Proverbios 13 - Chayahuita (Shahui)

Huiꞌnapiꞌsa pënënacaso marëꞌ ninshitërinsoꞌ

¹ Yonquínahuan huiꞌnapi nipachin, paꞌpini pënënaton anaꞌintohuachina, noya cancantërin. Co natantonhuëꞌ nininsosoꞌ, co pënënacasoꞌ tëranta nohuantërinhuëꞌ.

² Noya yonquiaton nonpatan, noꞌtëquën canarëso pochin nisaran. Nipirinhuëꞌ, aꞌna piyapi co noyahuëꞌ yonquirapiton shaꞌhuirapihuatan, parisitacaso quënanaran.

³ Noya yonquiatë nonpatëra, noya niaꞌpairëso pochin ninëhuaꞌ. Macatë macatë nonpatërasoꞌ, canpora chachin maꞌsha onpocasoꞌ yonisarëhuaꞌ.

⁴ Chirotëso maꞌsha nohuantopirinhuëꞌ, co sacatërinhuëꞌ niꞌton, co yaꞌhuëtërinhuëꞌ. Sacaton nipachinasoꞌ, noya yaꞌhuëaponaꞌ.

⁵ Piyapi noya nipachinsoꞌ, nonpinacasoꞌ co paꞌyatërinhuëꞌ. Co noyahuëꞌ nipisopitaso nipirinhuëꞌ, taparo nicatona nahuinaponaꞌ.

⁶ Piyapi noya nipachin, noya nininsoari ama maꞌsha onpocaso marëhuëꞌ yaꞌcopirin. Oshahuanoꞌsaso nipirinhuëꞌ, co noyahuëꞌ nipisoari ataꞌhuantapon.

⁷ Aꞌnaquën maꞌhuan pochin yaꞌnoponaraihuëꞌ, co manta yaꞌhuëtopihuëꞌ. Aꞌnaquëontaꞌ, popriya pochin yaꞌnoponaraihuëꞌ, co manta pahuantopihuëꞌ.

⁸ Isoroꞌpaꞌ marëꞌ maꞌhuansoꞌ, coriquinën quëran nanitërin chaꞌëcasoꞌ. Popriyaso napoaponahuëꞌ, co aquëtë huarëꞌ pinosapihuëꞌ.

⁹ Noya nipisopitasoꞌ, aꞌpiánahuaninso pochin nisapi. Co noyahuëꞌ nipisopitaso nipirinhuëꞌ, nanparin tacopirinso pochin nisapi.

¹⁰ “Caso noya noyaco,” topisopitasoꞌ, aꞌnaroáchin nanan ocoipi. Sano piyapiroꞌsaso nipirinhuëꞌ, yonquínahuan nicacaisoꞌ naꞌcon naꞌcon cancantopi.

¹¹ Nonpinatona maꞌhuanpisopitasoꞌ, oshaquëran oshaquëran maꞌshanëna capa nicapon. Piꞌpiraꞌhuaya quëran huarëꞌ yontonpisopitaso nipirinhuëꞌ, anaꞌataponaꞌ.

¹² Maꞌsona ninarëhuaso co cantihuachinpoahuëꞌ, ina marëꞌ napion ancantáparihuaꞌ. Ninarëhuaso chachin cantihuachinpoasoꞌ, nanpirin huayo caꞌnëso pochin nisarëhuaꞌ.

¹³ Camairinënquënso co natëhuatanhuëꞌ, parisitamaso yaꞌhuërin. Natëhuatanso nipirinhuëꞌ, canacamaso quënaanan.

¹⁴ Yonquínahuan piyapi aꞌchininsosoꞌ, nanpirin huinan pochin ninin. Ina aꞌchininso natëhuatëhuaꞌ, chimirin quëran nichaꞌësarinpoaꞌ.

¹⁵ Noya yonquinaꞌpisoꞌ, naní quëran paꞌyataponaꞌ. Aꞌna piyapi co noyahuëꞌ yonquirapitonaꞌ shaꞌhuirapihuachinaso nipirinhuëꞌ, taꞌhuantacaiso marëꞌ napopi.

¹⁶ Yonquínahuansoꞌ, noya yonquiaton maꞌsha ninin. Co yonquinahuanso nipirinhuëꞌ, tëhuëaponahuëꞌ co tapaninhuëꞌ.

¹⁷ Co noya comisionsoꞌ, nanan apancatërin. Noya comisionso nipirinhuëꞌ, nanan anoyatërin.

¹⁸ Pënënpisoꞌ nocanpachinaꞌ, popriyataponaꞌ. Naporahuatona co noya nicaponahuëꞌ. Natëhuachinaso nipirinhuëꞌ, aꞌnapitari naꞌcon noya nicaponaꞌ.

¹⁹ Nohuantërëhuaso chachin yaꞌhuëtohuachinpoaꞌ, acapacancaninpoaꞌ. Co noyahuëꞌ yonquipisopitaso nipirinhuëꞌ, co nohuantopihuëꞌ co noyahuëꞌ nipiso aꞌpocaisoꞌ.

²⁰ Yonquínahuanoꞌsarëꞌquën nipayapatan, yonquínahuan nisaran. Co noyahuëꞌ yonquipisopitarëꞌquën nipayapatan, nitapicancanaran.

^21-25 (-)