Oseas 13 - Chayahuita (Shahui)

^1-3 (-)

Israiroꞌsa Yosëri ataꞌhuantacaso yonquirinsoꞌ

⁴ Sinioro naporin: “Iquipitoquë yaꞌhuërama quëran huarëꞌ, casáchin Sinioroco niꞌto, Yosënëmaco. Co aꞌna ca pochin chinotamaso yaꞌhuërinhuëꞌ. Carinquëmáchin nichaꞌëranquëmaꞌ.

⁵ Inotëro parti huëcasënquëmaꞌ, aꞌpairanquëmaꞌ. Inaquëso paꞌpi chiníquën piꞌi piꞌcatopirinhuëꞌ, aꞌpairanquëmaꞌ.

⁶ Napoaponahuëꞌ, naꞌcon naꞌcon cosharohuanahuatomaꞌ, nocantochináchin cancantëramaꞌ. Inapoatoma naniantëramaco.

⁷ Naporamaso marëꞌ paꞌpiniꞌ yamapintërinso pochin pashitaꞌpaponquëmaꞌ. Yaraniꞌ, iraquë ninatërinso pochin nitaranquëmaꞌ.

^8-9 Tocaniꞌ huaꞌhuinpita ayataton paaso piyapi quënanpachina, tëparin. Inapotahuaton ninopinën paꞌsa paꞌsatërin. Inapochachin carinquëmantaꞌ, nitaranquëmaꞌ. Paꞌpininta mapintohuachina, mapinën inaranchin pëꞌyarinso pochin nitaranquëmaꞌ. Maton maꞌshantaꞌ, mapinën paꞌsa paꞌsatërin. Inapochachin carinquëmantaꞌ, israiroꞌsanquëma ataꞌhuantaranquëmaꞌ. Co insonta paꞌpoyaponquëmahuëꞌ.

¹⁰ ¡Co Copirnonëma tëranta yaꞌipi ninanonëmaquë nichaꞌësarinquëmahuëꞌ! ¡Co huaꞌanoꞌsanëma tëranta napoarinhuëꞌ! Inapita mini iráca nohuantatomaꞌ: ‘Copirno, huaꞌanoꞌsaꞌ, inapita acotocoi,’ tënamaꞌ.

¹¹ Noꞌhuitonëhuëquë copirnoroꞌsa acotëranquëmaꞌ. Noꞌhuitonëhuëquë chachin osërëtëranquëmaꞌ.

¹² Yaꞌipi co noyahuëꞌ ninamasopita quiricaquë nani ninshitërahuë. Yaꞌipi oshanëma nani ninshitërahuë.

¹³ Canpitasoꞌ, co yonquipisohuë pochin ninamaꞌ. Huaꞌhuasha yahuaꞌhuatahuachina noya niacorin. Canpitaso nipirinhuëꞌ apiaꞌhuaya pochin nicatomaꞌ, co noya niacorinsohuë pochin ninamaꞌ.

¹⁴ ¡Co carima poꞌoroꞌ quëran nichaꞌësaranquëmahuëꞌ! ¡Piyapinëhuëpita nipiramahuëꞌ, co huachi nosoroaponquëmahuëꞌ! Napoaton chimirin përato: ‘Chimirin. Quëmasoꞌ ataꞌhuantonaꞌpinquën. ¿Intohuata iporasoꞌ inapoyantëransoꞌ?’ itërahuë. Poꞌoronta nontato: ‘Poꞌoroꞌ. Quëmantaꞌ naní quëran tëꞌhuachantërinën. ¿Intohuacha iporasoꞌ tëꞌhuachantërinënsoꞌ?’ itërahuë.

¹⁵ Israiroꞌsa noya yaꞌhuëantapirinahuë tërantaꞌ, cari chachin ataꞌhuantaantapo. Piꞌi pipirinso parti quëran ihuan huëcaton huinanoꞌsa ayanipon. Nitapacaiso marëꞌ paꞌton nininsopita tapapisoꞌ, inimiconënapitari matapon.

¹⁶ Samariaquë yaꞌhuëpisopita cari ataꞌhuantarahuë. Co natërinacohuë niꞌton, sahuëni quëran tëpaponaꞌ. Huaꞌhuaroꞌsa masahuatonaꞌ, noꞌpaꞌ huihuiraꞌpiaponaꞌ. Cayoronoꞌsantaꞌ, nichatëraꞌpiaponaꞌ,” tënin.