Romanos 12 - Chayahuita (Shahui)

Yosë marëꞌ sacatërëhuasoꞌ

¹ Yosë naꞌcon nosororinpoaꞌ niꞌton, yaꞌipi cancanëma quëran, iyaroꞌsaꞌ, ina imacoꞌ. Iráca Yosë chinotohuachinara, maꞌsha tëpapi. Canpitaso nipirinhuëꞌ Yosë marëꞌ nanpitomaꞌ, nohuantërinsoráchin nicoꞌ. Ina yonquiatomaꞌ, nani tahuëri noyasáchin nicoꞌ. Ina Yosë nohuantërin. Inapohuatamaꞌ, Yosë noya chinotaramaꞌ.

² Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

³ Yosë nosoroatonco, acorinco piyapiꞌsaꞌ aꞌchintaꞌhuasoꞌ. Nani tahuëri catahuarinco. Napoaton pënënaranquëmaꞌ. Yaꞌipinquëmaꞌ sano yonquicoꞌ. Ama aꞌnapita nocancosohuëꞌ. Yosë nisha nisha acorinpoaꞌ. Nisha nisha catahuarinpoaꞌ maꞌsona nohuantërinsoꞌ nicacasoꞌ. Napoaton, co aꞌnapita nocanacasoꞌ yaꞌhuërinhuëꞌ. Noꞌtëquën yonquiatomaꞌ, maꞌmarësona acorinquëmasoꞌ nitotocoꞌ. Aꞌnaya aꞌnayanquëmaꞌ anitotarinquëmaꞌ.

⁴ Niꞌcoꞌ. Imira, nantëꞌ, yaꞌpira, inapita yaꞌhuëtërinpoaꞌ. Imira yaꞌhuëtërinpoaꞌ sëꞌquëtacaso marëꞌ. Nantëꞌ yaꞌhuëtërinpoaꞌ iratacaso marëꞌ. Nisha nisha yaꞌhuëtërinpoaꞌ nisha nisha nicacaso marëꞌ. Co yaꞌipiya inachachin nipihuëꞌ.

⁵ Inapochachin yaꞌipi Quisocristo imarëhuasopita aꞌnaíchin nonënpoa pochin ninëhuaꞌ. Yaꞌipinpoaꞌ ina imarëhuaꞌ niꞌton, ina pochin ninëhuaꞌ. Nisha nisha nitotërëhuasoꞌ nirihuarahuëꞌ, nicatahuarëhuaꞌ. Aꞌna huëntonaca ninëhuaꞌ.

⁶ Yosë nosoroatonpoaꞌ, acorinpoaꞌ nisha nisha nicacasoꞌ. Maꞌmarësona acohuachinpoaꞌ, noya niahuaꞌ. Aꞌnaquën, yonquirinso chachin anitotërin shaꞌhuicaiso marëꞌ. Anitotohuachinquëmaꞌ, yaꞌipiya noꞌtëquën shaꞌhuicoꞌ.

⁷ Ina nohuanton, aꞌnaquën nitotërin catahuatacasoꞌ. Nitocatahuatohuatamaꞌ, noya catahuatocoꞌ. Aꞌnaquën nitotërin aꞌchinacasoꞌ. Nitoaꞌchinpatamaꞌ, noya aꞌchincoꞌ.

⁸ Aꞌnaquëontaꞌ nitotopi achinicancanacasoꞌ. Nitotohuatamaꞌ, noya cancantatomaꞌ achinicancancoꞌ imamiachinaꞌ. Aꞌnaquëontaꞌ ina nohuanton, coriqui, maꞌsha, inapita yaꞌhuëtopi. Aꞌnapita quëtohuatamaꞌ, ama piyapiꞌsaꞌ noya nicainënquëmaso marëꞌ quëtocosohuëꞌ. Yosë yonquiatomaꞌ, quëtocoꞌ. “Ina nosororinco niꞌton, carintaꞌ nosoroꞌi,” taꞌtomaꞌ, quëtocoꞌ. Aꞌnaquëontaꞌ ina nohuanton chachin, chiníquën nanan yaꞌhuëtopi. Ansianohuë nipon, huaꞌanhuë nipon yaꞌconpatamaꞌ, ama chirotomarahuëꞌ, noya pënëntocoꞌ. Noya noncoꞌ. Aꞌnaquëontaꞌ ina nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Inapita nicapomaꞌ paꞌpatamaꞌ, noya cancantatomaꞌ, catahuacoꞌ.

Maꞌpitasona nicacasoꞌ yaꞌhuërinsoꞌ

⁹ Yaꞌipi piyapiꞌsaꞌ nosorocoꞌ. Cancanëma quëran huarëꞌ nosorocoꞌ. Co noyahuëꞌ ninamasopita aꞌpocoꞌ. Noyasáchin nicoꞌ.

¹⁰ Imaramasopita capini noya ninosorocoꞌ. Iyaparima pochin niniꞌcoꞌ. Ama “Casoꞌ noya noyaco,” tocosohuëꞌ. Aꞌnapita noya noya niꞌcoꞌ.

¹¹ Ama chirotomarahuëꞌ, noya sacatocoꞌ. Yaꞌipi cancanëma quëran noya yonquiatomaꞌ, Yosë marëꞌ sacatocoꞌ.

¹² “Yosë ananpitaantarinpoaꞌ,” taꞌtomaꞌ, noya cancantocoꞌ. Maꞌsha onpohuatamaꞌ, ama noꞌhuitocosohuëꞌ. Chiníquën cancantatomaꞌ, ahuantocoꞌ. Apira apira Yosë nontocoꞌ.

¹³ Imapisopita pahuantohuachinaꞌ, maꞌsha quëtocoꞌ. Niꞌtoroꞌsaꞌ yaꞌnotohuachinënquëmaꞌ, noya nontatomaꞌ, aꞌcacoꞌ.

¹⁴ Piyapi aparisitohuachinënquëmaꞌ, ama noꞌhuitomarahuëꞌ, noya nontocoꞌ. Yosë nontocoꞌ inahuantaꞌ catahuacaso marëꞌ. Ama Yosëri anaꞌintacasoꞌ yonquirapicosohuëꞌ.

¹⁵ Aꞌnapita naꞌcon yonquicoꞌ. Canpitaora ninatanamaso pochin cancantocoꞌ. Noya cancantohuachinaꞌ, ina marëꞌ canpitantaꞌ noya cancantocoꞌ. Sëtohuachinaꞌ, sëtocoꞌ.

¹⁶ Noya ninicatomaꞌ yaꞌhuëcoꞌ. Ama aꞌna piyapi tërantaꞌ nocancosohuëꞌ. Topinan piyapi pochin cancantatomaꞌ, yaꞌipiya catahuacoꞌ. Ama: “Casoꞌ naꞌcon naꞌcon nitotërahuë,” tocosohuëꞌ. Ama ina pochin yonquicosohuëꞌ.

¹⁷ Aꞌna piyapi maꞌsha onpotohuachinquëmaꞌ, ama iꞌhuërëtocosohuëꞌ. Noya nicoꞌ aꞌnapitantaꞌ catahuacaso marëꞌ.

¹⁸ Ama piyapiꞌsaꞌ noꞌhuicosohuëꞌ. Noꞌhuihuachinënquëmaꞌ, ama canpitarisoꞌ noꞌhuicosohuëꞌ. Onpopiontaꞌ nanan anoyatocoꞌ.

¹⁹ Nosoroatënquëmaꞌ iyaroꞌsaꞌ, oshaquëran pënënanquëmaꞌ. Ama iꞌhuërëtocosohuëꞌ. Tananpitocoꞌ Yosëri anaꞌinchin. Quiricanën quëran naporin: “Co noyahuëꞌ nipisopita cari anaꞌintarahuë. Noꞌtëquën anaꞌintarahuë,” tënin Yosë.

²⁰ Napoaton “Inimiconëmaꞌ tanahuachin, aꞌcacoꞌ. Yamorohuachin, oꞌshitocoꞌ. Inapotohuatamaꞌ, inimiconëmaꞌ atapanaramaꞌ,” tënin antaꞌ.

²¹ Ama sopai natëcosohuëꞌ. Nani maꞌsha ayonquirinquëmasoꞌ aꞌpomiatocoꞌ. Yosë yonquiatomaꞌ, noyasáchin nicoꞌ. Inapohuatamaꞌ, sopai minsëaramaꞌ.