Números 9 - Chayahuita (Shahui)

^1-14 (-)

Yosë chinotacaso nëꞌmëtë pëi ótënpiso chitorori imotërinsoꞌ

¹⁵ Yosë chinotacaso marëꞌ nëꞌmëtë pëi ótënpiso tahuëri, chitorori imotërin. Inasoꞌ, “Yosërëꞌ anoyatopiso nëꞌmëtë pëiꞌ,” itopi antaꞌ. Nani iꞌhuaraya nisapasoꞌ ina pëi aipi, ina chitoro chachin pën pochin huënaratárin. Tahuërianpitaquë huarëꞌ inaporin.

¹⁶ Tahuëri nipachina, chinotacaso pëi aipi chitorori imotërin. Tashinta nipachina, ina chachin pën pochin huënaratárin. Nani tahuëri inaposárin. Co onporonta nishatërinhuëꞌ.

¹⁷ Chitoro Yosë chinotacaso pëi quëran inápaquë niotëhuachina, yaꞌipi israiroꞌsanta pacacaiso yaꞌhuërin. Insëquësona chitoro chiniconpachina, inaquë chinotapi.

¹⁸ Chitoro inaporin quëran, israiroꞌsa Siniorori camairin pacacaisoꞌ, chinotacaisoꞌ. Chitoro Yosë chinotacaso pëi quëran co niotëhuachinahuëꞌ, inaquëranchin yaꞌhuërápi.

¹⁹ Huaꞌquinta chitoro inaquëranchin yaꞌhuëpachina, israiroꞌsa co paꞌpihuëꞌ. Inaquëranchin yaꞌhuëatonaꞌ, Yosë marëꞌ sacatapi.

²⁰ Aꞌna tahuërisoꞌ, cara tahuëri pochin chitoro chinotacaso pëi aipi yaꞌhuërin. Sinioro nohuanton niotëhuachina, israiroꞌsanta paantapi. Sinioro nohuanton chachin chiniconpachina, israiroꞌsanta chinotapi.

²¹ Aꞌna tahuërisoꞌ, aꞌna tashiíchin chinotacaso pëi aipi chitoro yaꞌhuërin. Tashiramiachin niotëhuachina, israiroꞌsanta paantapi. Tahuërihuë nipon, tashihuë nipon niotëhuachina, israiroꞌsa paacaiso yaꞌhuërin.

²² Aꞌna tahuërisoꞌ, chitoro cara tahuëriíchin chinotacaso pëi aipi yaꞌhuërin. Aꞌna tahuërisoꞌ, aꞌna yoquiraꞌ. Aꞌna tahuërintaꞌ, aꞌna piꞌiraꞌ yaꞌhuërárin. Inapohuachina, israiroꞌsa co huachi paꞌpihuëꞌ. Napoaponahuëꞌ, niotëantahuachina, israiroꞌsa paantapi.

²³ Yosë nohuanton niotëhuachina, israiroꞌsa paantapi. Yosë nohuanton chachin chiniconpachina, chinotaantapi. Co paꞌpachinahuëꞌ, inaquëranchin Yosë marëꞌ sacatapi. Yosëri Moisësë shaꞌhuitërinso chachin israiroꞌsa nipi.