Oseas 2 - Chayahuita (Shahui)

¹ Naporoꞌ canpitaso israiroꞌsanquëmaꞌ: ‘Canpoasoꞌ Yosë piyapinënpitanpoa ninëhuaꞌ,’ niitaramaꞌ. Sanapiꞌsantaꞌ: ‘Yosë nosoroantarinpoaꞌ,’ niitapi,” itërin.

Israiroꞌsa mamanshi moshatonaꞌ, monshihuantë sanapi pochin cancantopisoꞌ

² Naquëranchin Siniorori israiroꞌsa itaantapon: “Israiro nacionsoꞌ, saꞌahuë pochin ninin. Inapitaso napoaponahuëꞌ, tëhuananpitatë pochin nitërinaco. Napotërinacoso marëꞌ carintaꞌ, inapita aꞌporahuë. Naporinso marëꞌ, huaꞌhuinpitari coisëquë quëpatona shaꞌhuirapiinaꞌ. ¡Ama huachi niminta paya pochin nisáinsohuëꞌ! ¡Ama huachi aꞌna aꞌna poꞌchinsohuëꞌ!

³ Coꞌsoꞌ natëtohuachinhuëꞌ, sanapi noyá iꞌnanpiratahuatona patopiso pochin canpita noꞌpanëma nitarahuë. Yaꞌnan acoapo yaꞌhuërinso pochin acoarahuë. Noꞌpaꞌ yaniro nipachina, sharoꞌsa iꞌsha pahuanin quëran taquipiso pochin nitarahuë.

⁴ Co huachi huaꞌhuinpita tëranta nosoroapohuëꞌ. Monshihuanárin quëran huaꞌhuaninso marëꞌ napotarahuë.

⁵ Sanapi nitapihuachina, co taparohuanhuëꞌ ninin: ‘Amiconëhuëpita nicapo paꞌsarahuë. Inapitasoꞌ, cosharoꞌ, oꞌoiꞌ, inapita quëtërinaco. Aꞌmocaꞌhuaso marëntaꞌ, huaita, rino piꞌshi, inapita quëtërinaco. Tomaꞌ, huino, inapitanta quëtërinaco,’ tënin. Inapochachin israiroꞌsanta mamanshiroꞌsa moshatonaꞌ, co taparohuanhuëꞌ, nipi.

⁶ Ina sanapi pochin nipiso marëꞌ iranëna nahuanquë paꞌcopitarahuë. Naporahuaton pairaquë oncorapiatë pochin nitarahuë. Ama iranëna quënanacaiso marëhuëꞌ, napotarahuë.

⁷ Soꞌin tëhuananpitë sanapisoꞌ, monshinpita imarin. Inapochachin israiroꞌsantaꞌ, mamanshiroꞌsa chinotopi. Inapita chinotopirinahuëꞌ, nohuantopisoso co quënanapihuëꞌ. Yonipirinahuë tërantaꞌ, co quënanapihuëꞌ. Naporo huachi monshihuantë sanapi noya yonquiantaton: ‘Yaꞌnan soꞌyatërahuëso chachin tahuërëtaantaꞌi nipachin. Inaroꞌcosoꞌ, noya noya yaꞌhuëápirahuëꞌ,’ tapon. Inapochachin israiroꞌsanta nisapi.

⁸ Cari nosoroato trico, huino, tomaꞌ, inapita quëtërahuë. Napotopirahuë, inapitaso co yonquipihuëꞌ. Prata, oro inapitanta ca nohuanton naꞌcon naꞌcon yaꞌhuëtopi. Napohuachinara, ina quëran mamanshiroꞌsa nipitërapi.

⁹ Napopiso marëꞌ carintaꞌ, trico, huino, inapita quëtërahuësoꞌ, matatë pochin nitarahuë. Inapita macacaso tahuëriꞌsa nanipirinhuëꞌ, ca nohuanton co huachi macaponahuëꞌ. Aꞌnantatona aꞌmocaiso marëntaꞌ, rino piꞌshi, huaita, inapita quëtërahuë. Inapotopirahuëꞌ, mataantapo.

¹⁰ Monshihuantë sanapisoꞌ, soꞌini anaꞌintërin. Anaꞌintaton monshinpita niꞌtonënquë aꞌmorinso matërin. Inapotaton, atapanin. Inapochachin carintaꞌ, israiroꞌsa atapanarahuë. Mamanshi camayo nacionoꞌsa niꞌtonënaquë atapanarahuë. Co incari tëranta anaꞌintërahuë quëran nichaꞌësarinhuëꞌ.

¹¹ Inapotohuato, co huachi noya ancantacaiso yaꞌhuëaponhuëꞌ. Co maꞌsha pita tëranta naꞌhuëcaiso yaꞌhuëaponhuëꞌ. Yoquiaꞌhuaraiꞌ pitaroꞌsaquë tëranta co huachi niyontoanpihuëꞌ. Co sahuatoquë tëranta niyontoantaponahuëꞌ.

¹² Monshihuantë sanapisoꞌ, monshinpitarëꞌ poꞌninso marëꞌ maꞌsha quëtopi. Inapochachin israiroꞌsantaꞌ: ‘Mamanshi catahuarincoi niꞌton, oparoroꞌsaꞌ, iquiraroroꞌsaꞌ, inapita noya noya yaꞌhuëtërincoi,’ toconpi. Napopiso marëꞌ ina oparoroꞌsaꞌ, iquiraroroꞌsaꞌ, inapita, ataꞌhuantarahuë. Tanan maꞌsharoꞌsari pëꞌyapon. Ina noꞌparoꞌsantaꞌ, pacananoꞌsa atarantapo.

¹³ Mamanshiroꞌsa moshacaiso marëꞌ yonarin pochin nininsoꞌ huaꞌqui aꞌpëpi. Inapopiso marëꞌ anaꞌintarahuë. Naporo tahuëriꞌsa inapita moshacaiso marëꞌ nitapatonaꞌ, miyosáchin, poꞌmoitërasáchin niconpi. Inapoatonaꞌ, caso naniantërinaco. Ca Sinioroco shaꞌhuitaranquëmaꞌ.

¹⁴ Inapotopirinacohuëꞌ, nanon nohuantohuachinara noyasha nontopiso pochin, israiroꞌsanta nitarahuë. Inotëro parti quëparëso pochin nitarahuë. Inaquë noya nontato achinicancanarahuë.

¹⁵ Israiroꞌsa iráca Iquipitoquë yaꞌhuëpi. Naporo tahuëriꞌsasoꞌ, ipora huarëꞌ nanontatë pochin nisapi. Ina quëran ocoiapo, inapitaso piyapinëhuëpita. Canta inapita Yosënënaco. Inapochachin aꞌna tahuërinta niantapon. Yaꞌhuëpiso noꞌpaquë chachin, oparoroꞌsa quëtaantarahuë. Acoro itopisoꞌ motopiana, anishatarahuë. Inaquë shaꞌtohuachina, paꞌpi notohuaroꞌ nitërinsoꞌ macaponaꞌ. Napohuachina: ‘Noya yaꞌhuëáparihuaꞌ,’ tëcaponaꞌ.

¹⁶ Naporosoꞌ, co huachi ‘Paaronëhuë,’ itaponacohuëꞌ. ‘Soꞌyahuë,’ itaponaco huachi. Ca Sinioroco shaꞌhuitaranquëmaꞌ.

¹⁷ Iporasoꞌ mamanshinëna nohuitatonaꞌ, Paaroroꞌsa itopi. Naporosoꞌ, co huachi mamanshiroꞌsa nininëna nohuitapihuëꞌ.

¹⁸ Naporo tahuëriꞌsa nanihuachin, israiroꞌsa catahuacaꞌhuaso marëꞌ tanan maꞌsharoꞌsarëꞌco anoyatarahuë. Inairaroꞌsaꞌ, yaꞌhuanoꞌsaꞌ, inapitarëꞌconta inapoarahuë. Ama piyapinëhuëpita maꞌsha onpotacaiso marëhuëꞌ napoarahuë. Pëꞌchinan, sahuëni, inapitanta co huachi niahuëcaiso marëꞌ Israiro noꞌpaquë ohuaraponahuëꞌ. Napohuachina piyapinëhuëpitasoꞌ, sano yaꞌhuëapona huachi,” itërin.

^19-20 Ina quëran Siniorosoꞌ, piyapinënpita itaantapon: “Israiroꞌsanquëmaꞌ. Carima macatë pochin nitohuatanquëmaꞌ, co huachi onporo tëranta aꞌpoaranquëmahuëꞌ. Camaitërahuëso chachin sanapi mapachinara, huaꞌanëntomiatopi. Inapochachin carimanta huaꞌanëntomiataranquëmaꞌ. Yaꞌipi cancanëhuë quëran nosororanquëma niꞌton, napotaranquëmaꞌ. Quëmapi saꞌináchin cancantërinso pochin carimanta nitaranquëmaꞌ. Naporo canpitantaꞌ, ca Sinioroco ninahuësoꞌ nitotapoma huachi,” itërin.

^21-22 Ina quëran Sinioro shaꞌhuitaantatonco: “Naporo tahuëriꞌsa israiroꞌsa nontohuachinaco, aꞌnaroáchin catahuararahuë. Inapita nohuitato ‘Quisiriro’ itarahuë. Quisirirosoꞌ, Yosë shaꞌtërinsoꞌ tapon naporin. Ca nohuanton Israiro noꞌpaquë oꞌnanapon. Ca nohuanton sharoꞌsanta papotaton noyatapon. Opa, oripo, inapitanta nitaponaꞌ. Piyapinëhuëpita pan, tomaꞌ, huino, inapita yaꞌhuëtacaiso marëꞌ napoarahuë. Ca Sinioroco shaꞌhuitaranquën.

²³ Naporo tahuëriꞌsa israiroꞌsasoꞌ, yaꞌhuëpiso noꞌpaquë chachin yaꞌhuëmiataponaꞌ. Inaquë acohuato, nóya yaꞌhuëaponaꞌ. ‘No-roama’ itato, co quëꞌyarësohuë pochin nitopirahuëꞌ, nosoromiatapo huachi. ‘No-ami’ itato, nisharoꞌsa pochin nitopirahuëꞌ. ‘Canpitaso piyapinëhuëpitanquëma chachin,’ itarahuë huachi. Inapitantaꞌ, ‘Quëmaso Yosënëhuëinquën,’ itaponaco,” itërinco.