Oseas 3 - Chayahuita (Shahui)

Osiasë, saꞌin maantarinsoꞌ

¹ Ina quëran Siniorosoꞌ camaiantatonco: “Paaton, saꞌan chachin maantaquëꞌ. Inasoꞌ aꞌporahuatënquën, aꞌna quëmapirëꞌ yaꞌhuëárin. Inapopirinhuëꞌ, naquëranchin nosoroantaquëꞌ. Ina pochin caso Sinioroco israiroꞌsa nosororahuë. Inapitasoꞌ mamanshiroꞌsa moshatonaꞌ, cashin panoꞌsa inahua marëꞌ quëpi. Ina quëran inapita mosharahuatonaꞌ, ina panoꞌsasoꞌ caꞌpi. Ina panoꞌsasoꞌ, opa cayarinso ayanirahuatona acotopi,” itërinco.

² Napotohuachincora, natërahuë. Saꞌahuësoꞌ, nani aꞌna quëmapiri huaꞌanëntápirinhuëꞌ, naquëranchin huaꞌanëntaantaꞌhuaso marëꞌ cari yaꞌhuërë paꞌantarahuë. Shonca aꞌnatërápotë coriqui prata quëran nininsoꞌ, nisahuaton cara pasa cara shonca quiro sipata ina marëꞌ yoꞌnahuë.

³ Nani paꞌanpatora: “Nani maantaranquën niꞌton, huaꞌqui pëiquë yaꞌhuaantapon. Ama huachi aꞌna quëmapirëꞌquën poꞌquësohuëꞌ. Huaꞌquimiachin co ca tëranta quëmaroꞌco nisarahuë,” itërahuë.

⁴ Inapochachin israiroꞌsantaꞌ, huaꞌqui co copirnohuanhuëꞌ nicaponaꞌ. Co maꞌsha huaꞌan tëranta yaꞌhuëtaponahuëꞌ. Chinotacaiso marëntaꞌ, co maꞌsha tëpaponahuëꞌ. Naꞌpiraꞌhuaroꞌsa Yosë nohuantërinsoꞌ nitotacaiso marëntaꞌ, co huachi yaꞌhuëaponhuëꞌ. Co huachi aꞌnaya tëranta corto huaꞌan yaꞌhuëaponhuëꞌ. Pëinënaquë mamanshiroꞌsa yaꞌhuëtopisopitantaꞌ, capa nisarin.

⁵ Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.