatëhuaꞌ, noyasáchin niahuaꞌ.

¹³ Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

¹⁴ Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.