Oseas 14 - Chayahuita (Shahui)

Yosë chachin tahuërëtaantacaiso marëꞌ Osiasëri israiroꞌsa pënëninsoꞌ

^1-2 Israiroꞌsanpoaꞌ. Sinioroso Yosënënpoa niꞌton, ina chachin tahuërëtaantaꞌahuaꞌ. Naꞌcon oshahuanëhua niꞌton, Yosë aꞌporëhuaꞌ. Inapopirëhuahuëꞌ, huëco naquëranchin Sinioro chinotaantaꞌahuaꞌ. Ina nontatëhuaꞌ: “Yaꞌipi co noyahuëꞌ ninaisoꞌ inquitocoi. Ina quëran chinotohuatëinquën, noya niꞌcoi.

³ Asiriaroꞌsa co nichaꞌësarincoihuëꞌ. Co cahuarioroꞌsaquë taꞌatoi chaꞌëpoihuëꞌ. Quiyaora mamanshi nicatoi ‘yosënëhuëi,’ itopiraihuëꞌ, co huachi ina pochin nohuitapoihuëꞌ. Quëmasoꞌ Sinioro, saꞌahuaroꞌsa nosororan. Quëmasáchin chinotarainquën,” itahuaꞌ.

Israiroꞌsa noya acoantacasoꞌ Siniorori shaꞌhuitërinsoꞌ

⁴ Sinioro naporin: “Israiroꞌsasoꞌ, co natantochináchinhuëꞌ cancantopirinahuëꞌ catahuahuato, co huachi ina pochin cancantaponahuëꞌ. Co quëꞌyápirohuë nipirinahuëꞌ, nosoroarahuë. Noꞌhuitërahuësoꞌ sanoato, napotarahuë.

⁵ Israiroꞌsa catahuato, poroncayo pochin nisarahuë. Inapitanta nirio yanco huësoatërinso pochin nitaparapi. Nara chiníquën itëhuanpachina, Nipano motopi pochin chinirin. Ina nara pochin israiroꞌsanta nisapi.

⁶ Sëꞌpaquënpita quëran panca taꞌantapon. Oripo sëꞌparoꞌsa pochin noyápiachin yaꞌnopon. Nipano motopiroꞌsaquë nonararoꞌsa pimoaninso pochin nicaponaꞌ.

⁷ Naporoꞌ israiroꞌsasoꞌ, noya aꞌpaiantarahuë. Trico aꞌnaroáchin soꞌsorinso pochin nicaponaꞌ. Opa yancotërinso pochin nicatonaꞌ, noya yaꞌhuëantaponaꞌ. Nipano parti huino nipisoꞌ, nahuinin. Ina pochin inapitanta nahuinaponaꞌ.

⁸ ‘Co huachi mamanshiroꞌsa paꞌyatëraihuëꞌ,’ tëcaponaꞌ. Cari chachin inapita aꞌpaiapo. Nontohuachinaco, catahuapo. Pino nara yaramëtárinso pochin nicato, piyapinëhuëpita cosharonënaꞌ, co ichipahuantapohuëꞌ,” tënin.

Tiquiapon pochin Osiasë pënëntërinsoꞌ

⁹ Yonquínahuan niꞌtomaꞌ, niyátainpichin yaꞌhuëhuatamaꞌ, isoíchin shaꞌhuitaranquëmasoꞌ yonquicoꞌ: “Onpopinsona nanpicasoꞌ Sinioro pënëninpoaꞌ. Inasoꞌ, noꞌtëquënáchin pënëntërin. Noya nipisopitasoꞌ, ina natëpi. Co noyahuëꞌ nipisopitaso nipirinhuëꞌ, co ina natëpihuëꞌ tënahuë,” tënin Osiasë.