Proverbios 23 - Chayahuita (Shahui)

^1-3 (-)

Maꞌshasoꞌ, co yaꞌhuëmiatërinhuëꞌ

⁴ Ama maꞌhuanacasoráchin cancantëquësohuëꞌ. Inaporanso aꞌporahuaton, sano cancantëquëꞌ.

⁵ Intana noya yonquiriquëꞌ. Maꞌshasoꞌ, co yaꞌhuëtomiatopihuëꞌ. Inasoꞌ, onian yanponaton paꞌninso pochin nisarin. Anpiantëhuanaton paꞌninso pochin pataantarinpoaꞌ.

^6-18 (-)

Inpitarëꞌquënpoasona co nipayacasohuëꞌ yaꞌhuërinsoꞌ

¹⁹ Pënënanquënsopita huaꞌhua, noya natanaton, yonquínahuan niquëꞌ. Noya nicacasoráchin cancantëquëꞌ.

²⁰ Oꞌocaisoráchin, capacaisoráchin cancantopisopitarëꞌquën, ama nipayaquësohuëꞌ.

²¹ Oꞌonaꞌpiroꞌsaꞌ, coshatonoꞌsaꞌ, inapitaso popriyataponaꞌ. Yaꞌipi chirotëroꞌsaꞌ, paꞌpiyaráchin aꞌmoponaꞌ. Napoaton co inapitarëꞌquën nipayacaso yaꞌhuërinhuëꞌ.

Onporahuatësona tatanpoꞌ, mamanpoꞌ, inapita acapacancanësoꞌ

²² Tataparin camaihuachinquën noya natanaton natëquëꞌ. Mamaparin paiya nipachinantaꞌ, ama amirotatonhuëꞌ, catahuaquëꞌ.

²³ Noꞌtëquën nanan nitotacasoꞌ, yonquínahuan nicacasoꞌ, aꞌchinpisoꞌ noya natanacasoꞌ, yonqui yonquícharacasoꞌ, inapita cancantëquëꞌ. Ina pochin nipatan, ama aꞌpoquësohuëꞌ.

²⁴ Yonquínahuan nisahuaton noya huiꞌnapi nipachin, noꞌtën chachin paꞌpinsoꞌ, noya cancantarin. “Ma noyacha huiꞌnahuë yaꞌhuëtërinco paya,” taꞌcasonta nanitërin.

²⁵ Ina huiꞌnapi pochin niquë quëmantaꞌ. Inapohuatan, tataparin, mamaparin, inapita noya cancantaponaꞌ. “Ma noyacha huiꞌnahuë yaꞌhuëtërinco paya,” tëcapon tataparin. “Ma noyacha huaꞌhuahuë yaꞌhuëtërinco paya,” tëcapon mamaparintaꞌ.

Onpopinsona monshihuantë sanapi nininsoꞌ

²⁶ Cancantaton huaꞌhua, nanpirahuëso niꞌquëꞌ. Noya nicatonco nonanco.

²⁷ Monshihuantë sanapisoꞌ, nanincatë yamianasha pochin niconin. Inarëꞌquënpoa poꞌpatëra, inaquë toꞌhuarantërëso pochin nisarëhuaꞌ.

²⁸ Ina pochin sanapiꞌsasoꞌ, ihuatë pochin yatoꞌshitëtopi. Inapoatonaꞌ, naꞌa piyapiꞌsa anishacancantopi.

Noꞌpicasoꞌ paꞌyatohuatëra, maꞌpitaso onpocaso yaꞌhuërinsoꞌ

²⁹ Aꞌnaquën parisitatonaꞌ, “¡maꞌhuantacha ninahuë paya!” tëcaponaꞌ. Iquitatonaꞌ, tarëtaponaꞌ. Nanan yaꞌhuëtohuachinaꞌ, sëtaponaꞌ. Co manta onpopirinahuëꞌ, ahuëhuachinaꞌ, isarorayarachin niꞌtaponaꞌ. ¿Inpitacha naporëꞌpoi nicaya?

³⁰ Co inso napoarinhuëꞌ. Noꞌpicasoáchin cancantopisopita napoaponaꞌ. Nisha nisha oꞌoi yapiꞌnipisopita napoaponaꞌ.

^31-32 Ama máin nininsoꞌ nocoaton paꞌyatáquësohuëꞌ. “¡Ma noyacha yanpoáporairin paya!” Ama tëquësohuëꞌ. Yashi yashin mini mitopiranhuëꞌ, osha oshaquëranchin yaꞌhuan quëtëtohuachina, iquitopiso pochin nitarinquën.

³³ Noꞌpiraoꞌ nipatansoꞌ, maꞌpitaso quënanatë pochin nisaran. Nisha cancantaton, co yonquirësohuë pochin nonsaran.

^34-35 Marë huáncanaiꞌ nanchaquë paꞌsárëso pochin ninatanaran. Pantiranën aꞌpaontapiꞌpaꞌ pëꞌsatëaꞌhua acopisoꞌ aipi quëhuëánëso pochin ninatanaran. Naporahuaton tapon: “Ahuëpirinacohuëꞌ, co iquitërahuëꞌ. Huihuipirinacohuëꞌ, co natanahuëꞌ. Napoaporahuë nonataantahuatora, aquëtë chachin oꞌoi yoniantarahuë,” tapon.