Proverbios 8 - Chayahuita (Shahui)

Yonqui piyapi pochin nicaton pënëntërinsoꞌ

¹ Yonquisoꞌ, piyapi pochin nicaton chiníquën shaꞌhuitarinpoaꞌ. Yonquínahuan acoinpoaso marëꞌ napoarin.

² Motopiaꞌhuaroꞌsaquë nanpëaton, iraroꞌsanta nipëntontërinquë,

³ ninano yaꞌcoanaroꞌsaquë, inaquëpita huanirahuaton tapon:

⁴ “Canpita piyapinquëma pënënaranquëmaꞌ.

⁵ Naꞌaquëma huiꞌnapinquëma niꞌton, co noya yonquiátëraramahuëꞌ. Naponin yonquiramasopitantaꞌ, yonquínahuan nicacamasoꞌ nohuantocoꞌ.

⁶ Noya nininsoꞌ shaꞌhuitaranquëma niꞌton, noya natancoꞌ.

⁷ Noꞌtën nanan nininsoꞌ shaꞌhuitaranquëmaꞌ. Nonpinacasosoꞌ, co costarincohuëꞌ.

⁸ Noyasáchin caso nonahuë. Co piꞌpian tëranta nonpintaranquëmahuëꞌ.

⁹ Nitotonquëma nipatamasoꞌ, aꞌninquëchin nonahuësoꞌ nitotaramaꞌ. Co piꞌpiyan tërantaꞌ nonahuëso nocanaramahuëꞌ.

¹⁰ Coriqui quëran naꞌcon naꞌcon yonquínahuan nicacamasoꞌ cancantocoꞌ. Oro quëran noya noya, naꞌcon naꞌcon nitotacamasoꞌ cancantocoꞌ.

¹¹ Naꞌpiraꞌhuaya paꞌton nipisopita quëran yonquínahuan nicacasosoꞌ, naꞌcon naꞌcon paꞌtërin. Paꞌyapiro maꞌsha nipisopita tëranta co ina pochin paꞌtërinhuëꞌ.

¹² Caso Yonquico ninahuë. Nitotonoꞌsapitarëꞌco yaꞌhuërahuë. Naporahuaton noya noya nitopënëntërahuë.

¹³ Sinioro noya nicatoma natëhuatamaꞌ, co noyahuëꞌ ninamasopita co quëꞌyamaso yaꞌhuërinhuëꞌ. ‘Caso noya noyaco,’ topachinara, co quëꞌyarahuëꞌ. Nocantohuachinaꞌ, co noyahuëꞌ nipachinaꞌ, nonpinpachinaꞌ, inapohuachinarantaꞌ, co quëꞌyarahuëꞌ.

¹⁴ Ca nohuanton maꞌsha nicacaiso marëꞌ yonquipi. Inapohuachinara ca nohuanton ina inachachin acopi. Ca nohuanton noꞌtëquën yonquipi, chinipi, napopi.

¹⁵ Ca nohuanton copirnoroꞌsantaꞌ, huaꞌanëntopi. Noya nicacaiso marëꞌ noꞌtëquën camaitopi.

¹⁶ Huaꞌanoꞌsanta cari catahuarahuë huaꞌanëntopi. Coisëroꞌsanta catahuahuatora, maꞌsona onpotacaisoꞌ noꞌtëquën shaꞌhuipi.

¹⁷ Nosororinacosopita, carinta nosororahuë. Inpitaso cancantohuachinaco, quënanarinaco.

¹⁸ Nohuantërahuësopita, cari maꞌhuanacaisoꞌ quëtërahuë. Aꞌnapitari noya nicatona natëcaisoꞌ, noya yaꞌhuëcaisoꞌ, inapita cari quëtërahuë.

¹⁹ Oro, prata, inapita noyá asoquihuachinara, naꞌcon paꞌtërin. Cari quëtërahuësopitasoꞌ, inapita quëran naꞌcon naꞌcon paꞌtërin.

²⁰ Ca nohuanto piyapiꞌsa noꞌtën ira paꞌtopi. Ca nohuanto chachin noya nipi.

²¹ Nosororinacosopitasoꞌ, noꞌpaꞌ huaꞌanëntacaiso marëꞌ cari quëtëraꞌpiapo. Paꞌton nininsopita tapapiquëntaꞌ, cari amëntatëraꞌpiapo.

²² Iráca chachin caniaritapon, Sinioro huaꞌanëntërinco. Coꞌhuara maꞌsha acoyátëraponhuëꞌ, huaꞌanëntërinco.

²³ Yaꞌnan tahuëri caniaritaso chachin Sinioro caꞌton acorinco. Coꞌhuara isoroꞌpaꞌ acoyátëraponhuëꞌ, acorinco.

²⁴ Coꞌhuara marëroꞌsaꞌ, iiroꞌsaꞌ, noꞌpaꞌ quëran iꞌsha pipirinsopita, inapita yaꞌhuëyátëraponhuëꞌ, caꞌton acorinco.

²⁵ Coꞌhuara motopiroꞌsaꞌ, motopiaꞌhuaroꞌsaꞌ, inapita noya acoyátëraponhuëꞌ, Sinioro acorinco.

²⁶ Co isoroꞌpaꞌ, co noyaroꞌparoꞌsaꞌ, co amocan tëranta acoyátërasohuëꞌ, Sinioro acorinco.

²⁷ Marë inápaquë yaꞌhuërinsoꞌ yaꞌcopinamën acoasoꞌ, nani canta inaquë nisarahuë.

²⁸ Chitoronta inápaquë noya acoasoꞌ,

²⁹ marënta ama yaꞌhuërin quëran chaꞌhuëaton pipicaso marëhuëꞌ camaiasoꞌ, isoroꞌpanta simintonën pochin nininsoꞌ acoasoꞌ,

³⁰ inapoasoꞌ, nani inaquë canta nisarahuë. Co piꞌpian tëranta aꞌporahuëꞌ. Cari acapacancanahuë. Nani oraquë pochin inarëꞌco yaꞌnipiárahuë.

³¹ Isoroꞌpaꞌ acorinquë yaꞌnipiárahuë. Piyapiroꞌsa acorinso yonquiato, capa cancantërahuë.

³² Iporaso huaꞌhuaroꞌsa noya natancoꞌ. Ca nonanpatamaco, tëhuënchachin capa cancantaramaꞌ.

³³ Noya yonquicaso marëꞌ aꞌchintohuachinënquëmaꞌ, noya natancoꞌ.

³⁴ Aꞌpaitonaꞌpisoꞌ, nani tahuëri yaꞌcoana aꞌpairin. Inso tëranta noya natanatonco ina pochin cancantohuachinco, tëhuënchachin capa cancantapon.

³⁵ Inso tëranta quënanpachincosoꞌ, nanpirin quënanapon. Siniororinta nosoroaton catahuacaso quënanapon.

³⁶ Aꞌpohuachinacoso napoaponahuëꞌ, huëhuëpiro nisapi. Insosona co quëꞌyahuachincohuëꞌ, inaora chachin chimirin yonisarin,” tënin yonqui pënëntaton.