Romanos 10 - Chayahuita (Shahui)

¹ Paꞌpi nohuantërahuë israiroꞌsaꞌ chaꞌëcaisoꞌ. Ina marëꞌ iyaroꞌsaꞌ, chiníquën Yosë nontárahuë.

² Tëhuënchachin Yosë yachinotopirinahuëꞌ, co nanamën noꞌtëquën yonquipihuëꞌ.

³ Yosëíchin anoyacancantërinpoaꞌ. Nipirinhuëꞌ, co nohuantopihuëꞌ ina nanan imacaisoꞌ. “Pënëntërinsoꞌ natëhuatëhuaꞌ, Yosë noya niꞌsarinpoaꞌ,” toconpi. “Quëma Sinioro anoyacancantocoi,” co itopihuëꞌ.

⁴ Iráca Moisësë pënëntërin. Iporaso nipirinhuëꞌ co ina natërëhuaso marëꞌ Yosë noya niꞌninpoahuëꞌ. Quisocristo nani oꞌmarin oshanënpoaꞌ inquitinpoaso marëꞌ. “Quisocristoíchin anoyacancantarinpoaꞌ,” topatëhuaꞌ, Yosë noya niꞌsarinpoaꞌ.

⁵ Moisësëri ninshitërin pënëntërinso nanan imacaiso marëꞌ. “Noꞌtëquën natëhuatamaꞌ, Yosë noya niꞌsarinquëmaꞌ. Yaꞌipiya natëcasoꞌ yaꞌhuërin,” tënin ninshitaton.

⁶ Canpoaso nipirinhuëꞌ Quisocristo imapatëhuaꞌ, Yosë noya niꞌsarinpoaꞌ. Quisocristo nanamënsoꞌ co sacaiyahuëꞌ nitotacasoꞌ. “¿Inta inápaquë pantapon Quisocristo quëmacaso marëꞌ?” co taꞌcasoꞌ yaꞌhuërinhuëꞌ. Nani oꞌmarin.

⁷ “¿Intaꞌ chimipiroꞌsaꞌ yaꞌhuëpiquë papon ina quëran Cristo quënantacaso marëꞌ?” co taꞌcasoꞌ yaꞌhuërinhuëꞌ. Nani nanpiantarin.

⁸ ¿Maꞌtaꞌ quiricanën quëran anitotërinpoaꞌ? “Ina nanansoꞌ, co sacaihuëꞌ nitotacasoꞌ. Nanamënpoa quëran shaꞌhuicaso yaꞌhuërin. Cancanënpoa quërantaꞌ, natëcaso yaꞌhuërin,” itërinpoaꞌ. Inasáchin natëcoꞌ, itëranquëmaꞌ cantaꞌ.

⁹ Tata Yosë nohuanton, Quisocristo tëhuënchachin nanpiantarin. Ina cancanënpoa quëran natëhuatëhuaꞌ, “Quisocristoíchin imarahuë,” topatëhuaꞌ, Yosë anoyacancantarinpoaꞌ.

¹⁰ “Yosë co onporontaꞌ nonpintarinpoahuëꞌ,” taꞌtëhuaꞌ, cancanënpoa quëran natëhuatëhuaꞌ, noya niꞌsarinpoaꞌ. “Casoꞌ Quisocristo imarahuë,” topatëhuaꞌ, naporo chachin anoyacancantarinpoaꞌ.

¹¹ “Insosona Quisocristo natëhuachin, co sëtarinhuëꞌ. Co aꞌpoarahuëꞌ,” tënin Yosë quiricanënquë.

¹² Aꞌnaíchin Yosë yaꞌhuërin. Yaꞌipinpoaꞌ huaꞌanëntërinpoaꞌ. Co cotioroꞌsaráchin naꞌcon nosororinhuëꞌ. Nisha piyapiꞌsantaꞌ nosororin. Ina nontohuatëhuaꞌ, nóya catahuarinpoaꞌ.

¹³ “Oshanëhuë Sinioro inquitoco,” topatëhuaꞌ, anoyacancantatonpoaꞌ nichaꞌësarinpoaꞌ.

¹⁴ Napoaponahuëꞌ, co aꞌchintohuatëhuahuëꞌ, co nitotapihuëꞌ. Co nitotohuachinahuëꞌ, co nanitapihuëꞌ natëtacaisoꞌ. Co natëtohuachinahuëꞌ, co nanitapihuëꞌ Yosë nontacaisoꞌ. Napoaton aꞌchintacasoꞌ yaꞌhuërin.

¹⁵ Co Yosëri aꞌchinaꞌpiroꞌsaꞌ aꞌpahuachinhuëꞌ, ¿onpo nitotaponataꞌ? Yosë quiricanën quëran naporin: “Ma noyacha niꞌton, noya nanan shaꞌhuitaonpoaꞌ huëꞌsarin paya,” tënin.

¹⁶ Aꞌnaquënso nipirinhuëꞌ, noya nanan natanpirinahuëꞌ, co nanitopihuëꞌ natëcaisoꞌ. “Nanamën Sinioro, shaꞌhuitopirahuëꞌ co insonta natëtërinhuëꞌ,” tënin Isaiasë iráca.

¹⁷ Quisocristo nanamën natanacasoꞌ yaꞌhuërin. Natanpatëhuaꞌ: “Noꞌtëquën nonin,” topatëhuaꞌ, natëtarihuaꞌ.

¹⁸ ¿Co natanpihuëꞌ ti? ¡Nani mini natanpi! tënahuë. Yosë quiricanënquë naporin: “Nisha nisha parti nanamën shaꞌhuitopi. Yaꞌipi parti nahuinin,” tënin Yosë quiricanënquë.

¹⁹ Naquëranchin natainquëmaꞌ. Israiroꞌsasoꞌ natanaponaraihuëꞌ, maꞌsona tapon naporinsoꞌ ¿co nitotopihuëꞌ ti? Nitotaponaraihuëꞌ, co natëpihuëꞌ. Moisësë ninshitaton, naporin: “Nisha piyapiꞌsaꞌ co yonquipirinacohuëꞌ catahuararahuë niꞌton, canpitarisoꞌ aꞌpitaramaꞌ. Ina marëꞌ noꞌhuitaramaꞌ, tënin Yosë,” itërin.

²⁰ Isaiasëntaꞌ co tëꞌhuatonhuëꞌ, Yosë noninsoꞌ shaꞌhuirin. “Nisha piyapiꞌsaꞌ co yanohuitopirinacohuëꞌ, iporasoꞌ imasarinaco. Co iráca nohuantopirinacohuëꞌ, iporasoꞌ nohuitarinaco, tënin Yosë,” itërin.

²¹ Israiroꞌsaso nipirinhuëꞌ co yanatëpihuëꞌ. Inapita yonquiaton, Isaiasë quëran taantarin: “Iráca quëran huarëꞌ yacatahuarahuë. Imirahuë ihuëtatë pochin nitato: ‘Huëcoꞌ catahuainquëmaꞌ,’ itopirahuëꞌ, co yanatërinacohuëꞌ. Co natantochináchinhuëꞌ cancantopi, tënin Yosë,” itërin.