Números 27 - Chayahuita (Shahui)

^1-11 (-)

Cosoi, Moisësë yaꞌhuërënamën yaꞌconinsoꞌ

¹² Aꞌna tahuëri Siniorori Moisësë itapon: —Aparin motopiquë pantarahuaton, israiroꞌsa noꞌpaꞌ quëtarahuësoꞌ notëquëꞌ.

¹³ Nani niꞌpatan, inaquë chiminaran huachi. Inapoatan, iya masho Aaron pochachin shimashonënpita quënancoanan.

¹⁴ Sin inotëro parti niꞌsëma capa iꞌsha niꞌton, israiroꞌsa noꞌhuirinaco. Naporoꞌ catoma chachin camairanquëmaꞌ. Camaipiranquëmahuëꞌ, canpitaso noꞌhuitatoma co noyahuëꞌ ninamaꞌ. Camairanquëmaso chachin ninama naporini, israiroꞌsa noya niꞌitonacohuëꞌ. Miripa iꞌshanaquë naporamaso yonquiato napotaranquën. Inaso iꞌshaꞌ, Catisë parti yaꞌhuërin, itërin.

^15-17 —Sinioro quëmasáchin Yosënquën. Quëma nohuanton yaꞌipicoi nanpirai. Piyapinënpita catahuacaso marëꞌ aꞌnara huaꞌan acoquëꞌ. Co acohuatanhuëꞌ, ohuicaroꞌsa co huaꞌanëhuanhuë pochin israiroꞌsa nicaponaꞌ, itërin Moisësëri.

¹⁸ —Non huiꞌnin Cosoi itëramasoꞌ, nani huayonato ispiritonëhuë ayaꞌcoancantërahuë. Ina sëꞌhuamotorahuaton, israiroꞌsa catahuacaso marëꞌ acoquëꞌ.

^19-20 Ina quëran Iriasaro corto huaꞌanquë quëpaquëꞌ. Naporahuaton, yaꞌipi israiroꞌsanta niꞌtonënquë yaꞌhuërëtiinquënso shaꞌhuitëquëꞌ. Yaꞌipi israiroꞌsa natërinënso pochin, inanta natëcaiso marëꞌ shaꞌhuitacaso yaꞌhuërin.

²¹ Napoaponahuëꞌ, Cosoi huaꞌan yaꞌconaton maꞌsona yanipachin, Iriasaro corto huaꞌanquë paꞌsarin. Inari huachi Cosoi yaꞌhuërënamën shaꞌhuitaꞌhuaso marëꞌ Orin quëran natanaponco. Anitotërahuëso chachin Cosoiri israiroꞌsa camaiapon, itërin.

^22-23 Siniorori camairinso chachin Moisësësoꞌ, yaꞌipi ninin. Cosoi masahuaton, Iriasaro corto huaꞌanquë quëparin. Naporahuaton yaꞌipi israiroꞌsa niyontonpiquë shaꞌhuitërin inari yaꞌhuërëtacasoꞌ. Ina quëran sëꞌhuamotorahuaton, ina marëꞌ Yosë nontërin. Inapotaton israiroꞌsa camaicaso marëꞌ acorin.