Oseas 4 - Chayahuita (Shahui)

Israiroꞌsa co noyahuëꞌ nipiso marëꞌ Siniorori shaꞌhuirapirinsoꞌ

^1-2 Israiroꞌsanquëmaꞌ. Sinioro naporinso natancoꞌ: “Iso noꞌpaquë yaꞌhuëpisopita paꞌpi co noyahuëꞌ nipi. Isëquësoꞌ, co noꞌtëquën ninosoropihuëꞌ. Nisha nisha cancantopi. Caso Yosëco nipirahuëꞌ, co nohuitërinacohuëꞌ. Nonpiáponaraihuëꞌ, ‘Yoscoarëꞌ,’ niitopi. Apira apira nitëpapi, niihuapi, nitëhuananpitopi, paꞌpi noꞌhuitërayaroꞌsa nipi, napopi.

³ Napoaton yaꞌipi Israiro noꞌpaquë, sëtatona naꞌnërápi. Caniorëso pochin co manta chinipihuëꞌ. Tanan maꞌsharoꞌsa quëran huarëꞌ taquiapi. Inairaroꞌsaꞌ, marë samiroꞌsaꞌ, inapitanta inapoapi,” tënin.

Corto huaꞌanoꞌsanta shaꞌhuirapirinsoꞌ

⁴ Ina quëran Sinioro taantarin: “Ama canpita capinisoꞌ, nishaꞌhuirapitoma nipënëncosohuëꞌ. Corto huaꞌanoꞌsanquëmaráchin tëhuënchinsoꞌ, co canirapichináchinhuëꞌ niꞌnanquëmaꞌ.

⁵ Canpitaso paꞌpi co noyahuëꞌ ninama niꞌton, anaꞌintaranquëmaꞌ. Tashi co quënantohuatërahuëꞌ iꞌparëso pochin tahuëri nipirinhuëꞌ, co taparohuanhuëꞌ tëhuëaramaꞌ. Nonpi nanan pënëntonaꞌpiroꞌsanta canpita pochachin nisapi. Israiro nacionsoꞌ, mamaparima pochin nipirinhuëꞌ, cari ataꞌhuantarahuë.

⁶ Co nohuitërinacohuëꞌ niꞌton, piyapinëhuëpita ataꞌhuantarahuë. Canpita corto huaꞌanoꞌsanquëma tëhuërama niꞌton, napotarahuë. Canpita chachinta co nohuitëramacohuëꞌ. Naporahuaton co nohuantëramahuëꞌ nohuitamacosoꞌ. Napoaton cantaꞌ, co corto huaꞌanoꞌsa pochin niꞌnanquëmahuëꞌ. Pënëntërahuësonta naniantërama niꞌquëhuarëꞌ, canta canpita quëran pipipisopita catahuacaꞌhuasoꞌ, naniantarahuë.

⁷ Naꞌcon naꞌcon corto huaꞌanoꞌsa yaꞌhuëapon pochin naꞌcon naꞌcon tëhuëtërinaco. Napoaton co huachi piyapiꞌsari noya niꞌsapihuëꞌ. Maꞌsha onpotapi tëhuënchinsoꞌ.

⁸ Piyapinëhuëpita oshahuanpachina inquitaꞌhuaso marëꞌ, maꞌsha quëshirinaco. Ina quëran canpitanta capatomaꞌ, aquëtë huarëꞌ oshahuanacaisoꞌ nohuantëramaꞌ.

⁹ Corto huaꞌanoꞌsaꞌ, topinan piyapiꞌsarë chachin co noyahuëꞌ nipiso marëꞌ anaꞌintarahuë.

¹⁰ Yaꞌipinquëma aꞌporamaco niꞌquëhuarëꞌ, anaꞌintaranquëmaꞌ. Naꞌcon capomarahuëꞌ, co natëaramahuëꞌ. Naꞌcon huiꞌnahuanamaso nohuantopiramahuëꞌ, co huiꞌnahuanaramahuëꞌ,” tënin.

Israiroꞌsa mamanshiráchin cancantopisoꞌ

¹¹ Ina quëran Sinioro taantarin: “Mamanshi marëꞌ sacatopisopita sanapiꞌsarëꞌ poꞌpachinara, co huachi noꞌtëquën yonquipihuëꞌ. Huinonta paꞌyatohuachinara, inapochachin nipi.

¹² Piyapinëhuëpitasoꞌ, nara mamanshiroꞌsa maꞌsha nitotacaiso marëꞌ natanpi. Inapitaso nara quëran nipirinahuëꞌ, ‘mamanshi aꞌpairincoi,’ toconpi. Mamanshi marëꞌ sacatopisopita sanapiꞌsarëꞌ pocatonaꞌ, huaꞌyantërëso pochin nipi. Inapoatona piyapinëhuëpitasoꞌ, chihuërëso pochin nipi. Monshihuanápaiso marëꞌ Yosënënaco nipirahuëꞌ aꞌporinaco.

¹³ Motopiroꞌsaꞌ, motopiaꞌhuaroꞌsaꞌ, inapita huiꞌnimotënꞌpaꞌ maꞌsha tëparahuatonaꞌ, mamanshinënapita moshapi. Yonarin pochin nininsontaꞌ, inapita marëꞌ inaquë aꞌpëpi. Panca taꞌan nopri nararoꞌsa tashinantërinsoanaquë, aramoroꞌsaꞌ, insinaroꞌsaꞌ, inapita nararoꞌsa tashinantërinsoanaquëntaꞌ, inapopi. Naporama niꞌton, huiꞌnama sanapiꞌsa nipisopitantaꞌ, mamanshi marëꞌ sacatopi. Huiꞌnamapita saꞌinantaꞌ, soꞌina tëhuananpitopi.

¹⁴ Huiꞌnama sanapiꞌsa mamanshiroꞌsa marëꞌ sacatohuachinaꞌ, co napopiso marëꞌ anaꞌintapohuëꞌ. Huiꞌnamapita saꞌinanta soꞌina tëhuananpitohuachinaꞌ, co napopiso marëꞌ anaꞌintapohuëꞌ. Canpitaora chachinta inanpi sanapiꞌsarëꞌquëma poꞌnamaꞌ. Ina sanapiroꞌsa mamanshi moshahuachinara canpitantaꞌ, mamanshiroꞌsa marëꞌ maꞌsha tëparahuatomaꞌ, inapitarëꞌquëma napopináchin moshapatëramaꞌ. Inapoatoma co manta yonquipisohuë pochin ninamaꞌ. Naporama niꞌton, nitapiamaso yaꞌhuërin.

¹⁵ Israiroꞌsanquëmaso nisha nisha cancantopiramahuëꞌ, Cota huëntonoꞌsaso ama inapoatona oshahuainasohuëꞌ. Ama huachi Quiricaro ninanoquë pacosohuëꞌ. Co Piti-apin ninanoquë tërantaꞌ, pantamaso yaꞌhuërinhuëꞌ. Inaquëpitasoꞌ, mamanshiroꞌsa marëꞌ inahuara nohuanton artaroroꞌsa acopiso yaꞌhuërin. Naporahuaton nonpatamantaꞌ: ‘Sinioro nanpiárin niꞌton, napotaranquën,’ ama tocosohuëꞌ.

¹⁶ Israiroꞌsasoꞌ, iráca quëran huarëꞌ co yanatërinacohuëꞌ. Noꞌhuitëraya ohuaca pochin niconpi. Tëhuënchachin caso Sinioroco niꞌto, ina pochin piyapiroꞌsasoꞌ, co aꞌpaiyapohuëꞌ. Noyápiachin pastoroꞌsaquë carniroaꞌhuaroꞌsa aꞌpairëso pochin yanitopirahuëꞌ, ¡co onporonta inapotaꞌhuaso yaꞌhuërinhuëꞌ!

^17-18 Iprain israiroꞌsaso aꞌporahuatonaco, mamanshiráchin moshapi. Noꞌpirahuëroꞌsa huënton notatopiso pochin yaꞌipi anotopi. Naquëranchin naquëranchin mamanshi marëꞌ sacatopisopita sanapiꞌsarëꞌ poꞌpi. Noya nicatona natëcaisosoꞌ, co nohuantopihuëꞌ. Taparo nicacaiso tëhuënchinsoꞌ, paꞌya paꞌyatopi.

¹⁹ Napopisopitasoꞌ, panca ihuani quëpatë pochin nitapon. Napohuachinara, mamanshi camayoroꞌsa nipiso marëꞌ tapanaponaꞌ,” tënin.