Proverbios 7 - Chayahuita (Shahui)

Soꞌin tëhuananpitaton, naporinsoꞌ

¹ Shaꞌhuitaranquënsopita huaꞌhua, natëquëꞌ. Yaꞌipi camairanquënsopita yonquiráquëꞌ.

² Aꞌchintatënquën camairanquënsopita natëquëꞌ. Yaꞌpira paꞌpoyarëso pochin inapita cancantohuatan, nanpiaran.

³ Imisëranënpitaquë tonpoantëquëꞌ. Naporahuaton yonquinën quëran nitotëquëꞌ.

⁴ Saꞌina cancantopiso pochin yonquisoꞌ, cancantëquëꞌ. Quëmopinën pochin noya niꞌquëꞌ.

⁵ Ina, soꞌin tëhuananpitë sanapi quëran, nichaꞌësarinquën. Inaso nisha niponahuëꞌ yashi yashin nonaton, quëmapiꞌsa yaanishacancantërin.

^6-8 Aꞌna tahuëri huintananëhuë quëran co aꞌpípirohuëꞌ notëtárahuë. Notëtapirahuëꞌ, naꞌamiachin huiꞌnapiꞌsa co panorohuanhuëꞌ huëꞌsapi niꞌnahuë. Aꞌnaso naꞌcon naꞌcon nicaton, cachi taconorinquë canquirin. Pëntontahuaton, ina sanapi yaꞌhuërinso parti paꞌsarin.

⁹ Iꞌhuaraya napoarin, nani yatashirapasoꞌ.

¹⁰ Aꞌnanaya inari chachin monshihuantë sanapi pochin nisahuaton nacapirin.

¹¹ Inasoꞌ sanapi nisha nisha cancantërin. Inapoaton co pëinënquë yaꞌhuërinhuëꞌ.

¹² Cachiroꞌsaquë, prasaroꞌsaquë, cachiroꞌsa taconorinquë, inaquëpita paꞌsárin. Inaporinquë quëmapi ninarárin.

¹³ Inasoꞌ, huiꞌnapi iporahuaton apinorin. Co taparohuanhuëꞌ nontaton itapon:

¹⁴ “Nanan anoyatërëso marëꞌ maꞌsha tëpaꞌhuasoꞌ Sinioro shaꞌhuitërahuë. Ina shaꞌhuirahuësoꞌ, ipora tahuëri ananirahuë.

¹⁵ Napoaton yoníponquën huëꞌnahuë. Napishinhuë yanicatënquën yoniranquënsoꞌ, ¡nani quënananquën!

¹⁶ Noyápiachin sahuanasaquë quëhuëntërahuësoꞌ huëtërahuë. Inasoꞌ, Iquipito rino piꞌshi quëran nipinan.

¹⁷ Noya huaꞌsaiquë chachin quëhuëntërahuësoꞌ, pashitërahuë. Ina huaꞌsaisoꞌ, shinpanantëꞌ, canina, pimo yaquiꞌ, inaquëranpita nipi.

¹⁸ Huëquë canposo tahuërianpitaquë huarëꞌ inapoaꞌa.

¹⁹ Soꞌyahuësoꞌ áquë paꞌnin niꞌton, co pëiquë yaꞌhuërinhuëꞌ.

²⁰ Tanpanantënquë naꞌa coriqui quëparin. Yoqui nincoan nisapa huarëꞌ huënantapon,” itërin.

²¹ Ina pochin yáshin nontaton, huiꞌnapi anohuantërin.

²² Aꞌnaroáchin nohuantaton imarin. Toro tëpacaiso marëꞌ imatërinso pochin nirachinin. Yo pisonquë yaꞌconinso pochin ninin antaꞌ.

²³ Huinca ritiquë yaꞌconinso pochin ninin. Pëꞌchinan shinërëri ninopinën cancata huarëꞌ yonquipirinhuëꞌ, co huachi nanitërinhuë chaꞌëcasoꞌ.

²⁴ Ina pochin huaꞌhua niꞌton, napotëranquënsoꞌ, noya natanaton yonquiquëꞌ.

²⁵ Ama ina pochin sanapi cancantëquësohuëꞌ. Ama ina marëꞌ taꞌhuantacasoꞌ, yaꞌhuëchinquënsohuëꞌ.

²⁶ Nani naꞌa huiꞌnapiꞌsa inapo tiquirin. Chiníquënoꞌsa nipirinahuëꞌ nani tiquirin.

²⁷ Ina sanapi pëinënquë pacacasosoꞌ, chimipiroꞌsa yaꞌhuërinquë ira paꞌninso pochin ninin.