Proverbios 3 - Chayahuita (Shahui)

^1-4 (-)

Onporahuatësona yonquínahuan nicacaso yaꞌhuërinsoꞌ

⁵ Ama canpitaora yonquiramaso nicosohuëꞌ. “Yosëíchin catahuarinco,” taꞌtomaꞌ, yaꞌipi cancanëma quëran ina natëcoꞌ.

⁶ Maꞌsona tëranta yanipatamaꞌ: “Anitotoco Sinioro noꞌtëquën yonquiꞌi,” itocoꞌ. Napohuatamaꞌ, anitotarinquëmaꞌ. Ina catahuarinquëma noya nicacamasoꞌ.

⁷ “Caso caora noꞌtëquën yonquirahuë,” ama tëquësohuëꞌ. Sinioro noya nicaton natëquëꞌ. Inapoaton co noyahuëꞌ ninansoꞌ aꞌpoquëꞌ.

⁸ Inapohuatan noya noya nimirio pochin nonën marëꞌ yaꞌhuëtarinquën.

⁹ Maꞌsha yaꞌhuëtërinquënsopita Sinioro noya nicaton quëtëquëꞌ. Shaꞌnansopita yaꞌnan cayarinsontaꞌ, quëtëquëꞌ.

¹⁰ Inapohuatan sacóshin cosharo yaꞌhuëtarinquën. Huinonta co pahuantarinquënhuëꞌ.

¹¹ Yonquiquë huaꞌhua: Yosë nosororinpoꞌ. Noya noya imacahuaso marëꞌ ina nohuanton aꞌna tahuëri parisirëꞌ. Aꞌna tahuëri piꞌpian anaꞌintopirinpohuëꞌ, ama amiaton aꞌpoquësohuëꞌ.

¹² Nosororinpoa niꞌton, aꞌna tahuëri ina nohuanton maꞌsha onporëhuaꞌ. Huiꞌninpita pochin nicatonpoaꞌ, piꞌpian anaꞌintërinpoa noya noya yonquicaso marëꞌ.

¹³ Insosona nitoton nisahuaton yonquínahuan nipachin, tëhuënchachin capa cancanchin.

¹⁴ Oro, prata, inapitasoꞌ, co onpopinchin catahuarinpoahuëꞌ. Yonquínahuan nicacasoso nipirinhuëꞌ, naꞌcon naꞌcon catahuarinpoaꞌ.

¹⁵ Naꞌpiraaꞌhuaya paꞌton nipisopita quëran yonquínahuan nicacasosoꞌ, naꞌcon naꞌcon paꞌtërin. Paꞌyapiro maꞌsha nipisopita tëranta co ina pochin paꞌtërinhuëꞌ.

¹⁶ Inchinan quëran ihuëtatë pochin huaꞌqui tahuëri nanpicasoꞌ quëtarinpoaꞌ. Ahuënan quëran ihuëtatë pochin maꞌhuanacasoꞌ, noya nicatënënpoa natëinënpoasoꞌ, inapita quëtarinpoaꞌ.

¹⁷ Yonquínahuan nicacasoꞌ cancantohuatëhuaꞌ, noyápiachin cancantarihuaꞌ. Sano niꞌtëhua yaꞌhuëarihuaꞌ.

¹⁸ Yonquínahuan nipatëhuaꞌ, nanpirin nara caꞌnëso pochin ninëhuaꞌ. Yonquínahuan ninëhuaso coꞌsoꞌ aꞌpohuatëhuahuëꞌ, tëhuënchachin capa cancantarihuaꞌ.

¹⁹ Yonquínahuan niꞌton, Siniorosoꞌ piꞌiroꞌtë noyá acorin. Isoroꞌpanta inapotërin.

²⁰ Yonquínahuan niꞌton marëntaꞌ, aꞌna patonquë aꞌna patonquë pochin acorin. Ina nitotërin quëran poroncayonta huiꞌshirin.

²¹ Maꞌsona huaꞌhua yanipatan, noya yonquirahuaton niquëꞌ. Ama inapita naniantëquësohuëꞌ.

²² Inapo yaꞌhuëhuatan, nanpirin quënanëso pochin nisaran. Miyo pëꞌpëpiso pochin costapiroꞌ yaꞌnoaran.

²³ Intohua tëranta paꞌpatan, co manta tëꞌhuarëꞌquën paꞌsaranhuëꞌ. Naporahuaton, co toꞌcoitërëso pochin nisaranhuëꞌ.

²⁴ Chinotohuatan, co manta tëꞌhuataranhuëꞌ. Huëꞌëpatan, noya huëꞌësaran.

²⁵ Aꞌnanaya maꞌsha onpocasoꞌ co tëꞌhuataranhuëꞌ. Inpioroꞌsa anaꞌintohuachinantaꞌ, co paꞌyanaponhuëꞌ.

²⁶ Sinioro yonquiaton chiníquën cancantaran. Ina aꞌpaiarinquën niꞌton, co anotatë pochin nisaranhuëꞌ.

²⁷ Saꞌahuaroꞌsa nosorocaso yaꞌhuërin. “Catahuaco topirahuë,” itohuachinquën, catahuaquëꞌ. Maꞌsona pahuantërinsoꞌ yaꞌhuëtohuachinquën, quëtëquëꞌ.

²⁸ Ama apiratëquësohuëꞌ. “Aꞌna tahuëri nimara quëchinquën,” ama itëquësohuëꞌ. Yaꞌhuëtohuachinquën, quëtochinaquëꞌ.

²⁹ Ama aꞌna piyapi naponin yonquirapiquësohuëꞌ. Noya nicatënquën yacapahuachinquën nosoroquëꞌ.

³⁰ Ama topinan quëran noꞌhuitëquësohuëꞌ. Co maꞌsha onpotopirinquënhuëꞌ noꞌhuihuatan, co noyahuëꞌ nisaran.

³¹ Ama ahuëtonoꞌsaꞌ noyapaquësohuëꞌ. Ama co noyahuëꞌ nininsoꞌ, nonanquësohuëꞌ.

³² Yosëso co noyahuëꞌ nipisopita co quëꞌyarinhuëꞌ. Noya nipisopitasoꞌ, noya apayarin.

³³ Co noyahuëꞌ nipisopita yaꞌhuëtopisopitasoꞌ, Yosëri co noyahuë yonquirapiton noꞌhuirin. Noya nipisopita huaꞌanëntërinsosoꞌ, noya nicaton, noya yonquirapirin.

³⁴ Nocantopisopitasoꞌ, Siniorori nocanapon. Sano piyapi nipisopitasoꞌ, inaora nohuanton catahuapon.

³⁵ Yonquínahuan nipisopitasoꞌ, piyapiꞌsari noya nicatona natëponaꞌ. Co yonquinahuanhuëꞌ nipisopitasoꞌ, co ina pochin nitaponahuëꞌ.