Proverbios 1 - Chayahuita (Shahui)

Maꞌmarësona aꞌchinacaso nananoꞌsa ninshitopisoꞌ

^1-2 Saromonsoꞌ, Tapi huiꞌnin. Inasoꞌ, Israiro copirno yaꞌconahuaton, pënëinpoaso marëꞌ, naꞌa aꞌchinacaso nananoꞌsa ninshitërin. Ina nananoꞌsasoꞌ, yonquínahuan nicacamaso marëꞌ anitotarinquëmaꞌ. Noya nanpicamaso marëꞌ yaaꞌchintatënquëmaꞌ, naporin.

³ Inasoꞌ, yonquínahuan nicacaso marëꞌ catahuarinquëmaꞌ. Noyasáchin nicatomaꞌ, noꞌtëquën yonquicamaso catahuarinquëmaꞌ.

⁴ Huiꞌnapiꞌsa co noꞌtëquën yonquipihuëꞌ. Ina yonquihuachinaꞌ, chinóton yonquiapi. Naꞌcon nitotatonaꞌ, noya yonquiapi huachi.

⁵ Yonquínahuan nipisopitasoꞌ, pënëinpoaso marëꞌ ninshitopisoꞌ, paꞌyatapona natanacaisoꞌ. Inapoatonaꞌ, yonqui yonquínahuanoꞌsa nicaponaꞌ.

⁶ Napoatonaꞌ, maꞌsona tapon pënëntopisoꞌ, yonquiaponaꞌ. Yonquínahuanoꞌsa nonpisoꞌ, natanaponaꞌ. Ninocaiso nananoꞌsantaꞌ, noya shaꞌhuiponaꞌ.

⁷ Yonquínahuan nicamasoꞌ nohuantohuatamaꞌ, Sinioro noya nicatoma natëcoꞌ. Co yonquínahuanhuëꞌ nipachinara, yonquínahuan yonquipisopita nocanpi. Co aꞌchintacaiso tëranta paꞌyatopihuëꞌ.

Huiꞌnapiꞌsa pënëninsoꞌ

⁸ Natanquë huaꞌhua pënëinquën: Tataparin aꞌchintohuachinquën, noya natanquëꞌ. Mamaparionta aꞌchintërinquënsoꞌ, ama naniantëquësohuëꞌ.

⁹ Inapita aꞌchinpiso co naniantohuatanhuëꞌ, nitapacaiso marëꞌ yancotë yancopiso pochin, miyo pëꞌpëpiso pochin costapiroꞌ yaꞌnoaran.

¹⁰ Oshahuanoꞌsa yanonpintohuachinquën, ama piꞌpian tëranta natëquësohuëꞌ.

¹¹ Yanonpintatënën: “Huëquë paꞌa quëmantaꞌ, piyapi toꞌshitatëhua tëpaꞌahuaꞌ. Co manta yonquiasoihuëꞌ inapotahuaꞌ.

¹² Chimirinsoꞌ, piyapiꞌsa tëpacaso co oshatarinhuëꞌ. Inapochachin canpoanta piyapi mapatëhuaꞌ, co oshatarihuahuëꞌ.

¹³ Nani maꞌsha manëhua quëran maꞌhuanarihuaꞌ. Pëinënpoapitantaꞌ, amëntatarihuaꞌ.

¹⁴ Huëquë napopináchin sacatahuaꞌ. Inaquëráchin coriquinta tapahuaꞌ,” itarinënquën.

¹⁵ Napotopirinënhuëꞌ, ¡ama huaꞌhua imatëquësohuëꞌ! Inahuasoꞌ, co noyahuëꞌ yonquiatona paꞌsapi. Yaꞌhuincananpiquëꞌ.

¹⁶ Inahuasoꞌ, co noyahuëꞌ nicacaiso marëꞌ manopi. Tëpatacaiso marëꞌ manopi.

¹⁷ Inaira nani notëtohuachina topinan quëran huënson acorëꞌ.

¹⁸ Inapochachin tëpatoroꞌsasoꞌ, inahuara chachin pison acopiquë yaꞌconpiso pochin nicatonaꞌ, maꞌsha onpotochinaichin nisapi.

¹⁹ Maꞌhuanacaisoráchin cancantopisopitasoꞌ, inapo taꞌhuantaponaꞌ.

Yonquínahuan acocaso marëꞌ përátërinsoꞌ

²⁰ Yonquiso piyapi pochin nicaton, piyapiroꞌsa yonquínahuan acocaso marëꞌ cachiroꞌsaquë chiníquën shaꞌhuirárin. Prasaroꞌsaquëntaꞌ, naporárin.

²¹ Naꞌcon yamopiquë naporin. Ninano yaꞌcoanaroꞌsaquëntaꞌ, yonquirinso shaꞌhuiton atosárin:

²² “Aꞌnaquëmasoꞌ, co chinoton yonquiátëraramahuëꞌ. ¿Onporo huarëta co chinotonhuëꞌ yonquiramaso naniantapomaꞌ? Aꞌnaquëmantaꞌ, narinatoma tëhuacamasoráchin cancantaramaꞌ. ¿Onporo huarëta ina pochin cancantëramaso aꞌpoapomaꞌ? Apínapichin yonquiramasopitantaꞌ, ¿Onporo huarëta nitoton nicacamaso nohuantapomaꞌ?

²³ Cariima pënënanquëmasoꞌ, natëco huachi. Natëhuatamaco, ispiritonëhuë ayaꞌcoancantaranquëmaꞌ. Naporahuaton, yonquirahuësopita anitotaranquëmaꞌ.

²⁴ Nani carima pënënanquëmaꞌ. Canpitaso nipirinhuëꞌ, co yanatëramacohuëꞌ. Yacatahuatënquëmaꞌ, imira ihuëtërëso pochin nitopiranquëmahuëꞌ, co tahuërëtëramacohuëꞌ.

²⁵ Napoatomaꞌ, pënënanquëmasopita nocanamaꞌ. Aꞌchintëranquëmasopitantaꞌ, co yaimaramahuëꞌ.

²⁶ Naporamaso marëꞌ maꞌsha onpocamasoꞌ cantiiponquëmaꞌ. Inapoatoma paꞌyan yatëpasënquëmaꞌ, carimanta tëhuayataranquëmaꞌ.

²⁷ Panca ihuan canquirinso pochin nanan yaꞌhuëtarinquëmaꞌ. Maꞌsha onpoatoma co napion cancantaramaꞌ.

²⁸ Naporo huarëꞌ chinotatomaco përasaramaco. Cancantatomaco yonípiramacohuëꞌ, co huachi quënanaramacohuëꞌ.

²⁹ Noꞌtëquën yonquicaso nocanama niꞌton, inapotaranquëmaꞌ. Co Sinioronta noya nicatoma natëramaso marëhuëꞌ, napoaramaꞌ.

³⁰ Yaotëatënquëma napotápiranquëmahuëꞌ, pënënanquëmasopita nocanamaꞌ.

³¹ Napoaton ina naꞌintarinquëma parisitamaso yaꞌhuërin. Amiquë huarëꞌ caꞌnëso pochin parisitaramaꞌ. ‘Caora nohuantato napoarahuë,’ tënamaso marëꞌ napoaramaꞌ.

³² Co nitotoroꞌsahuëꞌ pëshonpisoꞌ, nonanapatëramaꞌ. Inaporamasoꞌ, canpitanta tëpaponquëmaꞌ. Co yonquinahuanoꞌsahuëꞌ maꞌhuaninsontaꞌ, noyapatëramaꞌ. Inaporamaso canpitantaꞌ, tapiponquëmaꞌ.

³³ Inquëmaso napoaponahuëꞌ, noya natanatomaco natëtohuatamaꞌ, sano yaꞌhuëaramaꞌ. Co manta maꞌsha onpocasoꞌ tëꞌhuataramahuëꞌ,” tënin.