Romanos 11 - Chayahuita (Shahui)

Israiroꞌsaꞌ huayoninsoꞌ

¹ Napoaton natananquëmaꞌ: ¿Israiroꞌsaꞌ co natëtopiso marëhuëꞌ Yosëri aꞌpomiatërin ti? Co aꞌporinhuëꞌ. Ipora huantaꞌ piyapinënpita niꞌton, nosororin. Cantaꞌ Israiro piyapico. Tata Apraansoꞌ shimashonëhuë. Mincamin huëntonquë nasitërahuë.

² Inapitasoꞌ, iráca Yosëri huayonahuaton acorin piyapinënpita nicacaiso marëꞌ. Co aꞌporinhuëꞌ. Iráca Iniasë naporinsoꞌ Yosë quiricanënquë ninshitopisoꞌ nitotëramaꞌ. Inariso pënënpirinhuëꞌ, israiroꞌsari noꞌhuipi. Napoaton Yosë nontohuachina, inapita shaꞌhuirapirin.

³ “Naꞌamiachincoi Sinioro pënëntopiraihuëꞌ. Co nohuantatonaraihuëꞌ, aꞌnaquëncoi tëparinacoi. Artaroroꞌsaꞌ chinotaꞌhuainquënso marëꞌ aꞌmitëraisontaꞌ tëꞌyatopi. Casáchin pënëntapirahuëꞌ, yatëparinaco cantaꞌ,” itërin.

⁴ Napotopirinhuëꞌ, ¿maꞌtaꞌ Yosëri itantarin? “Aꞌnaquën mini mamanshi moshapi, Paaro itopisoꞌ. Nipirinhuëꞌ, ca nohuanto, canchisë huaranca quëmapiꞌsaꞌ chinotarinaco. Co mamanshi moshapihuëꞌ,” itërin. Nani ina nitotëramaꞌ.

⁵ Inapochachin iporantaꞌ caraya pochin Yosë huëntonënquë yaꞌconpi. Inaora nohuanton, nosoroaton, Yosëri ayaꞌconin.

⁶ Inaora nohuanton, catahuarin. Co noya nipiso marëꞌ catahuarinhuëꞌ. Noya nipiso marëꞌ huayonin naporini, co huachi inaora nohuanton, catahuacasoꞌ yaꞌhuëꞌitonhuëꞌ.

⁷ Napoahuarëꞌ, ¿maꞌtaꞌ nipachin tëcarihuaꞌ? Naꞌa israiroꞌsaꞌ Yosë huëntonënquë yayaꞌconpirinahuëꞌ, co inahuara nanitopihuëꞌ noya cancantacaisoꞌ. Aꞌnaquën huayoninsopitasoꞌ Yosë nohuanton, yaꞌconpi. Aꞌnapitaso nipirinhuëꞌ co natantochináchinhuëꞌ cancantopi.

⁸ “Yosëri tananpitërin niꞌton, huëꞌërëso pochin cancantopi. Yaꞌpirahuanaponaraihuëꞌ, co quënantërëso pochin nipihuëꞌ. Huëratëhuanaponaraihuëꞌ, co natantërëso pochin nipihuëꞌ. Ipora huantaꞌ ina pochin nisapi,” tënin Yosë quiricanënquë.

⁹ Iráca Tapintaꞌ tapon: “Yosë noꞌhuipi niꞌquëhuarëꞌ, anaꞌinchin. Nani maꞌsha yaꞌhuëtopirinahuëꞌ, co Yosë yonquipihuëꞌ. Coshatatonaꞌ, capa cancantapirinahuëꞌ, ina quëran chachin nitapicancainaꞌ. Yosëri anaꞌinchin.

¹⁰ Somaraya pochin cancantopi niꞌquëhuarëꞌ, ama quënantërëso pochin cancanchinasohuëꞌ. Yosë nohuanton, chiníquën parisitomiachinaꞌ,” tënin iráca. Inapochachin ipora huantaꞌ nisapi.

Nisha piyapiꞌsaꞌ yaꞌconpisoꞌ

¹¹ Napoaton natanaranquëmaꞌ. ¿Israiroꞌsaꞌ co yanatëpihuëꞌ niꞌquëhuarëꞌ Yosëri aꞌpomiatërin ti? Co Yosëri aꞌpomiatërinhuëꞌ. Nipirinhuëꞌ, co imapihuëꞌ niꞌton, nisha piyapiꞌsantaꞌ Yosëri anoyacancantarin. Ina quëran israiroꞌsasoꞌ, apiratonaꞌ yonquiapi: “Canpoantaꞌ inapita pochin cancantohuatëhuaꞌ, Yosë noya niꞌsarinpoaꞌ,” tosapi.

¹² Inapita co imatonahuëꞌ tëhuëpiso marëꞌ, iporasoꞌ yaꞌipi piyapiꞌsaꞌ nanitopi Yosë huëntonënquë yaꞌconacaisoꞌ. Nisha nisha piyapiꞌsaꞌ niponaraihuëꞌ, Yosëri noya niꞌsarin. Aꞌna tahuëri naꞌa cotioroꞌsaꞌ imaantahuachinaꞌ, noya noya nisarin.

¹³ Aꞌnaquëmasoꞌ nisha piyapiꞌsanquëmaꞌ. Yosë aꞌparinco aꞌchintaꞌhuanquëmaso marëꞌ. Ina marëꞌ noya cancantërahuë. Paꞌsápato, aꞌchintaranquëmaꞌ.

¹⁴ Naꞌaquëmaꞌ imapatamaꞌ, aꞌnaquën israiroꞌsantaꞌ nohuantapi imacaisoꞌ nimara. Inapitantaꞌ Yosëri anoyacancantarin.

¹⁵ Iporaso Yosëri tananpitërin niꞌton, nisha nisha piyapiꞌsaꞌ ina nohuitapi. Aꞌna tahuëriso nipirinhuëꞌ israiroꞌsantaꞌ imaantahuachinaꞌ, noya noya nisapi. ¿Ma pochintaꞌ nisapi? Chimipi nanpiantarinso pochin nisapi, tënahuë.

¹⁶ Niꞌcoꞌ. Pan nipachinara, yaꞌnan nipisoꞌ Yosë marëꞌ acohuachina, yaꞌipi chachin noya ninin. Nara itëntaꞌ noya nipachina, sëꞌpaquëontaꞌ noya nisarin.

¹⁷ Nara quëran aꞌchinchinquëmaꞌ. Oripo nara sëꞌpaꞌ co noya nitohuachinahuëꞌ, nishitëtahuatëꞌ, tëꞌyatërëꞌ. Ina quëran apinapinsoꞌ oripo sëꞌpaquën tërantaꞌ achinpitërëꞌ papotacaso marëꞌ. Aꞌnaquën israiroꞌsasoꞌ oripo nara sëꞌpa pochin nipi. Co natëpihuëꞌ niꞌton, Yosëri tananpitërin. Canpitasoꞌ nisha piyapinquëmaꞌ nipiramahuëꞌ, huëntonënquë ayaꞌconinquëmaꞌ. Piyapinënpita pochachin niꞌninquëmaꞌ.

¹⁸ Nipirinhuëꞌ, ama israiroꞌsaꞌ nocancosohuëꞌ. Ama: “Quiyasoꞌ noya noyacoi,” tocosohuëꞌ. Sëꞌpaquëni co nara achinirinhuëꞌ. Itëni achinirinsoꞌ.

¹⁹ “Quiyantaꞌ imacaꞌhuaiso marëꞌ israiroꞌsaꞌ tananpitërin,” tënamaꞌ nimara.

²⁰ Yosëri tananpitërin mini. Nipirinhuëꞌ, co ina marëꞌ tananpitërinhuëꞌ. Co Quisocristo nohuantopihuëꞌ niꞌton, tananpitërin. Canpitantaꞌ imaramaꞌ niꞌton, noya niꞌninquëmaꞌ. Napoaton ama inapita nocancosohuëꞌ. Niꞌcona canpitantaꞌ Quisocristo naniantotamaꞌ.

²¹ Israiroꞌsaꞌton piyapinënpita pochin niꞌpirinhuëꞌ, anaꞌintërin. Quisocristo naniantohuatamaꞌ, anaꞌintarinquëmaꞌ canpitantaꞌ.

²² Ma noyacha Yosësoꞌ nosororinpoa paya. Co natëpisopitasohuëꞌ nipirinhuëꞌ, chiníquën anaꞌintarin. Inasáchin imapatamaꞌ, nosoromiatarinquëmaꞌ. Nipirinhuëꞌ naniantohuatamaꞌ, anaꞌintarinquëmaꞌ canpitantaꞌ.

²³ Naporahuaton israiroꞌsantaꞌ imaantahuachinaꞌ, Yosëri piyapinënpita pochin niantarin. Nara sëꞌparaꞌhuain achinpitantarëso pochin acoantarin. Yosë niꞌton, nanitaparin.

²⁴ Nani aꞌchintëranquëmaꞌ. Canpitasoꞌ apinapin nara pochin ninamaꞌ. Apinapinsoꞌ nara sëꞌparaꞌhuain nishitëtahuatëꞌ, oripo nara sëꞌparaꞌhuain achinpihuatëra, papotërin. Aquëtë huarëꞌ sëꞌparaꞌhuain chachinsoꞌ achinpitaantahuatëra, aꞌnaroáchin papotaantarin. Inapochachin israiroꞌsaꞌ noya imapachinaꞌ, Yosëri noya niantarin.

Naꞌa israiroꞌsaꞌ imaantapisoꞌ

²⁵ Yosë yonquirinsoꞌ iyaroꞌsaꞌ shaꞌhuichinquëmaꞌ, noꞌtëquën nitotacamaso marëꞌ. Aꞌnapita co nitotopirinahuëꞌ, ama nocantamaso marëhuëꞌ shaꞌhuitaranquëmaꞌ. “Quiyasáchin noꞌtëquën yonquirai,” ama tocosohuëꞌ. Iporasoꞌ naꞌa nisha piyapinquëmaꞌ Yosë huëntonënquë yaꞌconaramaꞌ. Yaꞌipi Yosë nohuantërinquëmasopita yaꞌconamaquë huarëꞌ naꞌa israiroꞌsaꞌ co natantochináchinhuëꞌ cancantapi.

²⁶ Aꞌna tahuëriso nipirinhuëꞌ yaꞌipi israiroꞌsantaꞌ chaꞌësapi huachi. Yosë quiricanënquë ninorinso pochachin imaantapi. Iráca ninshitaton, naporin: “Aꞌna tahuëri aꞌnaraꞌ Israiro quëmapi Quirosarin quëran oꞌmararin piyapi nichaꞌëcaso marëꞌ. Cacopo shinpita co noyahuëꞌ yonquipisoꞌ ananiantarin.

²⁷ Oshanënaꞌ inquitahuato, piyapinëhuëpita pochin niꞌsarahuë. Apraan shaꞌhuitërahuëso chachin napotarahuë,” tënin Yosë.

²⁸ Iporasoꞌ israiroꞌsaꞌ co Quisocristo nanamën natëpihuëꞌ. Yosë inimicotopirinahuëꞌ, canpitasoꞌ imaramaꞌ. Napoaponahuëꞌ, israiroꞌsaꞌton acorin piyapinënpita nicacaiso marëꞌ. Iráca Apraan, Isaco, Cacopo, inapita shaꞌhuitërin niꞌton, ipora huantaꞌ shinpita nosoroarin.

²⁹ Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

³⁰ Iráca co canpitasoꞌ natëpiramahuëꞌ, co israiroꞌsaꞌ nohuantopihuëꞌ niꞌton, Yosë nosoroatënquëmaꞌ, catahuarinquëmaꞌ.

³¹ Iporasoꞌ israiroꞌsaꞌ co natëpihuëꞌ. Co natëhuachinarahuëꞌ, Yosë catahuarinquëmaꞌ. Ina niꞌpachinaꞌ, yonquiantaponaꞌ niꞌton, aꞌna tahuëri inahuantaꞌ nosoroaton, catahuaantarin.

³² Yosëri yaꞌipi piyapiꞌsaꞌ tananpitërin niꞌton, co natëtochináchinhuëꞌ cancantopi. Yaꞌipinpoaꞌ nosoroinpoaso marëꞌ naporin.

³³ ¡Ma noyacha Yosësoꞌ catahuarinpoa paya! ¡Ma noyacha yonquirin paya! Yaꞌipiya nitotërin. Yonquirinsopita co nitotochináchinhuëꞌ ninin. Naporahuaton, ina pochin cancantacasoꞌ co onporontaꞌ nanitarihuahuëꞌ.

³⁴ “Co insonta inaora Yosë yonquirinsoꞌ nitotërinhuëꞌ. ¡Co incari tërantaꞌ nanitërinhuëꞌ noya noya ayonquicasoꞌ!

³⁵ ¿Incaritaꞌ maꞌsha Yosë quëtërin niꞌton, iꞌhuërëtacasoꞌ yaꞌhuërin? Co incari tërantaꞌ,” tënin quiricanënquë.

³⁶ Yaꞌipi maꞌsha Yosëri ninin. Ina nohuanton, co taꞌhuantarëhuahuëꞌ. Yosëíchin paꞌyatacaso marëꞌ yaꞌhuërëhuaꞌ. Inaora nohuanton, anoyacancantërinpoaꞌ. Ma noyacha Yosëso paya, itahuaꞌ. ¡Inasáchin chinotahuaꞌ! Amen.