Proverbios 31 - Chayahuita (Shahui)

Noya sanapi nininsoꞌ

¹⁰ Noya sanapi chachin yoniton mapatan, naꞌcon canaran. Naꞌpiraꞌhuaroꞌsa paꞌton nininsopita quëran, naꞌcon naꞌcon inasoꞌ paꞌtërin.

¹¹ Saꞌan noya nipachin natëaran. Co onporonta inaso aꞌna quëmapi tëhuarinhuëꞌ. Nani tahuëri sacataton coriqui yaꞌhuëtapon.

¹² Noya nicaton yáshin ichiyaꞌhuëaponquën. Chiminaquë huarëꞌ inapotaponquën.

¹³ Huaita, rino piꞌshi, inapita paꞌanin. Noya ancantaton imirin quëran nisha nisha maꞌsha ninin.

¹⁴ Nicatonoꞌsa nanchanën pochin nicaton, aquëran cosharonën quësarin.

¹⁵ Coꞌhuara tahuëriátërasohuëꞌ capayataton, huaꞌhuinpita, piyapinënpita, inapita aꞌcarin.

¹⁶ Noꞌpanta yapaꞌanpachina, noya nicaton paꞌanin. Canarinso coriqui quëran oparotërin.

¹⁷ Co chirotonhuëꞌ noya sacatërin.

¹⁸ Maꞌsha paꞌaninsopitanta anaꞌatacaso marëꞌ inaora chachin niꞌsárin. Tashirë chachin sacataton, nanparinëonta orotárin.

¹⁹ Inaora chachin piꞌshitaton aꞌnantohuachina, nisha nisha ocoirin.

²⁰ Saꞌahuaroꞌsaꞌ, pahuantopisopita, inapitanta nosoroaton catahuarin.

²¹ Yaꞌipi pëinënquë yaꞌhuëpisopita Sëhuën nipachina aꞌmocaiso quëtëraꞌpiarin. Napoaton co ocai anotacaso tëranta tëꞌhuatërinhuëꞌ.

²² Inaora chachin huëtaton quëhuëntacasoꞌ ninin. Noya noya nëꞌmëtë nininsopita quëran aꞌmorin.

²³ Soꞌiontaꞌ, ninanonënquë naní quëran nohuitopi. Yaꞌhuërinso noꞌpaquëntaꞌ, noya nicatona natëpi.

²⁴ Aꞌnantaton, naꞌa aꞌmocaiso ninin. Nitonpocaiso marëntaꞌ, naꞌa sintoron ninin. Inapita nisahuaton paꞌanin.

²⁵ Maꞌsha onpoaponahuënta chiníquën cancantërin. Aꞌna tahuëri maꞌsona onpocasontaꞌ, co tëꞌhuatërinhuëꞌ.

²⁶ Nonpachina, nóya yonquiaton nonin. Piyapiꞌsa nosoroaton aꞌchintërin.

²⁷ Maꞌpitaso pëinënquë nipisoꞌ, aꞌpairarin. Sacainën quëran quënana huarëꞌ coshatërin.

^28-29 Huaꞌhuinpitari paꞌyatatona itaponaꞌ: “Noya sanapiꞌsa naꞌcon yaꞌhuëpirinhuëꞌ, quëmasoꞌ inapita quëran noya noyanquën,” itopi. Soꞌininta paꞌyataton inachachin, itërin.

³⁰ Aꞌnaquën sanapi noyasha nonaponahuëꞌ, yanonpinin. Noyápiroyanchin nipirinaontaꞌ, topinan quëran. Sinioro noya nicaton natëhuachin tëhuëchinsoꞌ, noya nicatonaꞌ, paꞌyataponaꞌ.

³¹ Nani maꞌsha nipachina, paꞌpi nóya ninin niꞌton, yaꞌipi piyapi natantonënquë noya nicatona natëapi. Huaꞌanoꞌsa quëran huarëꞌ, noya nicatona paꞌyatapi.