Oseas 5 - Chayahuita (Shahui)

Israiroꞌsa Yosë aꞌpopiso marëꞌ anaꞌintacaso yaꞌhuërinsoꞌ

^1-2 Naquëranchin Siniorori piyapinënpita itapon: “Corto huaꞌanoꞌsanquëmaꞌ, yaꞌipi Israiro huaꞌanoꞌsanquëmaꞌ, copirnonta quëmopinënpitarë chachin, yaꞌipinquëma natanco shaꞌhuichinquëmaꞌ: ‘Canpitaso piyapinëhuëpita anishacancantërama niꞌton, Mispa ninanoquë pëcotan acoatë pochin ninamaꞌ. Taporo motopiquënta huënson acoatë pochin ninamaꞌ. Sitin motopianaquëpita noꞌpaꞌ ihuarahuatomaꞌ, pëcotan acoatë pochin ninamaꞌ. Ina marëꞌ anaꞌintaꞌhuanquëmaso yaꞌhuërin,’ tënahuë.

³ Iprain huënton israiroꞌsantaꞌ, nohuitërahuë. Yaꞌipi israiroꞌsa nohuitërahuë. Iprain israiroꞌsanquëmaꞌ. Canpitaso aꞌporahuatomaco mamanshiráchin mosharamaꞌ. Yaꞌipi israiroꞌsanquëmanta oshahuanatomaꞌ, aꞌmoramaso tapiatë pochin cancanëma tapiramaꞌ,” itërin.

⁴ Israiroꞌsaso Yosë piyapinënpita nipirinahuëꞌ, co noyahuëꞌ nisápi. Napopisoari yaꞌcopirin niꞌton, co yaꞌipi cancanëna quëran ina chinotaantacaiso nanitopihuëꞌ. Mamanshi marëꞌ sacatopisopita sanapiꞌsarëꞌ pocatonaꞌ, co Sinioro noya nohuitacaisoꞌ nanitopihuëꞌ.

⁵ Inapoáponaraihuëꞌ: “Ma noyacha quiyasoꞌ ninai paya,” toconpi. Napopi niꞌton, naꞌinpiro nipi. Iꞌpahuatëra maꞌsha onporëso pochin, Iprain israiroꞌsa co noyahuëꞌ nicatonaꞌ, parisitacaisoꞌ quënanapi. Inapitarë chachin Cota huënton israiroꞌsantaꞌ, oshahuanápatona parisitacaisoꞌ quënanaponaꞌ.

⁶ Ohuicanënaꞌ, ohuacanënaꞌ, inapita tëparahuatonaꞌ, Sinioro chinotapona nipirinhuëꞌ, co quënanapihuëꞌ. Aꞌporin niꞌton, co quënanapihuëꞌ.

⁷ Co Sinioroíchin cancantatonaraihuëꞌ, mamanshiroꞌsa moshapiso marëꞌ nishaquëya huaꞌhua mapiso pochin nipi. Napopiso marëꞌ aꞌna yoquiya marëáchin noꞌpanëna ataꞌhuantapi.

Cota huënton israiroꞌsaꞌ, israiroꞌsarë chachin Yosëri anaꞌintarinsoꞌ

⁸ ¡Quipia ninanoquë quira pomon pihuicoꞌ! ¡Nama ninanoquëntaꞌ, tronpita pihuicoꞌ! Piti-apin ninanoquëpita huëhuëpiro huëꞌsarinso shaꞌhuicoꞌ. Mincamin huënton israiroꞌsanta shaꞌhuitohuatamaꞌ, paꞌyanënaquë nisha nisha yonquiaponaꞌ.

⁹ Israiro nacion huëntonënpitaquë, tëhuënchachin napoarinso shaꞌhuitaranquëmaꞌ. Anaꞌintacaso tahuëri nanihuachin, Iprain huënton noꞌpanënaꞌ, ataꞌhuantaponaꞌ.

¹⁰ Ina quëran Sinioro taantarin: “Cota huënton israiroꞌsa huaꞌanënpitantaꞌ, co noyahuëꞌ nipi. Noꞌpaꞌ naꞌcon naꞌcon nohuantatona aꞌnaquënsoꞌ, aꞌnipiso chiꞌhuincapitarapi. Inapochachin inapitanta niconpi. Napopirinahuëꞌ, paꞌpi noꞌhuitato aparisitarahuë. Paquiiri imotohuachina parisitopiso pochin nitarahuë.

¹¹ Iprain huënton israiroꞌsasoꞌ, inimiconënpitari aparisitápi. Inapotápi niꞌton, co huachi chiníquën cancantopihuëꞌ. Mamanshiráchin cancantopisoꞌ, co aꞌpopihuëꞌ niꞌton, inapotápi.

¹² Napopiso marëꞌ carinta anaꞌintato, nara noꞌsoni pëꞌyarinso pochin israiroꞌsa huaꞌanëntopisoꞌ, ataꞌhuantarahuë. Aꞌshini nëꞌmëtë pëꞌyarinso pochin Cota huënton israiroꞌsanta huaꞌanëntopisoꞌ, inapotarahuë.

¹³ Israiroꞌsa paꞌpi caniaꞌpi pochin acorahuësoꞌ niniꞌsapi. Cota huënton israiroꞌsantaꞌ, apipiso pochin nipisoꞌ, niniꞌsapi. Napohuachina inapitasoꞌ, Asiria copirnori catahuacaso marëꞌ pahuaponaꞌ. Inasoꞌ, chiníquën nanantopirinhuëꞌ, caniopiso pochin nipisoꞌ co anoyatarinhuëꞌ. Apipiso pochin nipisontaꞌ, co anoyatarinhuëꞌ.

¹⁴ Paꞌpiniꞌ, niirahuaton mapintërinso pochin israiroꞌsaꞌ, Cota huënton israiroꞌsaꞌ, inapita nitarahuë. Cari chachin paꞌsa paꞌsatërëso pochin aparisitarahuë. Inapotahuato patarahuë. Quëpatë pochin nipatontaꞌ, co insonta osërëtiincosoꞌ nanitarinhuëꞌ.

¹⁵ Ina quëran huaꞌquimiachin tananpitarahuë: ‘Oshahuanëhua niꞌton, Sinioro poꞌtërinpoaꞌ,’ taꞌcaihuarëꞌ catahuaantarahuë. Parisitatona co napion cancantohuachinaꞌ, oshanëna inquitaꞌhuaso marëꞌ yoníponaco,” tënin.