Oseas 1 - Chayahuita (Shahui)

Caniaritapon ninshitërinsoꞌ

¹ Piiri huiꞌnin Osiasësoꞌ, pënëntonaꞌpi niꞌton, israiroꞌsa pënënacaso marëꞌ Yosëri anitotërin. Cota huënton israiroꞌsa yaꞌhuëpiquë Osiasë copirnoꞌton huaꞌanëntasoꞌ, anitotërin. Ina quëran Cotamo yaꞌhuërëꞌ, huaꞌanëntaantarin. Ina piquëran Acasontaꞌ, huaꞌanëntaantarin. Ina quëran, Isiquiasënta huaꞌanëntaantarin. Inapita copirnoroꞌsa Cota huëntonquë huaꞌanëntaponaꞌ, Yosëri anitotërin. Coasë huiꞌnin Quiropoamontaꞌ, Israiro huëntonquë naporo tahuëriꞌsa copirno nisarin.

Osiasë saꞌarin quëran, Siniorori israiroꞌsa maꞌsona onpotacaso anitotërinsoꞌ

² Siniorori Osiasë yaꞌnan camaiapon: “Yaꞌipi israiroꞌsa aꞌporahuatonaco, soꞌina tëhuananpitopiso pochin nitërinaco. Napoaton quëmanta inapita aꞌchintaꞌhuaso marëꞌ, aꞌnara sanapi maquëꞌ. Ina masahuaton huiꞌnahuanquëꞌ. Inaso napoaponahuëꞌ, mananso piquëran tëhuananpitarinquën. Napoaton inaquë huiꞌnahuanansopitasoꞌ: ‘Monshihuantë sanapi huaꞌhuinpita,’ itaponaꞌ,” itërin.

³ Napotohuachina Osiasësoꞌ, Tiprain huiꞌnin Comiri itopisoꞌ manin. Comiriso huaꞌhuanpachina, quëmapiaꞌhuaya huairin.

⁴ Naporoꞌ Siniorori Osiasë camaiaton: “Huiꞌnan huaꞌhuatërinsoꞌ, Quisiriro itëquëꞌ. Co huaꞌquiya quëranhuëꞌ Quio copirno Quisiriro ninanoquë paꞌpi co noyahuëꞌ nininso marëꞌ shinpita anaꞌintarahuë. Naporahuaton tahuëri nanihuachin, Israiro huëntonquë co huachi copirnoroꞌsa huaꞌanëntaponahuëꞌ. Ina tapon ina pochin huiꞌnan nohuitëquëꞌ.

⁵ Co huaꞌquiya quëranhuëꞌ inimiconënpitari Israiro huënton minsëaponaꞌ. Quisiriro motopiana itopiquë minsërahuatonaꞌ, aꞌna noꞌpaꞌpaꞌ quëpaponaꞌ,” itërin.

⁶ Comiri naquëranchin huaꞌhuaantahuachina, sanapiaꞌhua huairin. Naporoꞌ Siniorori Osiasë camaiantaton: “Huiꞌnan huaꞌhuatërinsoꞌ, No-roama itëquëꞌ. Israiro huënton co huachi nosoroapohuëꞌ. Napoaton co huachi chaꞌëtarinacohuëꞌ. Ina tapon ina pochin inanta nohuitëquëꞌ.

⁷ Cota huëntonso napoaponahuëꞌ, nosoroarahuë. Cari chachin inapitasoꞌ, nichaꞌësarahuë. Yosënënaco niꞌto, topinan nichaꞌësarahuë. Co ahuëtatona chaꞌësapihuëꞌ. Sahuëni, pëꞌchinan, cahuarioroꞌsaꞌ, sontaroꞌsa cahuarioquë paꞌpisopita, co inapita nohuantarahuëꞌ,” itaantarin.

^8-9 No-roama aꞌpotohuachina, Comiriso huaꞌhuaantarin. Huaihuachina, quëmapiaꞌhua niantarin: Naporoꞌ Siniorori Osiasë camaiantarin: “Huiꞌnan huaꞌhuatërinsoꞌ, No-ami itëquëꞌ. Canpitaso piyapinëhuëpitanquëma nipiramahuëꞌ, co huachi piyapinëhuëpitanquëmahuëꞌ. Canta co huachi Yosënëmacohuëꞌ. Ina tapon inantaꞌ, ina pochin nohuitëquëꞌ.

¹⁰ Napoaponahuëꞌ, aꞌna tahuëri israiroꞌsaso notohuaroꞌ naꞌaponaꞌ. Marë yonsanquë inotëraꞌhuaya yaꞌhuërinso pochin naꞌaponaꞌ. Co incari tëranta pichicasoꞌ nanitaponhuëꞌ. Iporasoꞌ pënënatënquëma shaꞌhuitëranquëmaꞌ: ‘Canpitaso co piyapinëhuëpitanquëmahuëꞌ,’ itëranquëmaꞌ. Naporoso nipirinhuëꞌ: ‘Canpitaso huiꞌnahuëpitanquëmaꞌ. Caso Yosëco nanpito napotaranquëmaꞌ,’ itaranquëmaꞌ.

¹¹ Naporo tahuëriꞌsa Cota huënton israiroꞌsasoꞌ, aꞌnapita israiroꞌsarë aꞌnaíchin huaꞌanëna yaꞌhuëtaponaꞌ. Naquëranchin yaꞌhuëpiquë chachin yaꞌhuëantaponaꞌ. Naporahuaton notohuaroꞌ naꞌamiataponaꞌ. Piyapinëhuëpita yaꞌhuëpiquë chachin acoantapo. Piyapi iminënquë sharoꞌsa shaꞌninso pochin nitapo. Quisiriro motopiana cari anoyataantahuato, ¡ina tahuëri paꞌpi noya nisarin!